काठमाडौं- विवेकशील नेपाली दलको संस्थापक अध्यक्ष तथा विवेकशील साझा पार्टीका पूर्व संयोजक उज्ज्वल थापाको परिवारले व्यवसायी दुर्गा प्रसाईँले उपचारका लागि गर्ने भनेको सहयोग आवश्यक नपर्ने जनाएको छ।
बिएन्डसी अस्पतालका सञ्चालक प्रसाईंले थापाको उपचार खर्च आफूले व्यहोर्ने भन्दै विज्ञप्ति जारी गरेका थिए तर थापाको परिवारले भने प्रसाईंलाई सद्भावको लागि धन्यवाद ज्ञापन गर्दै उनले दिने भनेको सहयोग आवश्यक नपर्ने जनाएको छ।
उज्ज्वल थापाको परिवार, साथी र शुभेच्छुकहरूको तर्फबाट जारी गरिएको थापाको स्वास्थ्य स्थितिको बारेको जानकारीमा भनिएको छ, 'सहयोग संकलनको क्रममा उज्ज्वल थापाको उपचार खर्च आफूले व्यहोर्ने भनी श्री दुर्गा प्रसाईंले भन्नुभएको भन्ने सञ्चार माध्यममा प्रकासन/प्रसारण भएको खबर हाम्रो जानकारीमा आएको छ। हाल उज्ज्वल थापाको परिवार, आफन्तजन, साथी तथा शुभेच्छुकहरूबाट प्राप्त सहयोगले नै स्वास्थ्य उपचारको खर्च व्यहोरिरहेको र भविष्यमा पनि त्यसै गर्ने भएकोले श्री दुर्गा प्रसाईंलाई सद्भावको लागि धन्यवाद ज्ञापन गर्दै उहाँले दिने भनेको सहयोग आवश्यक नपर्ने व्यहोरा जानकारी गराउँदछौँ।'
केही दिनदेखि भेन्टिलेटरमा उपचाररत थापालाई इसिएमओ प्रविधिबाट उपचार गराउनका लागि आर्थिक सहयोग संकलन थालिएको थियो। शनिबार थापाको परिवारले दिएको जानकारी अनुसार हालसम्म गोफन्डमीमा खोलिएको खातामा अमेरिकी डलर २२,२९१(शनिबारको विनिमय दर अनुसार करिब २५ लाख ९० हजार) र नेपालमा बैंक खातामा करिब रु २६,५०,००० जम्मा भएको छ। जस अनुसार उनको उपचारमा अहिलेसम्म करिब ५२ लाख ४० हजार रुपैयाँ संकलन भएको छ।
थापा कोरोना भाइरसको संक्रमण भएपछि ह्याम्स अस्पताल भर्ना भएका थिए। ह्याम्सले ग्राण्डी अस्पताल रेफर गरेपनि इसिएमओ प्रविधिबाट उपचार गर्नुपर्ने भएपछि मेडिसिटी लगिएको हो। मेडिसिटी अस्पतालका अस्पतालका आकस्मिक विभागका चिकित्सकहरु डा विजय चौधरी, डा सञ्जय कार्की, पारामेडिक्सहरु रमेश न्यौपाने र बालिगंग शाहीको टोलीले थापालाई मेसिसिटी ल्याएको हो।
सहयोगका लागि विदेशमा हुने गोफन्डमी र नेपालमा हुनेले आलोक सुवेदीको कुमारी बैंक मैतिदेवी शाखाको खाता नम्बर १९४०१०५०६५४००००१ मा वा खल्ति ९८१०२७६४७३ मा वा इसेवा ९८१०२७६४७३ सहयोग गर्न आग्रह गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1751793737.png)
-1749826086.png)
