काठमाडौं– पाँच वर्षअघि स्थानीय तहको निर्वाचनमा एमालेले मधेस प्रदेशका १३६ स्थानीय तह (पालिका)मध्ये जम्मा १८ वटा पालिकामा मात्रै प्रमुख/अध्यक्ष जितेको थियो। देशभरिका स्थानीय तहको नतिजामा प्रथम बनेको पार्टी एमाले तराईमा भने पाँचौंमा सीमित हुनुपर्यो। प्रदेश तथा प्रतिनिधि सभाको निर्वाचनमा माओवादी केन्द्रसँग गठबन्धन गरेर देशभर पहिलो पार्टी बन्दा समेत प्रदेश २ मा चौथोमा चित्त बुझाउनुपरेको थियो। समानुपातिकतर्फ प्रदेश २ मा एमालेले जम्मा १६ दशमलव २५ प्रतिशत मत पाएको थियो। गठबन्धन बनाएर चुनाव लड्दा प्रत्यक्षमा १४ सिट जितेको थियो।
माथिको आँकडालाई महसुस गरेको एमालेले तराई–मधेस केन्द्रित पार्टी प्रवेश अभियानलाई तीव्र बनाएको छ। एमालेले तराई–मधेसका विभिन्न जिल्लालाई प्रतिनिधित्व गर्ने केही केन्द्रीय नेता, जनप्रतिनिधि र अन्य पार्टीका कार्यकर्तालाई पार्टी प्रवेश गराएको छ।
एमालेको निसानामा मधेस केन्द्रित दल र माओवादी केन्द्रमा आवद्ध नेता-कार्यकर्ता देखिन्छन्। त्यसमा पनि गएको निर्वाचनमा स्थानीय तह जितेका नेताहरुलाई विशेष प्राथमिकताका साथ पार्टी भित्र्याउने अभियानलाई एमालेले अगाडि बढाएको छ।
शनिबार मात्रै एमाले अध्यक्ष केपी शर्मा ओलीले मधेस प्रदेशका दुई स्थानीय तहका प्रमुखसहित केही जनप्रतिनिधिलाई एमालेमा प्रवेश गराए। वीरगञ्ज महानगरपालिका मेयर विजय सरावगीसँगै २ जना वडाध्यक्ष, जिल्ला समन्वय समितिका सदस्य र केही वडा सदस्य तथा नगर कार्यपालिका सदस्यहरु एमाले प्रवेश गरेका छन्। शनिबार सरावगीसँगै एमाले प्रवेश गर्नेमा वडा नम्बर १४ का वडाध्यक्ष भर कुर्मी, २५ का बृजलाल पटेल र जिल्ला समन्वय समितिका सदस्य आमोद यादवसहितका जनप्रतिनिधिहरु छन्। एमालेमा प्रवेश गरेका सरावगी जसपाका मेयर हुन्।
त्यसलगत्तै बाराको जयनगर (चिउँटाहा)मा आयोजित आमसभामा पुगे ओली। त्यहाँ आदर्श कोतवाल गाउँपालिकाका अध्यक्ष मुस्तफा अन्सारी र उनीनिकट वडाध्यक्ष र पार्टीका नेता कार्यकर्ता एमालेमा प्रवेश गरे। अन्सारी पनि जसपाबाटै निर्वाचित अध्यक्ष हुन्। उक्त कार्यक्रममा कलैया उपमहानगरपालिका वडा नम्बर ९ का अध्यक्ष डा अख्तर आलम अन्सारीसमेत औपचारिक रुपमा एमालेमा प्रवेश गरे।
यसअघि फागुन २५ गते एमालेको संगठन कमजोर रहेको मोरङको रंगेली नगरपालिकाका मेयर, उपमेयर र दुईजना वडाध्यक्षसहित माओवादी केन्द्रका कार्यकर्ता एमालेमा प्रवेश गरेका थिए।
