काठमाडौं– चुक्ता पुँजीको आधारमा सबैभन्दा अब्बल मानिएको ग्लोबल आईएमई बैंकले ११ वर्षमा आफ्ना लगानीकर्तालाई औसतमा १३ प्रतिशत लाभांश वितरण गरेको छ। बैंकले ११ वर्षको अवधिमा सबैभन्दा धेरै बोनस सेयर वितरण गरेको छ।
बैंकले ११ वर्षको अवधिमा औसत १३ प्रतिशत बोनस सेयर वितरण गरेको छ भने औसतमा ४ प्रतिशत नगद लाभांश वितरण गरेको छ। बैंकले सबैभन्दा धेरै लाभांश आर्थिक वर्ष २०७५/७६ मा बाँडेको छ।
यो आर्थिक वर्ष बैंकले आफ्ना लगानीकर्तालाई २५.५० प्रतिशत लाभांश बाँडेको थियो। बैंकले सबैभन्दा धेरै नगद लाभांश पनि यसै वर्ष वितरण गरेको थियो। आर्थिक वर्ष २०७५/७६ मा बैंकले १२.७५ प्रतिशत बोनस सेयर र कर प्रयोजनसहित १२.७५ प्रतिशत नै नगद लाभांश वितरण गरेको थियो।
उक्त वर्षभन्दा अन्य आर्थिक वर्षमा भने बैंकले लगानीकर्तालाई नगद लाभांश भन्दा बोनस सेयर धेरै दिएको छ। यस्तै, बैंकले आर्थिक वर्ष २०७०/७१ मा पनि आफ्ना लगानीकर्तालाई २५ प्रतिशत लाभांश वितरण गरेको थियो।
यस आर्थिक वर्ष बैंकले कर प्रयोजनसहित ४ प्रतिशत नगद र २१ प्रतिशत बोनस सेयर वितरण गरेको हो। बैंकले आर्थिक वर्ष २०७१/७२ मा लगानीकर्तालाई २३ प्रतिशत लाभांश वितरण गरेको थियो। यस आर्थिक वर्षमा बैंकले आफ्ना लगानीकर्तालाई बोनस सेयरमात्र वितरण गरेको थियो।
बैंकले आर्थिक वर्ष २०७३/७४ मा लगानीकर्तालाई २० प्रतिशत लाभांश वितरण गरेको थियो। यस वर्ष बैंकले कर प्रयोजनसहित १० प्रतिशत नगद र १० प्रतिशत बोनस सेयर वितरण गरेको थियो।
बैंकले आर्थिक वर्ष २०७६/७७ र आर्थिक वर्ष २०७४/७५ मा लगानीकर्तालाई १६ प्रतिशतको दरले लाभांश वितरण गरेको छ। आर्थिक वर्ष २०७६/७७ मा १४ प्रतिशत बोनस सेयर र कर प्रयोजनसहित २ प्रतिशत नगत लाभांश वितरण गरेको हो। यस्तै, आर्थिक वर्ष २०७४/७५ मा बैंकले १६ प्रतिशत नगद लाभांशमात्र वितरण गरेको छ।
आर्थिक वर्ष २०६९/७० मा बैंकले लगानीकर्तालाई १५ प्रतिशत लाभांश वितरण गरेको थियो। यस वर्ष बैंकले १५ प्रतिशत बोनसमात्रै वितरण गरेको थियो।
बैंकले सबैभन्दा थोरै लाभांश आर्थिक वर्ष २०६७/७८ मा बाँडेको छ। यस वर्ष बैंकले लगानीकर्तालाई १२.०२ प्रतिशतमात्र लाभांश वितरण गरेको थियो। यस वर्ष बैंकले लगानीकर्तालाई ६.६७ प्रतिशत बोनस सेयर र कर प्रयोजनसहित ५.३५ प्रतिशत नगद लाभांश वितरण गरेको थियो।
बैंकले आर्थिक वर्ष २०७७/७८ मा आफ्ना लगानीकर्तालाई १३.५० प्रतिशत लाभांश दिने घोषणा गरेको छ। यस वर्ष बैंकले आफ्ना लगानीकर्तालाई १० प्रतिशत बोनस सेयर, कर प्रयोजनसहित ३.५० प्रतिशत नगद लाभांश वितरण गर्न लागेको हो।
लाभांश पारित गर्न बैंकले मंसिर २७ गते साधारण सभा बोलाएको छ। सभा प्रयोजनका लागि बैंकले मंसिर ११ गते बुक क्लोज गर्दै छ। मंसिर १० गतेसम्म कायम रहने सेयरधनीले मात्र साधारण सभामा भाग लिन र लाभांश पाउन सक्नेछन्।
यस्तो छ वित्तीय अवस्था
चालु आर्थिक वर्षको पहिलो त्रैमाससम्म आइपुग्दा ग्लोबल आईएमई बैंकको खुद नाफा १ अर्ब ११ करोड २२ लाख २४ हजार रुपैयाँ छ। यस्तै, यस अवधिसम्म वितरणयोग्य नाफामा भने आकर्षक वृद्धि गर्न बैंक सफल भएको छ। समीक्षा अवधिसम्म बैंकको वितरणयोग्य नाफा ३ अर्ब ३५ करोड ८० लाख ११ हजार रुपैयाँ छ।
यता, खुद ब्याज २ अर्ब ३३ करोड ८९ लाख ७७ हजार रुपैयाँ छ। सञ्चालन नाफा १ अर्ब ५५ करोड ५६ लाख ३६ हजार रुपैयाँ पुगेको छ। समीक्षा अवधिसम्म बैंकको प्रतिसेयर आम्दानी २० रुपैयाँ ५७ पैसा छ। यस चालु आर्थिक वर्षको पहिलो त्रैमाससम्म बैंकको चुक्ता पुँजी २१ अर्ब ६३ करोड २५ लाख तीन हजार रुपैयाँ छ। यस अवधिसम्म बैंकको जगेडा कोषमा आठ अर्ब ९४ करोड रुपैयाँ रहेको छ।
बैंकले यस अवधिसम्म २ खर्ब ६९ अर्ब ४६ करोड रुपैयाँ निक्षेप संकलन गरेर एक खर्ब ६९ अर्ब ६८ करोड रुपैयाँ कर्जा लगानी गरेको छ। बैंकले समीक्षा अवधिसम्म आउँदा आफ्नो खराब कर्जा पनि घटाउन सफल भएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770455063.png)
-1764146706.png)
