काठमाडौं- पोल्याण्ड, चेक गणतन्त्र र स्लोभेनियाका प्रधानमन्त्रीहरू युक्रेनका राष्ट्रपति भोलोडिमिर जेलेन्स्की र प्रधानमन्त्रीसँग वार्ता गर्न युक्रेनको राजधानी किएभ आइपुगेका छन्।
रुसी आक्रमणपछि युक्रेन भ्रमण गर्ने तीनै देशका प्रधानमन्त्री पहिलो पश्चिमी नेता हुन्। उनीहरु रेलबाट युक्रेन पुगेका थिए। युक्रेनी राष्ट्रपति जेलेन्स्कीले यति लामो यात्रा गर्दै आफूहरूलाई समर्थन गरेकोमा तीन प्रमुखलाई धन्यवाद दिए।
तीन देशका प्रमुखले मंगलबार साँझ राष्ट्रपति जेलेन्स्कीसँग भेट गरेका थिए। भेटपछि चेक गणतन्त्रका प्रधानमन्त्रीले युक्रेनका जनतालाई आफू एक्लै भएको महसुस नगर्न आग्रह गरे।
चेक रिपब्लिकका प्रधानमन्त्री पेटर फियालाले ट्वीट गर्दै युक्रेनी जनतालाई भनेका छन्, ‘हामीलाई थाहा छ तपाईं हाम्रो जीवनका लागि लड्दै हुनुहुन्छ। तपाईहरु एक्लो हुनुहुन्न। हाम्रो देश तपाईहरुको साथमा छ।’
पोल्याण्डका प्रधानमन्त्री माटेउज मोराभिएत्स्कीले युक्रेन गुमाएमा युरोप उस्तै नहुने बताएका छन्। यता, राष्ट्रपति जेलेन्स्कीले पोल्याण्ड, चेक गणतन्त्र र स्लोभेनियाका प्रधानमन्त्रीहरु आउनुले युक्रेनमाथि बलियो समर्थन रहेको जनाउने बताए।
उनले भने,‘तपाईहरु यहाँ आउनुले युक्रेनमाथि बलियो समर्थन देखाउँछ।’ युक्रेनका प्रधानमन्त्री डेनिस स्किमेलले तीन देशका प्रधानमन्त्रीसँगको भेटबारे ट्वीट गर्दै भने,‘रुसमाथि कडा प्रतिबन्ध लगाउने विषयमा कुरा भयो। जसमा रुसलाई आतंकवादको प्रायोजक मान्नु पनि समावेश छ।
चार देशका प्रमुखको वार्ताका क्रममा राजधानी किएभमा पनि बम विस्फोटको आवाज सुनिएको थियो। युक्रेनमा रुसको आक्रमण जारी छ र उसले राजधानी किएभलाई कब्जा गर्न खोजिरहेको छ। योसँगै दुई देशबीच शान्ति वार्ता पनि भइरहेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
