काठमाडौं– नेकपा एमालेको विभाजनसँगै कतिपय नेताको परिवारसमेत विभाजित भएको छ। पार्टीसँगै परिवार विभाजन हुने सबैभन्दा उच्च तहका नेता उपाध्यक्ष युवराज ज्ञवाली र स्थायी कमिटी सदस्य सुरेन्द्र पाण्डे हुन्।
उपाध्यक्ष ज्ञवाली र उनका भाइ केन्द्रीय सदस्य रामकुमार ज्ञवाली माधवकुमार नेतासँग निकट थिए। उनीहरु एमाले अध्यक्ष केपी ओलीको चर्को आलोचक भनेर चिनिन्थे। अर्का भाइ तथा केन्द्रीय सदस्य लक्ष्मणराज ज्ञवाली भने पछिल्लो समय अध्यक्ष केपी शर्मा ओली निकट थिए।
एमाले विभाजन हुँदा उपाध्यक्ष युवराज ज्ञवालीले माधवकुमार नेपाललाई साथ दिएनन्। अन्तिम समयमा उनी ओलीतिर लागे। भाइ रामकुमार भने नेकपा (एकीकृत समाजवादी) तिर लागे। एमालेमै रहेका युवराजका छोरा विकास ज्ञवाली पनि एकीकृत समाजवादीतिर लागेका छन्। उनी युवा संघको सचिव हुन्।
लक्ष्मण लामो समयदेखि वामदेव गौतम खेमामा थिए। तर, पहिलो पटकको प्रतिनिधि सभा विघटनपछि उनी गौतमलाई छाडेर ओलीतिर लागे। उनी तत्कालीन नेकपाको ओली खेमाको ७ पुसको बैठकमा पहिलो पटक सहभागी भएका थिए।
त्यति बेला दाजु युवराजले उनलाई नेपाल समूहमा लाग्न दबाब दिएका थिए। त्यही कारण दुई दाजुभाइको सम्बन्ध बिग्रिएको थियो। युवराज पनि ओलीतिर ढल्किन थालेपछि दाजुसँग रामकुुमारको भेटघाट पातलिँदै गएको थियो। अन्तिम समयमा युवराजले आफूलाई पनि पार्टी नछाड्न आग्रह गरेको भाइ रामकुमारले बताए।
‘मलाई युवराज दाजुले ओलीतिरै बस्न अनुरोध गर्नु भएको थियो। मैले हुँदैन भन्दिएँ, त्यसपछि खासै बल गर्नु भएन’ नेपाल लाइभसँग रामकुमारले भने, ‘युवराज दाजु दाङमा राजनीति गर्नुहुन्छ, म कञ्चनपुरमा गर्छु। त्यहाँको वस्तुस्थिति उहाँलाई थाहा छैन।’ विचार र सिद्धान्तको राजनीति गर्नेलाई परिवार फरक पार्टीमा लागे पनि फरक नपर्ने उनी बताउँछन्। युवराज दाङ, रामकुमार कञ्चनपुर र लक्ष्मण बर्दियालाई कार्यक्षेत्र बनाएर राजनीतिमा सक्रिय छन्।
यसअघि २०५४ सालमा एमाले विभाजन हुँदा लक्ष्मणले वामदेव गौतमलाई साथ दिँदै नेकपा मालेमा आबद्ध भएका थिए। युवराज र रामकुमार एमालेमै थिए। अहिले युवराज र लक्ष्मण एमालेमा छन् भने रामकुमार नयाँ पार्टीतिर लागेका छन्।
सुरेन्द्र र राजेन्द्र पाण्डे पनि विभाजित
माधव नेपाललाई लामो समयदेखि साथ दिएका सुरेन्द्र पाण्डे एमालेका स्थायी कमिटी सदस्य र सहोदर दाजु राजेन्द्र पाण्डे पोलिट ब्युरो सदस्य थिए। अहिले सुरेन्द्रले माधव नेपालको साथ छाडेका छन्। राजेन्द्र भने एकीकृत समाजवादीतिर छन्। सुरेन्द्र चितवनबाट प्रत्यक्ष निर्वाचित प्रतिनिधि सभा सदस्य हुन्। राजेन्द्र भने धादिङबाट प्रदेश सभामा प्रत्यक्ष निर्वाचित सांसद हुन्।
