काठमाडौं- पूर्वअर्थमन्त्रीहरुले उत्पादनमूलक क्षेत्रमा लगानी केन्द्रित हुनेगरी मौद्रिक नीति ल्याउन नेपाल राष्ट्र बैंकलाई सुझाव दिएका छन्। प्रतिनिधि सभाअन्तर्गतको अर्थ समितिको शुक्रबारको बैठकमा बोल्दै पूर्वअर्थमन्त्रीहरु डा. बाबुराम भट्टराई, सुरेन्द्र पाण्डे र वर्षमान पुनले निर्यातमूलक उत्पादनशील क्षेत्रमा लगानी केन्द्रित हुने गरी मौद्रिक नीति ल्याउन सरकारसँग आग्रह गरेका हुन्।
पूर्वप्रधानमन्त्री एवम् जनता समाजवादी पार्टीका संघीय परिषद् अध्यक्षसमेत रहेका भट्टराईले कर्जाको अभावमा अघि बढ्न नसकेका ग्रामीण क्षेत्रमा लगानीको वातावरण हुनेगरी लगानी केन्द्रित नहुँदा बैंक मोटाउने तथा देश र जनता गरिब हुँदै जाने अवस्था आएको उल्लेख गर्दै त्यसको अन्त्य हुने गरी मौद्रिक नीति ल्याउनुपर्ने आवश्यकता औंल्याए। ‘खाली हामीले घरजग्गा किनबेचमा मात्रै कर्जा प्रवाह गर्यौं। यसले देश र जनता सधैँ गरिब भइरहने, बेरोजगार युवाहरु विदेश पलायन हुने अवस्था आयो। यसको अन्त्य गर्नका लागि ग्रामीण क्षेत्रमा लगानी केन्द्रित हुनेगरी मौद्रिक नीति आउनुपर्यो। अन्यथा देश र जनता सधैँ गरिव हुने र बैंकहरु मात्रै धनी हुने अवस्थाको अन्त्य हुन सक्दैन,’ उनले भने।
नेकपा (एमाले)का नेता एवम् पूर्वअर्थमन्त्री पाण्डेले निर्यातमूलक र उत्पादनमूलक क्षेत्रमा लगानी गरी रोजगारी सिर्जना हुने क्षेत्रमा लगानी केन्द्रित हुनेगरी मौद्रिक नीति ल्याउनुपर्ने स्पष्ट पारे। उनले अनुचित खर्च कटौती गर्न, घर र सवारीमा गरिएको कर्जा प्रवाह कम गर्दै लैजाने गरी मौद्रिक नीति ल्याउन पनि राष्ट्र बैंकको ध्यानाकर्षण गराए। पूर्वअर्थमन्त्री पाण्डेले भने, ‘निर्यातमूलक र उत्पादनमूलक क्षेत्रमा लगानी केन्द्रित गरौं। अनुचित खर्च घटाऔं। यसैले सम्बोधन हुनेगरी राष्ट्र बैंकले मौद्रिक नीति ल्याउनुपर्दछ।’
नेकपा (माओवादी केन्द्र)का नेता एवम् पूर्वअर्थमन्त्री पुनले उद्यमशीलताको क्षेत्रमा लगानी केन्द्रित हुनेगरी मौद्रिक नीति ल्याउनुपर्ने बताए। उनले शैक्षिक प्रमाणपत्रको आधारमा कर्जा प्रवाह गर्ने व्यवस्थालाई सहजीकरण गरेर मुलुकलाई आर्थिक रुपले सवल बनाउनेगरी अघि बढन राष्ट्र बैंकलाई आग्रह गरे। ‘धनीलाई सस्तो ब्याजदरमा कर्जा दिने तर गरिबलाई नदिने परिपाटीको अन्त्य नभएसम्म मुलुक समृद्ध हुन सक्दैन,’ पूर्वअर्थमन्त्री पुनले भने।
बैठकमा समितिका सदस्यहरुले बैंकहरु मोटाउने तथा जनता र देश गरिब हुने खालको बिडम्बनापूर्ण अवस्थाको अन्त्य हुने गरी नीतिगत र संरचनागत व्यवस्था गर्न सरकारको ध्यानाकर्षण गराएका छन्। उनीहरुले ग्रामीण क्षेत्रमा लगानीको वातावरण बनाउनेगरी मौद्रिक नीति ल्याउनुपर्ने पनि जोड दिएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
