काठमाडौं– शहरी विकासमन्त्री रामकुमारी झाँक्रीले सिंहदरबार गुरुयोजना छिट्टै अघि बढाइने बताएकी छन्। देशको प्रमुख प्रशासनिक केन्द्रलाई वर्षौंसम्म अव्यवस्थित बनाएर राख्न नहुने बताउँदै उनले सिंहदरबार गुरुयोजना स्वीकृत गरेर छिटो अघि बढाइने बताइन्।
शुक्रबार मन्त्रालयमा आयोजित सिंहदरबार गुरुयोजनाबारे छलफल कार्यक्रलाई सम्बोधन गर्दै मन्त्री झाँक्रीले सिंहदरबारभित्र युटिलिटी कोरिडोर बनाएर एकीकृत विकास योजना अघि बढाउनुपर्ने बताइन्।
मन्त्री झाँक्रीले भनिन्, 'देशको प्रमुख प्रशासकीय केन्द्रलाई अस्तब्यस्त बनाएर गुरुयोजना अलपत्र पार्न मिल्दैन । सकेसम्म छिटो अघि बढाउन गृहकार्य थालेका छौं ।'
सबै निकायको संलग्नतामा र अपनत्व हुने गरी गुरुयोजना स्वीकृत उनको भनाइ छ। उनले सिंहदरबार गुरुयोजनामा सुरक्षा संवेदनशीलतालाई मध्यनजर गर्दै सर्वसाधारणको प्रवेशलाई समेत व्यवस्थित बनाउनुपर्ने बताइन्।
मन्त्री झाँक्रीले सिंहदरबार गुरुयोजना थप मजबुद बनाउन नेपाली सेना, नेपाल प्रहरी, सशस्त्र प्रहरी, शहरी विकास मन्त्रालय, खानेपानी मन्त्रालय, नेपाल टेलिकम, नेपाल विद्युत् प्राधिकरण संलग्न टास्क फोर्स बनाएर गुरुयोजना बनाइने बताइन्।
शहरी विकास सचिव डा रमेशप्रसाद सिंहले सिंहदरबारलाई थप व्यवस्थित बनाउन गुरुयोजना अघि बढाइने बताए। सिंहदरबार भित्रको सुरक्षा प्रणाली उत्कृष्ट बनाउन यो गुरुयोजना महत्वपूर्ण हुने सचिव सिंहको भनाइ छ।
सशस्त्र प्रहरीका नायव महानिरीक्षक (डीआईजी) राजु अर्यालले सिंहदरबारको सुरक्षाका लागि गेटमा आधसनिक स्क्यानिक उपकरण राख्न आवश्यक रहेको बताउँदै सिंहदरबारभित्र आइपर्ने आपतकालीन प्रकोपबाट उद्धार गर्ने विषय गुरुयोजनामा राख्नुपर्ने बताए।
नेपाली सेनाका उपरथी निर्मल कुमार थापाले सिंहदरबारभित्र सर्वसाधारण आउन सहज हुने र सुरक्षाको दृष्टिले पनि असर नपुग्ने खालको अवस्था बनाउन गुरुयोजनामा उल्लेख गर्नुपर्ने बताए। सुरक्षा र स्वास्थ्यलाई ध्यानमा राखेर एम्बुलेन्स र दमकल समेत सिंहदरबार परिसरभित्रै उपलब्ध हुने व्यवस्था गर्नुपर्ने उनले बताए।
त्यसैगरी नेपाल प्रहरीका वरिष्ठ उपरीक्षक राजेशनाथ बास्तोलाले सिंहदबारमा सर्वसाधारणको पहुँच र सुरक्षा चुनौतिलाई सन्तुलनमा राख्ने विषय गुरुयोजनामा समेटिनुपर्ने बताए। नेपाल प्रहरीका उपरीक्षक बेद विष्टले सिंहदरबारभित्र ड्रोनबाट हुन सक्ने सुरक्षा चुनौती रोक्न एण्टी ड्रोन प्रणाली समेत समेट्नुपर्नेमा जोड दिए।
यस्तै, नेपाल टेलिकमकी प्रतिभा बैद्यले सिंहदरबारभित्र अव्यवस्थित रहेको टेलिकमका तारहरु व्यवस्थित बनाइने बताउँदै सिंहदरबार व्यवस्थित बनाउन सबैको भूमिका महत्वपूर्ण रहेको उल्लेख गरिन्।
नेपाल विद्युत् प्राधिकरणका प्रमुख कार्यकारी निर्देशक कुलमान घिसिङले सरोकारवाला निकायसँग समन्वय गरेर बिजुलीका तारहरु तत्काल अण्डर ग्राउण्ड गर्न सकिने बताए। कार्यकारी निर्देशक घिसिङले सिंहदरबारभित्र इलेक्ट्रिक चार्जिर्ङ स्टेशन समेत राख्न लागिएको जानकारी दिंदै स्ट्रिट लाइट व्यवस्थित गर्नेबारे छलफल गरेर अघि बढ्न सकिने बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1781158823.png)
-1764146706.png)