प्रवेश गर्नेमा रंगेली नगरपालिकाका मेयर दीलिपकुमार बगडिया र उपमेयर केशवकुमारी खनालका साथै वडा नम्बर १ का वडाध्यक्ष महेशकुमार खनाल र वडा नम्बर ७ का वडाध्यक्ष रामचन्द्र मण्डल छन्। उनीहरू सबै माओवादी केन्द्रबाटै निर्वाचित भएका थिए।
त्यसअघि फागुन २ गते रूपन्देहीका दुईवटा पालिका अध्यक्ष, उपाध्यक्षसँगै केही वडाअध्यक्षहरू एमालेमा प्रवेश गरेका थिए। रोहिणी गाउँपालिकाका अध्यक्ष सनोज कुमार यादवसँगै ओमसतिया गाउँपालिका अध्यक्ष हिरा केवट ‘राहुल’ र उपाध्यक्ष सुन्दरीमती कुमारी हरिजनलाई एमालेका उपाध्यक्ष विष्णु पौडेलले पार्टीमा स्वागत गरेका थिए। यादव तत्कालीन मधेसी जनअधिकार फोरम, हालको जनता समाजवादी पार्टी (जसपा) बाट गाउँपालिका अध्यक्षमा निर्वाचित भएका थिए। केवट र हरिजन भने नेकपा माओवादी केन्द्रबाट निर्वाचित हुन्।
पुसबाटै सुरु भएको थियो अभियान
नेपाली कांग्रेसले आइतबारदेखि एक महिने निर्वाचन अभियान थालेको छ। तर, एमालेले भने गत पुसदेखि नै निर्वाचन केन्द्रित अभियान मात्रै होइन, पार्टी प्रवेश कार्यक्रम थालिसकेको थियो।
चितवन महाधिवेशनबाट निर्वाचित नेकपा एमालेको केन्द्रीय कमिटीको दोस्रो बैठकले गरेको निर्णय थियो- 'पुस मसान्तसम्म सबै तहका पार्टी कमिटीहरूले आ–आफ्नो कार्यक्षेत्र भित्रको पार्टी प्रवेश सम्भावनाको आकलन गर्ने, प्रवेश गर्ने सम्भावित व्यक्तिहरूको सूची तयार गर्ने र प्रवेशको तयारीका लागि निश्चित व्यक्तिलाई जिम्मेवारी प्रदान गर्ने।'
एमालेले गरेको यो निर्णयअनुसार माघ र फागुन महिनामा विशेष कार्यक्रम आयोजना गरी पार्टी प्रवेश अभियान सञ्चालन हुने थियो। तर, एमाले अध्यक्ष ओलीले त्यसअघि नै निर्णय कार्यान्वयन थालिसकेका थिए। पुस ६ गते नै कपिलवस्तुको बहादुरगञ्जमा पार्टी प्रवेश कार्यक्रम गरेर जनता समाजवादी पार्टी (जसपा)का केन्द्रीय सदस्य मंगलप्रसाद गुप्तालाई एमालेमा भित्र्याए।
२०७४ को प्रतिनिधि सभा निर्वाचनमा कपिलवस्तु क्षेत्र नम्बर ३ का ‘उपविजेता’ गुप्तालाई नेकपा एमालेले उच्च प्राथमिकतामा राखेर पार्टी प्रवेश गराएको हो। उनलाई पार्टीमा प्रवेश गराउन अध्यक्ष केपी शर्मा ओलीका साथै उपाध्यक्ष विष्णु पौडेल, महासचिव शंकर पोखरेललगायत नेताहरु कपिलवस्तु पुगेका थिए।
त्यहाँको पहाडी समुदायमा राम्रै जनसमर्थन रहेको एमालेले राजमार्गको उत्तर भागमा पहाडी समुदायको वर्चस्व भएका कारण विजयनगर गाउँपालिका अध्यक्ष र शिवराज नगरपालिकामा मेयर जितेको छ। तर, मधेसी समुदायमा एमाले कमजोर भएकाले आफ्नै उम्मेदवार नउठाएर हृदयेश त्रिपाठीका उम्मेदवार ईश्वर दयाल मिश्रलाई समर्थन गरेको थियो।
