काठमाडौं– काठमाडौंको कीर्तिपुर नगरपालिलका–५ पाँगा गाउँ ब्लकका भूमिहीनलाई जग्गा धनी पूर्जा (लालपूर्जा) वितरण गरिएको छ।
भूमि, व्यवस्था, सहकारी तथा गरिबी निवारण मन्त्री शशी श्रेष्ठले ३२ घर परिवारलाई जग्गाधनी दर्ता प्रमाणपत्र प्रदान गरिन्। मन्त्री श्रेष्ठले यहि चैत १५ भित्र थप पाँच जिल्लामा रहेका गाउँ ब्लकमा पनि लालपूर्जा वितरण गर्ने तयारी भइरहेको जानकारी दिइन्।
आगामी आर्थिक वर्षभित्र देशभरका सबै गाउँ ब्लकमा लालपूर्जा वितरण गर्ने गरी कार्यक्रम र बजेट व्यवस्था गर्न लागिएको पनि मन्त्री श्रेष्ठले जानकारी दिइन्।
लेखेर र भाषण गरेर मात्रै नागरिकले अधिकार प्राप्त गर्न नसक्ने भन्दै मन्त्री श्रेष्ठले इमान्दार भएर जनताको काम गर्न स्थानीय तहका जनप्रतिनिधि र मातहतका कर्मचारीलाई आग्रह गरिन्।
राज्यबाट प्रदान गरिएको सुविधा प्राप्त गर्न नसकेका तथा दुःखमा परेका जनतालाई राहत प्रदान गर्ने कार्यमा अगुवाई गर्न पनि स्थानीय तहका पदाधिकारीलाई उनले सुझाव दिइन्।
मन्त्री श्रेष्ठले संविधानमा भएको व्यवस्थाअनुसार भूमिहीन दलित र सुकुम्बासीलाई जग्गा उपलब्ध गराउने र अव्यवस्थित बसोबासीको समस्या समाधान गर्न राष्ट्रिय भूमि आयोगमार्फत् काम अगाडि बढाइएको र जिल्ला आयोग गठनको काम भइरहेको पनि बताइन्।
विशेष गरी काडमाडौं उपत्यका र देशका विभिन्न भागमा समेत रहेका स्वबासी र बेनिसाको समस्या समाधान गर्न पनि आफूले प्रक्रिया शुरु गरिसकेको श्रेष्ठले दाबी गरिन्। मुक्त कमैया, कमलरी, हरुवा चरुवाको समस्या समाधान गर्न अध्ययन समिति बनाएर अध्ययन गर्ने काम भइरहेको उनको भनाइ छ।
मन्त्री श्रेष्ठले संविधानमा भएको रोजगारीको हकको कार्यान्वयनका लागि शहिद, वेपत्ता परिवारका छोराछोरी, हरुवा चरवा र वादी समुदायका युवा तथा उनीहरुका सन्तानलाई विशेष नापीको तालिम दिएर रोजगारी दिलाउने प्रक्रिया समेत अगाडी बढाइसकेको जानकारी दिइन्।
आफूले मन्त्रालय सम्हालेपछि हालसम्म विभिन्न गाउँब्लकका करिब १५ हजार घरपरिवारलाई लालपूर्जा वितरण गरिएको बताइन्।
२०२१ साल यता जग्गाको नापी हुँदा गाउँब्लकका रुपमा राखिएका र जग्गा भएर पनि लालपूर्जा विहीन बनिरहेकाहरुलाई लालपूर्जा वितरण अभियान तीव्र पारिएको मन्त्री श्रेष्ठको सचिवालयले जानकारी दिएको छ।
मन्त्री श्रेष्ठले यसअघि महोत्तरी, सप्तरी, धनुषा, सुनसरी र चितवन जिल्लाका विभिन्न गाउँब्लकमा रहेका भूमि विहीनहरुलाई लालपूर्जा वितरण गरिसकेकी छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_PJ3Pux3W9j-1771414611.jpg)
-1764146706.png)