शेरबहादुर देउवालाई प्रधानमन्त्री बनाउनु पर्ने भन्दै सर्वोच्च अदालतमा रिट दायरका लागि हस्ताक्षर बुझाउने विषयमा नै सुरेन्द्र र राजेन्द्रको मनमुटाव भएको थियो। त्यति बेला सुरेन्द्रले हस्ताक्षर गर्न आनाकानी गरेका थिए। पछि दाजु राजेन्द्रकै दबाबमा वारेसमार्फत हस्ताक्षर बुझाउन सहमत भएको उनी निकट एक नेता बताउँछन्।
अदालतमा हस्ताक्षर बुझाइसकेपछि समेत ओलीले नेपालपक्षका नेताहरुलाई हस्ताक्षर फिर्ता लिए एकता हुने बताएका थिए। त्यति बेला सुरेन्द्रले पार्टी एकताका लागि हस्ताक्षर फिर्ता गर्नुपर्ने लबिइङ गरेका थिए। उक्त विषयलाई लिएर पनि राजेन्द्र भाइ सुरेन्द्रसँग चिढिएका थिए।
पार्टी एकताका लागि दुवै पक्षबाट प्रतिनिधित्व गराएर बनाइएको १० सदस्यीय कार्यदलमा माधव नेपालका तर्फबाट सुरेन्द्र पाण्डे सहभागी थिए। त्यति बेला संवादमा सहभागी सुरेन्द्रमाथि राजेन्द्रले शंका गर्न थालेका थिए। नभन्दै ‘१० बुँदे सहमति कार्यान्वयन गर्न ओली सहमत भएको’ भन्दै सुरेन्द्र संस्थापनतिर पुगे। राजेन्द्र र सुरेन्द्र फरक पार्टीमा हुँदा परिवारमा समेत समस्या हुन सक्ने बताइएको छ।
वामदेवको अलमल
एमाले उपाध्यक्ष वामदेव गौतम कतै नखुलेर पार्टी एकता अभियानमै सक्रिय हुँदा परिवार भने अलमलमा परेको छ। गौतमकै कारण परिवारमा समेत लफडा भएको छ।
गौतम अलमलमा हुँदा पत्नी तुलसा थापा बुधबार हस्ताक्षर सनाखतका लागि निर्वाचन आयोग पुगिन्। गौतम निकट बलराम बाँसकोटा पनि निर्वाचन आयोग पुगे। तर, उनीहरुको हस्ताक्षरलाई आयोगले मान्यता दिएन।
यसअघि गौतमकै कारण निर्णय गर्न नसक्दा थापाले प्रस्तावित नयाँ पार्टीका लागि दिइएको निवेदनमा हस्ताक्षर गर्न पाएकी थिइनन्। आयोगले सनाखतका लागि निवेदन दिँदा हस्ताक्षर गर्ने केन्द्रीय सदस्य र सांसदलाई मात्रै मान्यता दिएको छ।
गौतमले पनि एमाले उपाध्यक्षबाट राजीनामा दिएर नेपाल नेतृत्वको पार्टीमा आबद्ध हुने आफू निकट नेताहरुलाई बताइसकेका छन्। नेता बलराम बास्कोटाले गौतम एकीकृत समाजवादी पार्टीमा आउने दाबी गरेका छन्। तर, निर्णय गर्न ढिला गर्दा गौतम परिवार प्राविधिक रुपमा एमालेमै बस्नु पर्ने भएको छ।
केन्द्रीय नेताका परिवार विभाजन भएजस्तै प्रदेश, जिल्ला र स्थायीय स्तरमा यो संख्या ठूलो हुने नेताहरु बताउँछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
