अपहरित नाबालिका सकुशल मुक्त, अपहरणमा संलग्न पाँचजना पक्राउ

सुरक्षा/अपराध

रासस शुक्रबार, चैत ११, २०७८ २१:५८

जनकपुर- धनुषा प्रहरीले शुक्रबार साँझ एक नाबालिकालाई अपहरण मुक्त गराउन सफल भएको छ। जनकपुरधाम उपमहानगरपालिका–१६ पुल्चौकस्थित आफ्नै घरबाट अपहरणमा परेकी ध्रुव मण्डलकी ४ वर्षीया छोरी सृष्टिलाई अपहरणमा परेको २४ घण्टाभित्र मुक्त गराइएको हो।

शुक्रबार साँझ ६ बजेतिर धनुषाको बिदेह नगरपालिका–८ बफैयबाट मुक्त गराइएको प्रहरीले जनाएको छ।

बालिकाको अपहरणमा संलग्न रहेको आरोपमा पाँचजनालाई पक्राउ गरी थप अनुसन्धान अघि बढाएको जिल्ला प्रहरी कार्यालय धनुषाका प्रवक्ता प्रहरी नायब उपरीक्षक जितेन्द्रकुमार बस्नेतले जानकारी दिए।

बिहीबार साँझ आफ्नै घर आँगनबाट अचानक नाबालिका बेपत्ता भएको भन्दै परिवारजले प्रहरीमा जानकारी गराएका थिए। सूूचना पाएलगत्तै प्रदेश प्रहरी कार्यालय तथा जिल्ला प्रहरी कार्यालय धनुषाबाट खटिएको संयुक्त प्रहरी टोलीले नाबालिकाको खोजी सुरु गरेको थियो।

त्यही क्रममा नाबालिकाका बुबाको मोबाइलमा अपहरणकारीहरूले १५ लाख फिरौती माग गर्दै गरेको फोनका आधारमा मोबाइल नेटवर्किङ पत्ता लगाउँदै अपहरणकारीसम्म पुग्न सफल भएको प्रहरी नायब उपरीक्षक बस्नेतले जानकारी दिए।