काठमाडौं- नेपाल धितोपत्र बोर्डका अध्यक्ष भीष्म ढुंगानाले कार्यालयका लागि जग्गा खरिदका क्रममा आर्थिक अनियमितता गरेको खुलेको छ।
उच्च अदालतका पूर्वन्यायाधीश अनन्तराज डुम्रेको संयोजकत्वमा गठित छानबिन समितिले जग्गा खरिदका क्रममा ढुंगानाले अनियमितता गरेको निष्कर्ष निकालेको हो। बोर्डको कार्यालयका लागि ढुंगानाले करिब ४६ करोड रूपैयाँ रकममा जग्गा खरिद गरेका थिए। जग्गा पास नहुँदै उक्त रकम बुझाइएको थियो। सात रोपनी जग्गाका लागि बोर्डले बुझाएको उक्त रकमसमेत फसेको छ। विवादित जग्गाका लागि ढुंगानाले रकम बुझाएका थिए।
जडीबुटी उत्पादन तथा प्रशोधन कम्पनीको नाममा काठमाडौंस्थित जडीबुटीमा रहेको जग्गा खरिद गरिएको थियो। सात रोपनी भनी खरिद गरिएको उक्त जग्गामा मनोहरा जग्गा एकीकरण आयोजनाले अधिग्रहण गर्दा जग्गाको क्षेत्रफल दुई रोपनी घटेको छ। बोर्डका लागि पाँच रोपनीमात्रै जग्गा कायम हुने भएपछि पास हुन सकेको छैन। जग्गा पास नहुँदै रकम भुक्तानी हुनुमा ढुंगानाले आर्थिक लाभ लिने नियत राखेको देखिएको छानबिन समितिले प्रतिवेदनमा उल्लेख गरेको छ। ‘सात रोपनी जग्गाका लागि पैसा बुझाइएको रहेछ। पास हुन नसक्ने विवादित जग्गाको लागि ढुंगानाले पैसा बुझाएका रहेछन्,’ अर्थ मन्त्रालय स्रोतले भन्यो, ‘एकीकरण आयोजनालाई जग्गा छोड्दा पाँच रोपनी पनि नपुग्ने रहेछ।’
ढुंगानाको उक्त निर्णयले बोर्डलाई दैनिक २३ हजार रूपैयाँ ब्याज भार परिरहेको स्रोतको भनाइ छ। उक्त जग्गा खरिदका कारण बोर्डलाई वार्षिक आठ करोड रूपैयाँभन्दा बढीको क्षति पुग्ने आकलन गरिएको छ।
सेयर बजारमा सूचीकृत ५१ कम्पनी जोखिमयुक्त रहेको सार्वजनिक गर्नेसम्बन्धमा गरेको अर्को निर्णयमा पनि ढुंगानाले आर्थिक अनियमितता गरेको खुलेको छ। सीमित व्यक्तिलाई लाभ गराउने गरी उनले ५१ कम्पनी जोखिमयुक्त रहेको सूची निकालेका थिए। ‘मिलेमतो गरेर उनी निकटका व्यक्तिले ती कम्पनीहरूको सेयर बिक्री गर्न लगाएपछि मात्रै नाम सार्वजनिक गरेको देखियो,’ छानबिन समितिले बुझाएको प्रतिवेदनमा उल्लिखित विषयबारे अर्थ मन्त्रालयका एक उच्च अधिकारीले भने।
चार दिनअघि बुझाइएको प्रतिवेदनमा जोखिमयुक्त कम्पनी भनी सूची निकाल्ने कार्य क्षेत्राधिकारभन्दा बाहिरको कार्य ढुंगानाले गरेको निष्कर्ष छ। निर्णयका लागि बोर्डका सदस्यको स्वीकृति नहुँदा–नहुँदै पनि उनले एकलौटी निर्णय गराएका थिए। जोखिमयुक्त निर्णय गराउने पूर्वतयारी गर्दा ढुंगानाले विभिन्न व्यक्तिसँग उठबस गरेको समेत खुलेको छ। ‘५१ कम्पनीलाई जोखिमयुक्त भनी सूचना निकाल्नुअघि ढुंगानाले होटलमा बसेर पैसाको डिल गरेको भिडियो क्लिप पनि बाहिर आएको छ,’ स्रोतको दाबी छ। ढुंगानाले पैसाको डिल गर्नका लागि काठमाडौंको प्रतिष्ठित होटलमा कोठा बुक गराएको स्रोतको भनाइ छ।
पछिल्लोपटक सर्वोत्तम सिमेन्टको सेयर खरिद प्रकरणमा मुछिएपछि उनले गरेका आर्थिक अनियमितताको शृंखला बाहिर आएको हो। नियामक निकायमा बसेका उनले छोरी रेबिकाको नाममा सर्वोत्तम सिमेन्टको सेयर खरिद गरेको खुलासा भएको थियो।
एकपछि अर्को आर्थिक अनियमिततामा ढुंगाना जोडिएपछि बोर्डको कर्मचारी युनियन कारबाहीको मागसहित विरोधमा उत्रेको थियो। नियामक निकायमा रहेका ढुंगानाले ऐनविपरीत कार्य गरेको ठहर गर्दै कारबाहीको माग गरिएको थियो।
अध्यक्षबाट निलम्बन गरी सरकारले छानबिन समिति बनाएको थियो। छानबिन समितिले १५ दिन लगाएर उनीमाथि छानबिन गरेको थियो। समितिले ढुंगानाले आर्थिक अनियमितता गरेको ठहरसहित कारबाही गर्न सरकारलाई सिफारिस गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
