काठमाडौं- नेकपा एमाले विभाजन गर्दै माधवकुमार नेपालले आफ्नो नेतृत्वमा नेकपा एकीकृत समाजवादी दर्ताका लागि निर्वाचन आयोगमा निवेदन दिएका छन्। एमालेमा रहँदा नेता नेपालको पक्षमा रहेका स्थायी कमिटी र केन्द्रीय सदस्यहरुले नयाँ पार्टी गठनका समयमा उनलाई साथ दिएनन्।
नेता नेपाल छोडेका ५७ जना केन्द्रीय सदस्य र सांसदहरुले पार्टी अध्यक्ष केपी शर्मा ओलीले १० बुँदे सहमति कार्यान्वयन गरेर एमाले एक ढिक्का बनाउनु पर्ने भन्दै दबाब बढाएका छन्। यदी ओलीले सोमबार रातिसम्म १० बुँदे सहमति कार्यान्वयन नगरे एमालेमा विद्रोह गर्ने घोषणा गरीसकेका छन्। यसै विषयमा ओलीपक्षका स्थायी कमिटी सदस्य पृथ्वीसुब्बा गुरुङसँग पार्टी विवाद समाधानका विषयमा भइरहेका प्रयासहरुबारे नेपाल लाइभकर्मी वीरेन्द्र ओलीले कुराकानी गरेका छन्। गुरुङसँग गरिएको कुराकानीको सारसंक्षेप–
माधव नेपालपक्षले नयाँ पार्टी गठनगरी सक्नुभयो। नेपालपक्ष छाडेका नेताहरुले १० बुँदे सहमति कार्यान्वयन हुनुपर्छ भन्दै आउनु भएको छ, अध्यक्ष ओलीले किन कार्यान्वयन गर्न नमान्नु भएको हो?
माधव नेपालपक्षको समेत सहभागीतामा १० बुँदे सहमति गरियो। त्यसमा माधव कमरेडपक्षले आफ्नो कित्ता क्लियर गरी सक्नुभयो। यता रहेका माधवपक्ष भनिएका ५७ जना केन्द्रीय सदस्यको हकमा १० बुँदे कार्यान्वयन हुन सकेको छैन। त्यसमा पार्टीलाई जेठ २ गते फर्काउने त्यसपछि सहमति कार्यान्वयन गर्ने भनिरहेका छौं।
माधव नेपाल छोडेका नेताहरुलाई मिलाउने विषयमा बल कसको कोर्टमा छ?
उहाँहरुले १० बुँदे कार्यान्वन गर्नुपर्छ भन्ने विषय ठिक छ। यसरी बाहिर मोर्चाबन्दी बनाएर १० बुँदे कार्यान्वयन हुनुपर्छ भनिराख्ने होइन। पार्टीमा आउँनु पर्यो, त्यसमा बहस छलफल हुनुपर्यो। पार्टी अध्यक्षको परामर्शमा महासचिवले बैठक बोलाउनु पर्यो। पार्टी कमिटीमा त्यो विषयमा छलफल पछि निर्णय हुनुपर्यो। त्यही बैठकले नै कसरी सहमति गर्ने भन्ने विषयमा कार्यक्रम बनाउने हो। त्यो भन्दा अघि उहाँहरु(माधव छोडेका)ले अध्यक्षसँग अनौपचारिक भेटघाट गर्न खोज्नु भएको छ। त्यसपछि स्थायी कमिटी बैठक बसेर सल्टाउँछ होला।
सबैलाई मिलाउने अध्यक्षकै जिम्मा होइन र?
