काठमाडौं– नेकपा एकीकृत समाजवादीका अध्यक्ष माधवकुमार नेपालले तीनवटै तहका निर्वाचनमा पाँचदलीय गठबन्धन मिलेर नै चुनाव लड्ने बताएका छन्।
मंगलबार रामेछाप जिल्लाका विभिन्न पार्टीका युवालाई नेकपा एसमा प्रवेश गराउने कार्यक्रमलाई सम्बोधन गर्दै अध्यक्ष नेपालले संविधानमा भएको व्यवस्था अनुसार नै निर्वाचन हुने बताए।
‘अहिले निर्वाचनको कुरा भइरहेको छ। स्थानीय तहको निर्वाचन तीन चरणमा बैशाख, असार र असोजमा भएको थियो,’ उनले भने, ‘स्थानीय तहको अन्तिम परिणाम असोज ७ मा आएको थियो। त्यो नै अन्तिम मिति हुन्छ। यो अहिले बहसको विषय बनेको छ। संविधानमा पनि प्रष्ट रुपमा नै लेखेको छ।’
उनले गाउँ र नगर सभाको चुनाव सम्पन्न भएको ६ महिनाभित्र निर्वाचन गराइसक्नुपर्ने उल्लेख भएको प्रष्ट पारे। उनले पाँच दल मिलेर आउने असोज, कात्तिक र मंसिरसम्मा केन्द्र, प्रदेश र स्थानीय तहको चुनावमा जाने समेत बताए।
एमालेले सबैतिर वितण्डा मात्रै मच्चाइरहेको नेपालको आरोप छ। ‘उसलाई वितण्डा मात्रै मच्चाउन मन लाग्छ । किनभने त्यो सकारात्मक शक्ति नै होइन। नकारात्मक शक्ति हो। उसलाई बनाउनु छैन। बिर्गानु छ। निर्माण होइन ध्वसं गर्नुछ,’ उनले थपे, ‘संविधानको रक्षा गर्नु छैन। त्यसको मर्म र भावना समाप्त पार्नुछ। लोकतन्त्र सुदृढ होइन धुजाधुजा बनाउनु छ।’
नेपालले प्रतिपक्षबाट आशा गर्ने ठाउँ नरहेको भन्दै आफूहरुले भूमिका खेल्नुपर्ने बताए। ‘हामी लोकतन्त्र जोगाउन चाहन्छौं। संविधान जोगाउन चाहन्छौं। नेपाली जनतालाई सुखी बनाउन चाहन्छौं,’ उनले भने।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
