काठमाडौं– प्रहरी अतिरिक्त महानिरीक्षक (एआईजी) बढुवा गर्ने सरकारको निर्णयविरुद्ध तीन डीआईजीहरू अदालत जाने तयारी गरेका छन्। तीन सिनियर डीआईजीहरू घनश्याम अर्याल, प्रकाशजंग कार्की र ईश्वरबाबु कार्की बढुवाको निर्णयविरुद्ध सर्वोच्च अदालत जान लागेका हुन्।
डीआईजी अर्यालले नेपाल लाइभसँग भने, ‘उजुरी सुन्ने समितिबाट न्याय नपाएकाले हामी अदालत जाने तयारीमा छौं। अहिले लोक सेवासँग हाम्रो उजुरीमाथिको कारबाहीबारे जानकारी लिँदैछौं।’
लोक सेवाले उनीहरुको उजुरीमाथिको जानकारी लिखित रुपमै दिएपछि अदालत जाने डीआईजी अर्यालले बताए। अर्यालसँगै तीनै जना डीआईजीहरु अदालत जाने तयारीमा रहेका छन्। त्यसका लागि प्रक्रिया समेत अघि बढाइसकिएको अर्यालको भनाइ छ।
चैत १ गते गृहसचिव नेतृत्वको बढुवा सिफारिस समितिले वसन्त पन्त, धीरजप्रताप सिंह र रवीन्द्र धानुकलाई बढुवाका लागि सिफारिस गरेको थियो। तर, आफूभन्दा जुनियर डीआईजीद्वय सिंह र धानुकलाई एआईजी बनाउन सिफारिस गरेको भन्दै उनीहरुले बढुवामाथिको उजुरी सुन्ने समितिमा उजुरी दिएका थिए।
उक्त उजुरीमाथि कारबाही गर्दै लोक सेवा आयोगका अध्यक्ष रहेको उजुरी सुन्ने समितिले बढुवा सिफारिस समितिको निर्णयलाई नै सदर गरेको थियो। बुधबार साँझ उजुरी सुन्ने समितिले सदर गरेपछि बिहीबार बिहान बसेको मन्त्रिपरिषद बैठकले सिफारिसमा परेका तीनै जना डीआईजीलाई एआईजीमा बढुवा गर्ने निर्णय गरेको छ।
योसँगै उनीहरुलाई एआईजीको फुली लगाउने बाटो पनि खुल्ला भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1732445217.webp)
