काठमाडौं– कानुन व्यवसायीहरुको छाता संगठन नेपाल बार एसोसिएसनले अस्पतालमा उपचाररत रहेको अवस्थामा प्रधानन्यायाधीश चोलेन्द्र शमशेर राणाले असंवैधानिक रुपमा अदालत चलाउन खोजेको आरोप लगाएको छ।
बारले एक विज्ञप्ति जारी गर्दै संविधानको धारा १२९(६) बमोजिम बिरामी भएको समयमा स्वतः वरिष्ठतम् न्यायाधीशले कायममुकायम भइ कार्य सञ्चालन गर्ने, गर्नुपर्ने व्यवस्थाको कार्यान्वयनमा राणाले अवरोध सिर्जना गरेको बताएको छ। अदालतमा उपस्थित हुन नसकेका व्यक्तिले नै आफैं प्रधानन्यायाधीश नै हुँ भनेर पेसी तोकेर असंवैधानिक कार्य गरेको बारले आरोप लगाएको छ।
कोरोना भाइरस संक्रमण पुष्टि भएपछि सशस्त्र प्रहरी अस्पतालमा उपचाररत राणाले मंगलबार अस्पतालबाटै पेसी तोकेका थिए। राणाले कसैलाई कायममुकायमको जिम्मेवारी दिएका छैनन्।
बुधबार भने सर्वोच्चका न्यायाधीशहरुले गोलाप्रथा प्रणालीअनुसार पेसी तोकेका थिए, तर मुद्दा भने हेरेनन्।
मंगलबार राणाले अस्पतालबाटै तोकेको पेसीलाई असंवैधानिक भनेको छ। ‘संविधानको व्याख्या, संरक्षण र रक्षा गर्नुपर्ने निकायका प्रमुखबाट यस किसिमको कार्य हुनु कुनै पनि अर्थमा उचित र युक्तियुक्त हुन सक्दैन,’ बारको विज्ञप्तिमा भनिएको छ, ‘तसर्थ प्रधानन्यायाधीशको रुपमा काम गर्न असमर्थ भइ सर्वोच्च अदालतमा उपस्थित समेत नभएको हुँदा नेपालको संविधानको धारा १२९ (६) को कार्यान्वयन र पालना गर्न गराउन सम्बन्धित सबैको गम्भीर ध्यानाकर्षण गराइन्छ।’
नेपालको संविधानको धारा १२९ (६) ले प्रधानन्यायाधीशको पद रिक्त भएमा वा कुनै कारणले प्रधानन्यायाधीश आफ्नो पदमा रही काम गर्न असमर्थ भएमा वा बिदा बसेको वा नेपाल बाहिर गएको कारणले प्रधानन्यायाधीश सर्वोच्च अदालतमा उपस्थित नहुने अवस्था भएमा सर्वोच्च अदालतको बरिष्ठतम् न्यायाधीशले कायममुकायम प्रधानन्यायाधीश भइ काम गर्ने भन्ने व्यवस्था छ। तर, राणाले संविधानको उक्त व्यवस्थाको उल्लंघन गरेको बारको आरोप छ।
कोरोना संक्रमण पुष्टि भएपछि प्रधानन्यायाधीश चोलेन्द्र राणा सोमबार (मंसिर १३ गते)साँझ देखि सशस्त्र प्रहरी अस्पताल बलम्बुमा भर्ना भइ उपचार गराइरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