गएको निर्वाचनमा कांग्रेसका अभिषेकप्रताप साहसँग पराजित भएका गुप्ता एमाले प्रवेशपछि त्यहाँ संगठन मजबुत हुने आकलन एमालेको छ।
त्यसपछि पुस ८ गते ओलीले पर्साको जगरनाथ पुगेर गाउँपालिका अध्यक्ष जालिम मियाँसहित माओवादी केन्द्रका नेता-कार्यकर्तालाई पार्टी प्रवेश गराए।
पुस १७ गते बाँकेको नरैनापुरमा जसपाका केन्द्रीय सदस्य रामकुमार दीक्षितसहित उक्त पार्टीका स्थानीय नेता-कार्यकर्तालाई एमाले महासचिव शंकर पोखरेलले पार्टीमा प्रवेश गराएका थिए। त्यसअघि राजपाका पूर्वसहमहामन्त्री पशुपति दयाल मिश्र र केन्द्रीय सदस्य करिम खान एमालेमा प्रवेश गरेका थिए।
यसैगरी पुस १९ गते पूर्वमन्त्री एवं नेकपा (एकीकृत समाजवादी)का पोलिटव्यूरो सदस्य यदुवंश झा नेकपा (एमाले)मा प्रवेश गरे। एमाले विभाजनको समयमा एकीकृत समाजवादीतिर लागेका झालाई ओलीले मधेसको राजनीति मजबुत बनाउन एमालेमा भित्र्याएका हुन्।
गत पुस २३ गते जनता समाजवादी पार्टी (जसपा) का लुम्बिनी प्रदेश समिति सदस्य मञ्जित यादव (सोनु) एमाले मा प्रवेश गरे। एमालेको नवौं जिल्ला अधिवेशनका अवसरमा उनलाई उपाध्यक्ष विष्णु प्रसाद पौडेल, स्थायी कमिटी सदस्य घनश्याम भुसाल, रुपन्देही जिल्ला अध्यक्ष शिवराज सुवेदी लगायतले पार्टीमा प्रवेश गराएका थिए। यादव गत स्थानीय तह निर्वाचनमा रुपन्देहीको ओमसतिया गाउँपालिकाको अध्यक्ष पदमा तत्कालीन संघीय समाजवादी पार्टीबाट उम्मेदवार भएका थिए। तर, दोस्रो स्थानमै सीमित भएका थिए।
पुस २७ गते नै ओमसतिया गाउँपालिका वडा नम्बर ४ का वडाअध्यक्ष मसहुर आलम खान पनि एमालेमा प्रवेश गरे। उनी गत स्थानीय तहको निर्वाचनमा संघीय समाजवादी पार्टीबाट वडाध्यक्षमा निर्वाचित भएका थिए।
पार्टी प्रवेशमा जसपालाई निसाना बनाउने क्रममा गण्डकी प्रदेशमा एमालेले विशेष सफलता हासिल गरेको छ। जसपाका गण्डकी प्रदेश ईञ्जार्ज गणेशमान गुरुङ, केन्द्रीय सदस्य देवी सुवेदी र संविधानसभा सदस्य डिबी नेपालीसहितका नेता-कार्यकर्ता एमालेमा प्रवेश गरेका छन्। जसपाका ९ केन्द्रीय सदस्य, १३ जना प्रदेश पदाधिकारी तथा सदस्य, १२ जना जिल्ला सदस्यका र भातृ संगठनका ३ जना अध्यक्षसहित ४०० नेता/कार्यकर्ता नेकपा (एमाले) मा प्रवेश गरेका हुन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1786513116.png)
