काठमाडौं- शुक्रबारदेखि नेकपा एमाले परित्याग गरेर नेकपा एकीकृत समाजवादीको प्रदेश सभा सदस्यको मान्यता पाएपछि प्रदेशमा संसदीय दलको नेता चयन गर्ने क्रम सुरु भएको छ।
सातवटा प्रदेशमध्ये ६ प्रदेशमा मात्रै उपस्थिति जनाएको नेकपा एकीकृत समाजवादीले अहिलेसम्म तीनवटा प्रदेशमा संसदीय दलको नेता चयन गरिसकेको छ भने तीनवटा प्रदेशमा दलको नेता चयन हुन बाँकी छ।
संसदीय दल गठनपश्चात दलको नेता, उपनेता, प्रमुख सचेतक र सचेतकलाई थप सेवा सुविधा प्रदेशसभा सचिवालयले उपलब्ध गराउनुपर्ने छ। गण्डकी प्रदेशमा नेकपा एकीकृत समाजवादीको सांसद नै नभएकाले त्यहाँ उक्त दलको हैसियत रहने छैन।
प्रदेश १ को संसदीय दलको नेतामा केन्द्रीय सदस्यसमेत रहेका राजेन्द्रकुमार राई चयन भएका छन्। एमाले विभाजित भएर गठन भएको एकीकृत समाजवादीका प्रदेश १ मा १० जना सांसद् छन्। संसदीय दलको नेता चयन गरेपनि अन्य पदाधिकारी भने चयन भइनसकेको सांसद राजन राईले जानकारी दिए। ‘अन्य पदाधिकारी चयन भएका छैनन्,’उनले भने, ‘हामी त्यो पनि छिट्टै टुंगो लगाउछौं। सरकार निर्माणको काम पनि अब अघि बढ्छ।’
यस्तै, नेकपा (एकीकृत समाजवादी) पार्टीले प्रदेश २ को संसदीय दलको नेतामा शत्रुधन महतोलाई चयन गरेको छ। एकीकृत समाजवादीका सांसद अशोककुमार यादवले दलको नेतामा महतो सर्वसम्मत चयन भएको जानकारी दिए। उनका अनुसार प्रदेश निर्वाचन कार्यालयमा सनाखत गरेलगत्तै महतोलाई नेता बनाउने निर्णय एकीकृत समाजवादीले गरेको थियो।
सोमबार बसेको सांसद तथा केन्द्रीय सदस्यहरूको बैठकबाट समेत उक्त निर्णय पारित भएको यादवले बताए। दलको नेता चयन गरेको विषयमा प्रदेश सभा सचिवालयलाई पनि जानकारी गराइसकिएको छ। उनका अनुसार दलको प्रमुख सचेतक र सचेतक भने अझै चयन गर्न बाँकी रहेको छ। नेकपा (एमाले) एक हुँदा नै महतो संसदीय दलको नेता थिए। प्रदेश २ मा एमालेका २२ सांसद मध्ये १३ सांसदले एकीकृत समाजवादी रोजेका छन्।
एकीकृत समाजवादी बागमती प्रदेश संसदीय दलको नेतामा राजेन्द्र पाण्डे चयन भएका छन्। उक्त पार्टीको सोमबार बसेको प्रदेश संसदीय दलको बैठकले अन्य पदाधिकारीहरूको पनि टुंगो लगाएको छ। हेटौँडामा बसेको बैठकले दलको उपनेतामा कृष्णप्रसाद खनाललाई चयन गरेको छ। त्यस्तै, प्रमुख सचेतकमा मुनु सिग्देल, सचेतकमा बसुन्धरा हुमागाईंलाई सर्वसम्मतिले चयन भएका छन्।
बागमती प्रदेशमा सरकार बनाउन गठबन्धनमा सामेल भएका दलहरू नेकपा (माओवादी केन्द्र) र नेपाली कांग्रेसका नेताहरूसँग समन्वय गर्न दलका नेता राजेन्द्रप्रसाद पाण्डेलाई जिम्मा दिने निर्णय पनि गरिएको छ। नेकपा (एमाले) का ५६ जना प्रदेश सभा सदस्यमध्ये १३ जना प्रदेश सभा सदस्यहरूले नेकपा एकीकृत समाजवादी रोजेका छन्।
