राजनीति

निर्वाचन समितिमा यादवले दिएको उजुरी खारेज, विनोद चौधरीलाई केन्द्रीय सदस्यको मान्यता

नेपाल लाइभ मंगलबार, माघ ४, २०७८ १४:३३

काठमाडौं- नेपाली कांग्रेसको केन्द्रीय सदस्यमा मधेशी कोटाबाट निर्वाचित उद्योगी विनोद चौधरीको पद खारेजीको माग गर्दै केन्द्रीय निर्वाचन समितिमा परेको उजुरी खारेज भएको छ।

चौधरी विधान विपरीत केन्द्रीय सदस्य बनेको भन्दै उनको स्थानमा आफूलाई केन्द्रीय सदस्य बनाउन माग गर्दै सिरहा क्षेत्र नम्बर ३ का महासमिति सदस्य सुभाषचन्द्र यादवले समितिमा उजुरी दिएका थिए। तर, निर्वाचन समितिले यादवको उजुरी खारेज गर्दै चौधरीलाई नै केन्द्रीय सदस्यको मान्यता दिएको छ।

यो पनि पढ्नुहोस्

विनोद चौधरीको पद खारेजीको माग गर्दै उजुरीबिहीबार, पुस २२, २०७८

पुस पहिलो साता सम्पन्न कांग्रेसको १४औं महाधिवेशनका लागि नेपाली कांग्रेसको विधान, २०१७ (संशोधनसहित) ले केन्द्रीय पदाधिकारी तथा सदस्यहरुको लागि निश्चित मापदण्ड बनाएको भए पनि त्यस विपरीत चौधरी केन्द्रीय सदस्य बनेको भन्दै यादवले उजुरी दर्ता गराएका थिए।

यादवले निर्वाचन समितिमा दिएको उजुरीमा भनिएको थियो ,'मधेशी खुला ५ पदका लागि भएको प्रतिस्पर्धामा विधानको व्यवस्था विपरीत विनोद चौधरी निर्वाचित भएको भनिएकोले निजलाई उक्त केन्द्रीय सदस्य पदबाट हटाई निजको ठाउँमा म निवेदन निकटतम् प्रतिस्पर्धी डा सुभाषचन्द्र यादवको नाम समावेश गरी पाउन उजुरी निवेदन गर्दछु।'

पाँच जना विजयी हुने मधेशी तर्फको खुलामा यादव छैटौं स्थानमा आएका थिए।

यो पनि पढ्नुहोस्

योग्यता नपुगेका विनोद चौधरी, उमेश श्रेष्ठ, मोहन आचार्य र जीवन राना कसरी बने उम्मेदवार?शुक्रबार, पुस ३०, २०७८

यादवले कांग्रेस विधानमा १० वर्ष निरन्तर नेपाली कांग्रेसको क्रियाशील सदस्य भएको महाधिवेशन प्रतिनिधिबाट ४ महिलासहित ९ जना मधेशी केन्द्रीय सदस्य बन्न पाउने व्यवस्था रहेको निवेदनमा उल्लेख गरेका थिए।

उनले केन्द्रीय सदस्यमा निर्वाचित विनोद चौधरी नेपाली कांग्रेसमा निरन्तर १० वर्ष क्रियाशील नभएकाले उनी केन्द्रीय सदस्यमा उम्मेदवार नै हुन नपाउने स्पष्ट रहेको उल्लेख गरेका थिए।

चौधरी २०७४ सालमा नेकपा एमालेबाट कांग्रेसमा प्रवेश गरेका थिए।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society. http://nepallive.com

लेखकबाट थप

ब्रह्माण्ड किन बन्यो भन्ने प्रश्नको उत्तर खोज्न वैज्ञानिक प्रतिस्पर्धा

नागरिकमाथि गोली प्रहार गर्नु माओवादी हिंसाको चरम कायरता थियो : सिटौला

भिजिट भिसा प्रकरण : आरोप साँचो सावित भए मन्त्री पदमात्र होइन, राजनीति नै छोड्छुः गृहमन्त्री लेखक