काठमाडौं– बाढीले क्षति गराएको मेलम्ची खानेपानी आयोजनाको हेड बक्स तथा पुग्ने बाटो मर्मतका लागि विभिन्न तयारी गरिएको छ। प्राविधिकसहितको टोलीले क्षतिग्रस्त ठाउँको निरीक्षण गर्दै हेड बक्ससम्म पुग्नको लागि आवश्यक सडक खोल्ने तयारी अगाडि बढाएको हो।
खानेपानी आयोजनाको महानिर्देशकसहित परामर्शदाताको टोली क्षतिग्रस्त क्षेत्रको अवलोकनमा गएको खानेपानी विकास समितिले जनाएको छ। टोली केही दिनदेखि आयोजना क्षेत्रमै रहेको र बाटो नखोलेसम्म काम अगाडि नबढ्ने भएकाले त्यसको लागि निरीक्षणको काम भइरहेको जनाइएको छ।
साथै, बाटो कसरी सुचारु गर्ने भन्ने विषयमा पनि स्थानीय बासिन्दासँग छलफल भइरहेको छ। तिम्बुदेखि हेडबक्ससम्म पुग्न नयाँ बाटो खोल्ने तयारी गरिएको छ।
केही दिनदेखि मेलम्ची खानेपानी आयोजनाका कार्यकारी निर्देशक सहित इन्जिनियरको टोली मेलम्चीमा बसेर आयोजनाको काम अगाडि बढाउने तयारी गरेको छ। जोखिम कायमै रहेकाले आयोजनालाई हुन सक्ने क्षति थप कम गर्न विभिन्न उपायबारे अध्ययन भएको आयोजनाको भनाइ छ।
यसैगरी, आवश्यक पर्ने सडक र पुल बनाउन सडक विभाग र नेपाली सेनासँग पनि समन्वय गर्नका लागि छलफल अगाडि बढेको छ। मेलम्चीको बाढीले पुरिदिएको हेडबक्स मर्मत गर्न आवश्यक सामाग्री लैजान सडक र पुलको आवश्यकता पर्ने भएकाले चाँडो काम गर्ने उद्देश्यले नेपाली सेना र सडक विभागसँग कुराकानी भएको मेलम्ची खानेपानी विकास समितिले जानकारी दिएको छ।
बाटो र पुल नबनेको अवस्थासम्म आयोजनालाई चाहिने उपकरण, सामान लैजान नसकिने भएकाले बाटो खोल्न विभिन्न उपाय अपनाइएको छ। पानी ल्याउनको लागि अम्बाथानको टनेल भरिएको बालुवा सफा गर्नुपर्ने हुन्छ । भरिएको बालुवा सफा गरेको अवस्थामा भदौ, असोज महिनाको अन्तिमसम्म सुरुङमा पानी हाल्न सकिने आयोजनाको भनाइ छ।
बाढीले आयोजना स्थलसम्म पुग्ने प्रवेश मार्ग, आयोजनाको बाँध, अडिट सुरुङ, हेडवर्क, पुल तथा मुहानको संरचनामा क्षति पुर्याएको छ। बाटो बनेपछि सामान राख्ने ठाउँसँगै मानिस बस्ने संरचनासमेत बनाउनुपर्ने हुन्छ।
हेडबक्ससम्म पुग्न पाँच वटा पुलको आवश्यकता पर्छ भने करिव पाँच किलो मिटर बाढीले पुरिदिएको सडक खोल्नुपर्ने तत्कालको लागि आवश्यक छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1769166231.png)
-1769158577.png)
-1769161919.png)
-1764146706.png)
