गाउँ-गाउँमा प्रविधिको विस्तार गर्दै वालिङ नगरपालिका

सूचना-प्रविधि

रासस शुक्रबार, असोज २९, २०७८ २२:०७

वालिङ- स्मार्ट सिटीको अवधारणामा अगाडि बढ्दै गरेको स्याङ्जाको वालिङ नगरपालिकाले गाउँ-गाउँमा प्रविधिको विस्तारलाई जोड दिएको छ।

स्मार्ट सिटी निर्माणका लागि नगरले तयार पारेको १०६ वटा सूचकमध्ये ‘कनेक्टिभिटी’ एउटा सूचक रहेकाले सोहीअन्तर्गत नागरिकहरुमाझ प्रविधिको पहुँच विस्तार गर्ने लक्ष्यअनुसार कार्य भइरहेको नगरप्रमुख दीलिपप्रताप खाँणले जानकारी दिए। 'विश्व समुदायले आधुनिक प्रविधिहरुको उच्चतम प्रयोगबाटै नयाँ नयाँ आविष्कारहरु गर्दै अगाडि बढिरहेका छन्,' प्रमुख खाँणले भने, 'स्मार्ट सिटी निर्माणका लागि पनि नयाँ-नयाँ प्रविधिहरुको प्रयोगबाटै सेवा प्रवाह हुनु आवश्यक रहेको छ।'

नगरपालिकाका १४ वटा वडाहरुमध्ये पहिलो चरणमा नगरपालिका कार्यालय, वडा कार्यालय र नगरका १७ वटा स्वास्थ्य संस्थाहरुमा फाइबर इन्टरनेट विस्तार गरिसकेको प्रमुख खाँणले बताए। दोस्रो चरणमा नगरका सम्पूर्ण विद्यालयहरु, सरकारी संघ संस्था तथा कार्यालयहरु र तेस्रो चरणमा १४ वटै वडाका ३१० वटा गाउँ गाउँमा इन्टरनेटको सहज पहुँच पुर्‍याउने गरी काम भइरहेको छ।

'वडा कार्यालयहरु, सरकारी कार्यालयहरु, स्वास्थ्य संघ संस्थाहरु, विद्यालयहरुमा फाईबर इन्टरनेट जडान गरेर प्रविधिमैत्री सेवा उपलब्ध गराउने कार्य भइरहेको छ,' प्रमुख खाँणले भने, 'प्रविधिको प्रयोगमार्फत् कार्यालयहरुले सेवा उपलब्ध गराउने र सेवाग्राहीले विभिन्न एप्स तथा डिजिटलमाध्यमबाट सेवा शुल्क भुक्तानी गर्ने सफ्टवेयरको विकास गरेका छौं जसले सेवाग्राहीलाई सेवा लिन कार्यालयमा आइरहनुपर्ने झण्झट पनि हुँदैन।'

नगरका १४ वटै वडामा नेपाल टेलिकमको ‘फाइबर लिज लाइन कनेक्टिभिटी’ जडान गरिसकिएको छ भने वर्ल्डलिंक कम्पनीको लाइन पनि जडान गरिएको नगरपालिकाका सूचना प्रविधि शाखा प्रमुख इञ्जिनियर प्रकाश अर्यालले बताए। 'नगरभित्रका १७ वटा मावि तहका सामुदायिक विद्यालय, १७ वटा स्वास्थ्य संस्थाहरु र सरकारी संघ संस्था तथा कार्यालयहरुमा वर्ल्डलिंकको फाइबर इन्टरनेट जडान सम्पन्न भइसकेको छ,' इञ्जिनियर अर्यालले भने, 'अब ५६ वटा सामुदायिक आधारभूत विद्यालयहरुमा इन्टरनेट विस्तारका लागि काम भइरहेकाले तिहारलगत्तै सकिन्छ।' वर्ल्डलिङ्कले सबै कार्यालय तथा विद्यालयहरुमा १० एमबीपीएस क्षमताको इन्टरनेट दुई वर्षसम्म निःशुल्करुपमा उपलब्ध गराउने सम्झौता भएको उनले जानकारी दिए। स्मार्ट सिटीको अवधारणामा अगाडि बढ्दै गरेको नगरपालिकाले कागजी प्रक्रियाहरुलाई कम गर्दै विस्तारै ‘पेपरलेस’ पद्धतिमार्फत् सेवा लिन नागरिकहरुलाई अभिप्रेरित गर्न खोजेको छ।

डिजिटल पद्धतिमार्फत् नागरिकहरुलाई सेवा उपलब्ध गराउनका लागि जनप्रतिनिधि तथा कर्मचारीहरुलाई ‘विद्युतीय हाजिरी’ का लागि क्रिप्टो टोकनसमेत उपलब्ध गराइसकेको छ। वालिङका नागरिकलाई कार्यालयमा उपस्थित नभएरै पनि सेवा लिन पाउने र डिजिटल माध्यमबाटै भुक्तानी गर्न मिल्ने व्यवस्था मिलाएको छ। नगरपालिकाले प्रदान गर्ने सेवाका बारेमा नागरिकलाई जानकारी गराउनुकासाथै टोल टोलमा नि:शुल्क इन्टरनेट सेवा उपलब्ध गराउने नीति तथा कार्यक्रम अगाडि सारेको छ।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।