साङ्केतिक तस्बिर
नयाँ दिल्ली- भारतमा गत २४ घण्टामा कोभिड-१९ बाट मृत्यु हुनेको सङ्ख्यामा तीव्र वृद्धि भएको छ। शनिबार एकै दिन थप दुई हजार ७९६ जनाको मृत्यु भएको केन्द्रीय स्वास्थ्य मन्त्रालयले आइतबार जारी गरेको आधिकारिक तथ्याङ्कले देखाएको छ।
विगत केही दिनयता दैनिक मृत्यु हुनेको सङ्ख्या ४०० को हाराहारीमा रहेको थियो। शनिबार एकै दिनमा दुई हजार ७९६ जनाको मृत्यु भएको तथ्याङ्कमा उल्लेख छ। यद्यपि, यो सङ्ख्या बिहारमा कोरोना सङ्क्रमणबाट मृत्यु भएका व्यक्तिको पुरानो सङ्ख्यालाई पनि मिलाइएको जानकारी दिइएको छ।
तर, शनिबार एकै दिन केरलामा कोरोना सङ्क्रमणका कारण २६३ जनाको मृत्यु भएको समाचारमा जनाइएको छ। आइतबार बिहानसम्म मुलुकमा कोरोनाबाट मृत्यु हुने व्यक्तिको कूल सङ्ख्या चार लाख ७३ हजार ३२६ पुगेको छ। भारतमा अहिले पनि ९९ हजार १५५ सक्रिय कोभिड-१९ सङ्क्रमित रहेका छन्। यो सङ्ख्या कूल सङ्क्रमतिको एक प्रतिशतभन्दा कम भएको समाचारमा जनाइएको छ। सक्रिय सङ्क्रमितको यो सङ्ख्या ०.२९ प्रतिशत रहेको जनाइएको छ।
गएको एक दिनमा छ हजार ९१८ जना कोरोनामुक्त भएका छन्। हालसम्म तीन करोड ४० लाख ६० हजार ७७४ जना कोरोना सङ्क्रमणबाट मुक्त भएका छन्। यो दर ९८.३५ रहेको समाचारमा जनाइएको छ।
यसैबीच, पछिल्लो २४ घण्टामा देशभर आठ हजार ८९५ नयाँ सङ्क्रमित थपिएसँगै आइतबार देशमा कोभिड-१९ सङ्क्रमितको सङ्ख्या तीन करोड ४६ लाख ३३ हजार २५५ पुगेको केन्द्रीय स्वास्थ्य मन्त्रालयको पछिल्लो तथ्याङ्कले देखाएको छ। भारतमा शनिबार एकै दिन १२ लाख २६ हजार ६४ जनाको कोरोना परीक्षण गरिएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772253460.png)
-1764146706.png)
