काठमाडौं– नेपाल प्रहरीको तल्लो तहमा थपिएका पदहरुमा बढुवा प्रक्रिया थपिएको छ। तल्लो तहका प्रहरी कर्मचारीहरुको लामो समयसम्म बढुवा नहुने समस्या समाधानका लागि भन्दै थपिएका प्रहरी सहायक हवल्दार, प्रहरी वरिष्ठ हवल्दार र प्रहरी वरिष्ठ नायव निरीक्षक पदमा बढुवा प्रक्रिया सुरु भएको गृह मन्त्रालयले जानकारी दिएको छ।
प्रहरी नियमावली, २०७१ लाई नवौँ संशोधन गरी ३ पद सृजना गरिएको हो। यी पदमा दरबन्दी सृजना गर्न मन्त्रिपरिषद् बैठकले प्रहरी नियमावली २०७१ लाई संशोधन गरी ‘प्रहरी (नवौँ संशोधन) नियमावली, २०७८ गत माघ ३ गते राजपत्रमा प्रकाशित भएको थियो। सोहीअनुसार पहिलो चरणमा बिहीबार मात्रै बढुवा सिफारिस भएको हो।
गृह मन्त्रालयका प्रहरी प्रशासन शाखाका उपसचिव गणेश गैह्रेका अनुसार नियमावली संशोधनपछि तीन पदमा गरेर २० हजार ४१९ प्रहरीको बढुवा हुनेछ। उनका अनुसार प्रहरी नायव निरीक्षकबाट प्रहरी वरिष्ठ नायव निरीक्षकमा १ हजार ४१८ जना, प्रहरी हवल्दारबाट प्रहरी वरिष्ठ हवल्दारमा ३ हजार ७४८ जना र प्रहरी जवानबाट प्रहरी सहायक हवल्दारमा १५ हजार २५३ जना बढुवा हुनेछन्।
यीमध्ये पहिलो चरणमा बिहीबार प्रहरी वरिष्ठ नायव निरीक्षकमा १९१ जना, प्रहरी वरिष्ठ हवल्दारमा १ हजार १७३ जना तथा प्रहरी सहायक हवल्दारमा १ हजार ७५२ जना बढुवा सिफारिस भएका छन्।
दरबन्दी सिर्जना भए अनुरुप क्रमश बढुवा गर्दै लैजाने प्रहरी प्रधान कार्यालयको मानवस्रोत एवं प्रशासन विभाग अन्तर्गतको कर्मचारी प्रशासन शाखाले जनाएको छ।
गृहमन्त्री खाणले लामो समयसम्म वृत्ति विकास हुन नसकेका तल्लो तहका प्रहरीहरूलाई काममा हौसला बढाउन यो निर्णय लिइएको बताए। ‘लामो समयदेखि तल्लो तहका प्रहरीहरूको बढुवा हुन सकिरहेको थिएन। उनीहरूको बढुवा गरेर वृत्ति विकास गर्न पद थप्ने निर्णय गरेका हौं। यसमा सम्माननीय प्रधानमन्त्रीको धेरै ठूलो हात छ,’ गृहमन्त्री खाणले भने।
बढुवा ज्येष्ठताका आधारमा हुनेछ। यो व्यवस्था नियमावलीमै गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
