काठमाडौं- युक्रेनी राष्ट्रपति भोलोदिमिर जेलेन्स्कीले जर्मनकी संसद्मा सम्बोधन गरेका छन्। बिहीबार १० मिनेट सम्बोधन गर्दा सांसदहरूले उठेर उनीप्रति सम्मान व्यक्त गरेका थिए।
सांसदहरुलाई रुसी युद्ध अन्त्य गर्न सघाउन अनुरोध गर्दै युक्रेनी राष्ट्रपति जेलेन्स्कीले दोस्रो विश्वयुद्ध र कम्युनिस्ट शासन ढल्दाको जर्मन अनुभवको चर्चा गरेका थिए।
‘रुसले हाम्रो देशमा आक्रमण गरेर ‘युरोपको स्वतन्त्रताविरुद्ध नयाँ पर्खाल बनाइरहेको’ छ। त्यसलाई रोक्न थप कदम चाल्न यहाँहरु समक्ष अपील गर्दछु,’ सम्बोधनको क्रममा उनले भने।
युक्रेनले युद्धअघि रुससँगको आर्थिक सम्बन्ध सिमित पार्न जर्मनीलाई बारम्बार भनेको स्मरण गर्दै बर्लिनले रुसलाई ‘स्वतन्त्रता र दासत्व’बीचमा पर्खाल खडा गर्न सघाएको राष्ट्रपति जेलेन्स्कीले बताए।
किएभबाट बर्लिनस्थित संसद्लाई सम्बोधन गर्दै उनले जर्मन चान्सलर ओलाफ सोल्टस्लाई भने, ‘यो बर्लिनको पर्खाल होइन, यो स्वतन्त्रता र बन्धनबीचको मध्य युरोपको पर्खाल हो। यो पर्खाल हरेक बमको साथ ठूलो हुँदै गइरहेको छ। प्रिय सोल्ट्स्ः यो पर्खाललाई भत्काउनुहोस् ।’
रुसबाट प्राकृतिक ग्यास ल्याउनको लागि नर्ड स्ट्रिम २ पाइपलाइन परियोजनाको लागि जर्मन सरकारले रुसलाई समर्थन गर्दै आएको राष्ट्रपति जेलेन्स्कीलेको भनाइ थियो। युक्रेन र अन्यले नोर्ड स्ट्रिम २ को विरोध गरेका थिए। जसलाई बर्लिनले हाल रोकेको छ। यसले युक्रेनी र युरोपेली सुरक्षालाई खतरामा पार्ने चेतावनी दिएको छ।
राष्ट्रपति जेलेन्स्कीलेले रुसविरुद्ध प्रतिबन्धहरू ढिला लगाइएको र त्यस्ता कदमहरू मात्रै पर्याप्त नहुने बताएका छन्। ‘मस्कोले आक्रमणको लागि युरोपलाई प्रयोग गरेको थियो र त्यसपछि लगाइएको प्रतिबन्धहरू यसलाई रोक्न पर्याप्त थिएनन्,’ उनले भने।
जर्मनीले बिहीबार युक्रेनलाई थप सैन्य सहायता दिने प्रतिज्ञा गरेको छ तर रुसको आक्रमण रोक्न नेटोको प्रत्यक्ष हस्तक्षेपलाई अस्वीकार गरेको छ।
जर्मन चान्सलर स्कोल्जसँगको संयुक्त पत्रकार सम्मेलनमा बोल्दै नेटोका महासचिव जेन्स स्टोल्टेनबर्गले युक्रेनको आत्मरक्षामा सहयोगी राष्ट्रहरूले सहयोग गरिरहने तर व्यापक द्वन्द्व निम्त्याउन सक्ने कदम नचाल्ने बताएका छन्।
‘यस द्वन्द्वलाई अझ बढ्नबाट रोक्नको लागि नेटोको जिम्मेवारी महत्त्वपूर्ण हुन्छ। हामीले सहयोग गरे त्यो अझ खतरनाक हुनेछ। थप पीडा, मृत्यु र विनाश निम्त्याउँछ,’ उनले भने।
स्टोल्टेनबर्गले क्रेमलिनलाई तुरुन्तै आफ्नो सैन्य अभियान रोक्न र वार्ताको टेबलमा फर्कन आग्रह गरे। ‘यो राष्ट्रपति पुटिनको युद्ध हो। उसले युद्ध रोक्नुपर्छ, आफ्नो सेना फिर्ता लिनुपर्छ,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1788264467.png)
-1786602170.png)
-1786513116.png)
