काठमाडौं- 'गौर नरसंहार' दोहोर्याउने भौतिक पूर्वाधार तथा यातायातमन्त्री रेणु यादवको विवादास्पद अभिव्यक्तिविरुद्ध कांग्रेस नेताहरुले आवाज उठाउन थालेका छन्। चौतर्फी दबाब सिर्जना भए पनि प्रधानमन्त्री एवं पार्टी सभापति शेरबहादुर देउवा भने अझै मौन छन्।
मन्त्री यादवको उक्त विवादास्पद अभिव्यक्तिविरुद्ध सत्ताको नेतृत्व गरिरहेको पार्टी कांग्रेसले आधिकारिक धारणा सार्वजनिक गरेको छैन। तर, कांग्रेस नेताहरुले भने उक्त अभिव्यक्तिविरुद्ध आफ्ना धारणा राख्न थालेका हुन्।
कांग्रेस महामन्त्री विश्वप्रकाश शर्माले मन्त्री यादवलाई पदमुक्त गर्नैपर्ने धारणा सार्वजनिक गरेका छन्। मन्त्री यादवले पदीय मर्यादाविपरीत हिंसा भड्काउने अभिव्यक्ति दिएको भन्दै महामन्त्री शर्माले प्रधानमन्त्री तथा कांग्रेस सभापति शेरबहादुर देउवासामू तीन विकल्प प्रस्तुत गरेका छन्।
कोरोना संक्रमण भएपछि आइसोलेसनमा बसेका महामन्त्री शर्माले ‘मन्त्रीको गैरजिम्मेवार अभिव्यक्ति उपचारः ३ विकल्प’ भन्दै सामाजिक सञ्जालमार्फत् पदीय मर्यादाविपरीत अभिव्यक्ति ठहर गर्दै प्रधानमन्त्रीद्वारा पदमुक्त गर्नुपर्ने सुझाव दिएका हुन्।
शर्माले तीनवटा सुझाव दिँदै यादवलाई राजीनामा दिन आग्रहसमेत गरेका छन्। शर्माले भनेका छन्, ‘स्वयं व्यक्तिद्वारा भूल स्वीकार र क्षमायाचना वा सम्बन्धित दलद्वारा पहलकदमी र राजीनामा वा पदीय मर्यादाविपरीत अभिव्यक्ति ठहर गर्दै प्रधानमन्त्रीद्वारा पदमुक्त गर्नुपर्छ।’
यस्तै शर्माले तीन उपचारका पछिल्तिर तीन कारणसमेत औंल्याएका छन्। राज्यको जिम्मेवारीमा बस्नेको अभिव्यक्ति र व्यवहार तुलनात्मक रूपले बढी जिम्मेवारी हुनुपर्ने उनले बताएका छन्।
कांग्रेसका अर्का नेता प्रदीप पौडेलको पनि मन्त्री यादवको अभिव्यक्ति राजनीतिक मर्यादाविपरीत रहेको ठहर छ। उनले सामाजिक सञ्जालमार्फत् भनेका छन्, 'फरक मत र विचार राख्ने अधिकार सबैलाई हुन्छ तर शैली मर्यादित हुनुपर्छ। हिंसालाई प्रोत्साहन दिने, द्वन्द्व निम्त्याउने अभिव्यक्ति सामाजिक र कानुनी रूपमा अपराध हुन्।'
अझ जिम्मेवार व्यक्तिबाट यस्ता अभिव्यक्ति आउनु पदीय मर्यादाविपरीत रहेको उनको भनाइ छ।
कांग्रेस केन्द्रीय सदस्य रामहरि खतिवडाले शान्तिपूर्ण विरोधमा उत्रिएका राजनीतिक दलका नेताहरूलाई अर्को 'गौर नरसंहार'गराएर हत्या गर्ने खुला धम्की दिएको भन्दै विरोध जनाएका छन्। उनले भनेका छन्, 'यो आपत्तिजनक छ, यो गम्भीर विषयमा मन्त्रीको सम्बन्धित दलले तुरुन्तै आफ्नो धारणा सार्वजनिक गरोस्। मुलुकमा अस्थिर ल्याउने अभिव्यक्ति बन्द गर।'
मन्त्री यादवले बुधबार रौतहट जिल्ला सदरमुकाममा आयोजित सार्वजनिक कार्यक्रममा जनमत पार्टीका अध्यक्ष डा सीके राउतको ज्यान लिने धम्की दिएकी थिइन्। उनले 'गौर नरसंहार'को उदाहरण दिँदै दोहोर्याउने धम्की दिएकी थिइन्। उनको उक्त अभिव्यक्तिको चौतर्फी आलोचना भइरहेको छ।
मन्त्री यादवको अभिव्यक्तिको आलोचना गर्दै उनलाई बर्खास्त गर्न प्रधानमन्त्री देउवामाथि दबाब सिर्जना भइरहेको छ। मन्त्री यादवको पार्टी सत्ता गठबन्धनको महत्त्वपूर्ण घटक जनता समाजवादी पार्टीले यसबारे कुनै धारणा सार्वजनिक गरेको छैन।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781922122.jpg)
-1764146706.png)