गण्डकी प्रदेश सभामा भने एकीकृत समाजवादी पार्टीको उपस्थित छैन। दल रोज्न दिइएको समयसम्म नेकपा एमाले परित्याग गरेर कुनै पनि सांसदले एकीकृत समाजवादी नरोजेपछि गण्डकीमा माधवकुमार नेपालले नेतृत्व गरेको एकीकृत समाजवादीको उपस्थिति हुन नसकेको हो।
लुम्बिनी प्रदेशमा पनि नेकपा एकीकृत समाजवादीको एकमात्र सांसद छन्। नेकपा एमाले परित्याग गरेर प्रदेश सांसद रमा घर्तीले नेकपा एस रोजेकी थिइन्। एकजना मात्रै भएकाले लुम्बिनीमा उनी स्वतः पार्टीको संसदीय दलको नेता चयन हुनेछिन्।
कर्णाली प्रदेश सभामा नेकपा एकीकृत समाजवादी पार्टीका तीनजना मात्रै सांसद रहेका छन्। त्यहाँ दलको नेताको जिम्मेवारी चन्द्रबहादुर शाहीले पाउने देखिएको छ। नेकपा एसका केन्द्रीय सदस्यसमेत रहेका शाहीले दलको नेता लगायत चयन हुन बाँकी रहेको जानकारी दिए।
‘पार्टीले दलको नेता कसलाई बनाउने भन्ने निर्णय गर्ला। म पनि हुन सक्छु अरु साथीहरू पनि हुन सक्नुहुन्छ,’ उनले भने। कर्णाली प्रदेशका मुख्यमन्त्री महेन्द्रबहादुर शाहीलाई विश्वासको मत दिने बेला फ्लोर क्रस गरेका तीनजना सांसदलाई यसअघि एमाले हुँदै कारबाही भइसकेकाले पनि त्यहाँ नेकपा एसमा अहिले तीनजना मात्रै सांसद रहेका छन्।
नेकपा एकीकृत समाजवादी पार्टीको सबैभन्दा ठूलो उपस्थिति रहेको सुदूरपश्चिम प्रदेश सभामा संसदीय दलको नेता लगायतका पदाधिकारी चयन भएका छैनन्। त्यहाँ नेकपा एस नै प्रदेश सभामा सबैभन्दा ठूलो दल बनेकाले पनि नेता चयनमा समय लाग्ने देखिएको छ।
‘दलको नेता, उपनेता, प्रमुख सचेतक र सचेतक बन्न धेरैले आकांक्षा देखाइरहनुभएकाले पनि समय लाग्ने देखिन्छ,’ नेकपा एसका एक सांसद भन्छन्, ‘पार्टीले पनि निर्णय गर्ला। त्यसै अनुसार टुंगिन्छ होला।’
सोमबार ज्येष्ठ सदस्य बलबहादुर स्वडारीको अध्यक्षतामा दलको बैठक बसेपनि नेता चयनको भने कुनै निर्णय हुन सकेन। प्रदेश सभा सदस्य प्रकाश रावलले आजको बैठकले विधान मस्यौदा समिति बनाएको जानकारी दिए। सांसदहरू दुर्गा विक, अमर साउँद र कुलबिर चौधरी रहेको समिति बनाइएको छ।
‘विधान मस्यौदा समितिले भोलि नै बस्ने दलको बैठकमा मस्यौदा पेश गर्छ,’ सांसद रावलले भने, ‘त्यसपछि दलको नेता चयन लगायतको काम हुन्छ।’
उनका अनुसार आजको दलको बैठकले नेकपा माओवादी केन्द्रको नेतृत्वमा रहेको सरकारलाई समर्थन दिने निर्णय पनि गरेको छ। सरकारमा एकीकृत समाजवादीमा लागेकै दुईजना मन्त्री रहेका छन्। सभामुखसहित २५ सदस्यीय रहेको नेकपा एमालेका १४ सांसदले एमाले परित्याग गरेर नेकपा एकीकृत समाजवादी रोजेपछि सातवटै प्रदेशमध्ये सुदूरपश्चिम प्रदेशसभामा पहिलो पार्टीका रुपमा स्थापित भएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
