काठमाडाैं- बिमा समितिको नयाँ सर्भर र सफ्टवेयर सञ्चालनमा आएको छ। शुक्रबार एक कार्यक्रमबीच समितिका अध्यक्ष सूर्यप्रसाद सिलवालले नयाँ सर्भर र सफ्टवेयरको उद्घाटन गरेका हुन्।
कार्यक्रममा बोल्दै अध्यक्ष सिलवालले परिवर्तित समयसँगै परिवर्तन हुन सक्नुपर्ने बताए। 'प्रविधिलाई प्रयोग गर्दै इन्टरफेसलाई खटाउनुपर्छ भन्ने हाम्रो मान्यतालाई आत्मसात गर्दै यो चरणमा आइपुगेका हौँ,' उनले भने, 'यो अन्त्य होइन, प्रारम्भ हो, हामीले संसारमा आएका धेरै टेक्नोलोजीलाई अवलम्बन गर्नैपर्छ।' भाैतिक इन्टरफेसलाई जति घटाउन सक्यो त्यति सशक्त हुँदै जाने बताउँदै अध्यक्ष सिलवालले यसबाट समयको वचतसँगै इमान्दार व्यावसायिक प्रयास भएको बताए।
समितिका कार्यकारी निर्देशक राजुरमण पौडेलले बिमा कम्पनीसँग पटक-पटक विवरण माग्नुपर्ने र सही विवरण आउन नसक्ने भएकोले सही विवरण दिने प्रयत्नले नयाँ सफ्टवेयर र सर्भर ल्याएको बताए। 'अब कुन कम्पनीको अवस्था कस्तो छ भनेर हेर्न सहज भएको छ,' निर्देशक पौडेलले भने, 'बिमा कम्पनीसँग अब चाँडै जोडिएर यो सफ्टवेयरलाई धेरैभन्दा धेरै चलायमान बनाउनेछौँ।'
बीमकहरुबाट समितिलाई पठाउनुपर्ने महत्त्वपूर्ण तथ्यांकहरु उपलब्ध गराउने कार्यमा कठिनाइ भएकोले समग्र बिमा व्यवसायको तथ्यांक व्यवस्थापन गर्न र समितिमा सेवा लिन आउने सेवाग्राही तथा सरोकारवालाहरुलाई काम छिटो, छरितो रुपमा सम्पन्न गर्न सूचना प्रविधिको प्रयोग गरी समितिको संस्थागत तथा बिमा व्यवसायसँग सम्बद्ध बिमा नियमनकारी व्यवस्थापन सूचना प्रणालीलाई थप व्यवस्थित गर्न नयाँ सर्भर र सफ्टवेयर जडान गरिएको समितिले जनाएको छ। समितिमा अब कम्पनीहरुले आफ्ना वित्तीय विवरण लगायतका अन्य प्रतिवेदन कागजी प्रक्रियामा नभइ सफ्टवेयरबाट नै अनलाइन माध्यमबाट दैनिक, मासिक, त्रैमासिक, वार्षिक रुपमा पेस गर्न सक्ने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
