नवलपुर- नवलपुरमा सञ्चालन भइरहेको राष्ट्रिय भेट्रान्स कप फुटबल प्रतियोगितामा आज तीन खेल भएका छन्। प्रतियोगितामा आयोजक रिटर्नी माइग्रेन्ट नेपाल नवलपुर, चितवन भेट्रान्स र कालभैरव भेट्रान्स विजयी भए।
पहिलो खेलमा आयोजक रिटर्नी माइग्रेन्टले अभिषेक चर्च रजहरलाई २-० गोलअन्तरले पराजित गर्यो। आयोजक टोलीको तर्फबाट थमन चौधरीले खेलको ५७औँ मिनेट र तेज रानाले ६०औँ मिनेटमा गोल गरेका थिए। खेलको म्यान अफ दि म्याच रिटर्नीका गोल रक्षक कृष्णबहादुर पौडेल घोषित भए।
दोस्रो खेलमा रुपन्देही भेट्रान्स क्लबविरुद्ध चितवन भेट्रान्स क्लबले ४-० गोल अन्तरले जित निकाल्यो। चितवनका तर्फबाट भूपेन्द्र कार्कीले एक, हर्कबहादुर गुरुङले दुई तथा वीरेन्द्र पाण्डेले एक गोल गरे। कार्कीले खेलको ३९औँ मिनेट, गुरुङले ५९ र ६२औँ मिनेट तथा पाण्डेले ६३औँ मिनेटमा गोल गरे। सो खेलमा हर्कबहादुर गुरुङ म्यान अफ दि म्याच घोषित भए।
तेस्रो खेलमा कालभैरव भेट्रान्स क्लब हेटौँडा ४-० गोल अन्तरले विजयी भयो। कालभैरवले नवलपुरको वल्डस्टार भेट्रान्स कावासोतीलाई पराजित गरेको हो। कालभैरवका तर्फबाट बेबिन श्रेष्ठले एक, देउमान लिम्बुले दुई तथा सोमकुमार श्रेष्ठले एक गोल गरे। श्रेष्ठले खेलको १९औँ, लिम्बूले २९ र ६०औँ तथा श्रेष्ठले ४८औँ मिनेटमा गोल गरे। सो खेलमा देउमान लिम्बू म्यान अफ दि म्याच घोषित भए।
प्रतियोगिता कावासोती-१७ स्थित सरस्वती माविको खेल मैदानमा भइरहेको छ। प्रतियोगितामा नवलपरासी (बर्दघाट-सुस्तापूर्व), नवलपरासी (बर्दघाट-सुस्तापश्चिम), चितवन, काठमाडौं, कास्की, मकवानपुर, सुर्खेत र पर्सा सहभागी छन्। विजेताले एक लाख रुपैयाँ तथा उपविजेताले ५१ हजार रुपैयाँ, ट्रफी, मेडल र प्रमाणपत्र प्राप्त गर्ने आयोजकले जनाएको छ। प्रतियोगिता पुस २४ गतेसम्म चल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749367495.jpg)