अध्यक्ष केपी कमरेडलाई मात्रै नभनौ। उहाँहरुले सहमति कार्यान्वयन हुनुपर्छ भन्नु भएको छ। दुबैपक्षबाट गरिएको १० बुँदे सहमति कार्यान्वयन गर्ने पार्टीले निर्णय समेतगरी सकेको छ। त्यस विषयमा केन्द्रीय कमिटीले निर्णयगरी सकेको छ।कार्यदलले सहमति गरेको केपी कमरेड र माधव कमरेडलाई पनि बुझाउनु भएको थियो। केपी कमरेडले स्वमित्व लिनुभयो। केन्द्रीय कमिटीबाट अनुमोदन गराउनुभयो। कार्यान्वयन गर्ने निर्णय गर्नुभयो। माधव कमरेड १० बुँदे कार्यन्वयन नगरेर छुट्टै पार्टी खोल्नुभयो। अब उहाँ(माधव छोडेका५७ जना)हरु बैठकमा आउँनुपर्यो, त्यसपछि के गर्ने भन्ने सहमति हुन्छ।
यदी माधव छाडेका ५७ जना पार्टी एकतामा आए उचित जिम्मेवारी दिइन्छ? फेरि एकतामा आएकालाई बिभेद गर्नुहुन्छ कि?
उचित जिम्मेवारी दिने/नदिने कुरा नगर्नुस्! त्यो प्रश्न नै होइन। पार्टी जेठ २ गते फर्किने भनिसकेपछि भीम रावल, युवराज ज्ञवाली र अष्टलक्ष्मी शाक्य उपाध्यक्ष हुनुहुने छ। घनश्याम भुसाल उपमहासचिव हुनुहुने छ। गोकर्ण विष्ट, भीम आचार्य र योगश भट्टराई सचिव नै हुनुहुने भयो। अरु जुन जुन जिम्मेवारीमा हुनुहुन्थ्यो त्यही जिम्मेवारीमा फर्किनुहुने छ। बाग्मतीमा धेरै पानी बगिसकेको छ। सहमति गर्न पार्टीलाई जेठ २ गते फर्काएर गर्ने हो। त्यसमा तलमाथि हुँदैन।
माधव नेपाल पार्टी फुटाएर गइसक्नुभयो। पार्टी दर्ता गर्न निर्वाचन आयोगमा निवेदन दिइसक्नु भएको छ। तत्काल उहाँ(माधव नेपाल)सँग मिल्ने च्याप्टर क्लोज भयो
तर, पार्टी अध्यक्षले नै ५७ जनालाई लक्षित गर्दै 'पिलो निचोरियो खिल बाँकी नै रहने भयो' भनेर भन्नु भएछ। यस्तो अवस्थामा कसरी विश्वास गर्न सकिएला र?
यो एक हप्ता अगाडि कुरा हो। मैले हिजो मात्रै अध्यक्ष कमरेडलाई भेटेको हुँ। तपाई लगायत दुनियाँले यस्तै यस्तै कुरा खोज्ने भएपछि उहाँलेपनि कहिलेकाहीँ यस्तै बोल्नुहुन्छ। यदी बोल्नु भएको हो भने गलत कुरा हो। तर, मलाई लग्छ यस्तो बोल्नु भएको छैन होला।
के तपाईहरु माधव छोडेका ५७ जना केन्द्रीय सदस्यहरुलाई मिलाउन सक्नेमा ढुक्क हुनुहुन्छ?
एकदम ढुक्क छु। सबैलाई मिलाइन्छ। एउटै पार्टीमा रहने वातावरण मिल्ने छ।
माधव नेपालपक्षलाई मिलाउन प्रयास गरिन्छ कि गरिँदैन?
माधव नेपाल पार्टी फुटाएर गइसक्नुभयो। पार्टी दर्ता गर्न निर्वाचन आयोगमा निवेदन दिइसक्नु भएको छ। तत्काल उहाँ(माधव नेपाल)सँग मिल्ने च्याप्टर क्लोज भयो। तर, उहाँले पार्टी गठनगरी सकेपनि १० बुँदे कार्यान्वयन हुने स्थिति भएमा उहाँको पार्टीमा २० प्रतिशतसमेत रहने स्थिति रहँदैन। त्यो बेला उहाँले सोच्नुहुन्छ होला। फेरि पार्टीमा एकताको ढोका कहिलै बन्द हुँदैन नि! जहिलै खुला नै हुन्छ। दुबै पक्षवीच सहमति भए जुनसुकै बेला एकता हुन सक्छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791196217.png)
-1791194094.png)
-1786602170.png)
-1791090469.jpeg)
