काठमाडौं- ७० वर्षदेखि प्रधानन्यायाधीशले तोक्दै आएको पेसी गोला प्रथाबाट तोकेर सुनुवाइ सुरु गर्ने तय भएपनि प्रधानन्यायाधीश चोलेन्द्र शमशेर राणाका कारण अवरुद्ध भएको छ। आज गोला प्रथाबाट पेसी तोकिएपनि न्यायाधीशहरु इजलासमा नबसि छलफलमा जुटेका हुन्।
कोरोना संक्रमण भएर शसस्त्र प्रहरीको अस्पताल भर्ना भएका प्रधानन्यायाधीश राणाले अस्पतालबाटै सर्वोच्च अदालत चलाउन खोजेको भन्दै सर्वोच्चका १८ न्यायाधीशले इजलासमा बसेर मुद्दा नहेरी सामूहिक छलफल थालेका छन्।
कोरोना संक्रमण भएपछि सोमबारबाट राणा अस्पतालको आइसोलेनमा रहेका छन्। राणाले उक्त दिनदेखि सर्वोच्चमा पेसी अस्पतालबाटै तोक्दै आएका थिए। अस्पतालबाट पेसी तोकेपछि मंगलबार केही न्यायाधीशहरुले मुख्य रजिष्ट्रार लालबहादुर कुँवरलाई ध्यानाकर्षण पनि गराएका थिए।
बिरामी हुदाँ वा विदेशमा हुँदा प्रधानन्यायाधीश पछिको व्यक्तिलाई कायम मुकायमको (कामु) जिम्मेवारी दिने गरिन्छ। तर, राणाले कुनै पनि दिन कामुको जिम्मेवारी अरुलाई नदिइ आफैं प्रधानन्यायाधीश भएको सन्देश दिने गरेका छन्। अरु न्यायाधीशहरुलाई देखाउने मनसाय राखेर राणा अघि बढेकाले आफूहरु सामूहिक छलफलमा रहेको एक न्यायाधीशले बताए।
बारले उठायो प्रश्न- को हो प्रधानन्यायाधीश?
नेपाल बार एसोसिएसनले राणाले अस्पतालबाटै अदालत चलाउन खोजेको भनेर केही दिनदेखि अन्य न्यायाधीशहरुलाई भन्दै आएको थियो। तर, आजबाट गोला लागू हुदाँ पनि उनले कामु नतोक्ने अनि अस्पतालबाटै अधिकार लिएपछि बार अध्यक्ष चण्डेश्वर श्रेष्ठले प्रधानन्यायाधीशको विषयमा अन्योलता भएकाले निराकरण हुनु पर्ने माग गरेका छन्।
'संविधानको धारा १२९ को (६) मा प्रधानन्यायाधीश कुनै कारणले आफ्नो पदको काम गर्न असमर्थ भएमा वा प्रधानन्यायाधीश सर्वोच्च अदालतमा उपस्थित नहुने अवस्था भएमा सर्वोच्च अदालतको वरिष्ठतम न्यायाधीशले कायम मुकायम प्रधानन्यायाधीश भइ काम गर्ने व्यवस्था छ। तर, प्रधानन्यायाधीश राणाले अस्पतालमा उपचाररत रहेको विषयमा सर्वोच्च अदालतमा आधिकारिक जानकारी नगरएर अदालतमा 'म नै प्रधानन्यायाधीश हो' भनेर पेलेका छन्, हामीलाई यो मान्य छैन' श्रेष्ठले भने।
न्यायाधीशहरुले गोलाप्रथाबाट इजलास गठन गरेर मुद्दा सुनुवाइ गर्न थालेपछि नेपाल बारका अध्यक्ष श्रेष्ठ र सर्वोच्च अदालत बार एसोसिएसनका अध्यक्ष पूर्णमान शाक्यले इजलासमा प्रवेश गरी प्रधानन्यायाधीशको अन्योलताको विषयमा प्रश्न उठाएका थिए। उनीहरुको प्रश्नपछि न्यायाधीशहरु सामूहिक छलफलमा जुटेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
