काठमाडौं- नेकपा एमालेका उपमहासचिव विष्णु पौडेलले सर्वोच्च अदालतको गत फागुन २३ गतेको फैसलापछि पनि आफूहरूले नेकपालाई एकतावद्ध राख्न चाहेको तर यसमा प्रचण्ड तयार नभएको बताएका छन्। बुधबार बुटवलमा आयोजित भेलामा बोल्दै उनले प्रचण्डहरू दक्षिणपन्थि शक्तिको पछि लाग्न तयार भएको तर नेकपाको एकता जोगाउन तयार नभएको बताए।
'सर्वोच्चको गत फागुनको २३ गतेको फैसलापछि नेकपालाई एकतावद्ध राख्न चाहेका थियौं। प्रचण्डजीहरू त्यसका लागि तयार भएनन्। प्रचण्डजीहरू दक्षिणपन्थि शक्तिको पछि लाग्न तयार भए। कम्युनिस्ट पार्टी नेतृत्वको सरकार टिकाउन कम्युनिस्ट पार्टीलाई एकतावद्ध बनाउन तयार भएनन्', पौडेलले भने।
उनले एमालेले माओवादीसँग एकता गरेर कुनै गल्ती नगरेको पनि बताए। उनले प्रचण्ड अपारदर्शी र अधैर्य भएका कारण समस्या भएको बताए।
'केही समय कुर्न नसक्ने, जसरी पनि सत्तामा पुग्नुपर्ने जुन प्रकारको महत्त्वकांक्षा प्रदर्शित भयो। पार्टीलाई विभाजित गरेर भएपनि सत्तामा पुग्ने जुन प्रकारको माओवादी केन्द्रमा विकसित भयो। यसले हाम्रो पार्टीको जीवनमा समस्या उत्पन्न गर्दै थियो', उनले भने, 'त्यति मात्रै होइन एमालेभित्र लामो समय सरकारको नेतृत्व गरेका र पार्टीको नेतृत्व गरेका व्यक्तिहरुले महत्त्वकांक्षाले नयाँ चुनौति र समस्याहरु देखा परे।'
पोडेलले प्रचण्डलाई साथ लिएर माधवकुमार नेपालले पार्टी कब्जामा लिने कोसिस गरेको पनि आरोप लगाए।
'प्रधानमन्त्री भएर काम गरेको व्यक्ति कुनै नीतिमा मतभेद छैन। कुनै सिद्धान्तमा मतभेद छैन। कुनै विचारमा मतभेद छैन। केवल महत्त्वकांक्षा र निजी स्वार्थले गर्दा पार्टीको एकताका विरुद्ध प्रहार गर्ने काम भयो', पौडेलले थपे, 'एमालेका अध्यक्ष, संसदीय दलका नेता केपी ओलीलाई पार्टी अध्यक्षबाट मात्रै होइन साधारण सदस्यबाट समेत निष्कासन गरियो। महासचिवलाई साधरण सदस्य समेत नरहनेगरि निष्कासन गरियो।'
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
