काठमाडाैं- राष्ट्रिय मानव अधिकार आयोगले भेरी अस्पतालमा काेराेना संक्रमितको उपचारमा खटिएका स्वास्थ्यकर्मीमाथि भएको कुटपिटको घटनामा संलग्नलाई तत्काल कानुनी कारवाहीको दायरामा ल्याउन माग गरेको छ।
आयोगले एक विज्ञप्ती जारी गर्दै घटनाबारे आयोगको लुम्बिनी प्रदेश शाखा कार्यालय, नेपालगञ्जले शुक्रबार नै स्थलगत अनुगमन गरेको र चिकित्सकमाथि भएको आक्रमण दुखद् भएको बताएको छ।
बाँकेको भेरी अस्पतालमा उपचाररत एक संक्रमितको मृत्यु भएको भन्दै मृतकका आफन्तले बिहिबार साँझ स्वास्थ्यकर्मीमाथि कुटपिट गर्नुका साथै अस्पतालको कोभिड उपचार कक्षमा तोडफोड गरेका थिए।
'चिकित्सक तथा नर्समाथि आक्रमण गरेको अनुगमनका क्रममा पाइएको छ। साथै, आफूमाथि आक्रमण भएपछि ४ जना स्वास्थ्यकर्मीले एक तलामाथिबाट हाम फालेको अनुगमनको क्रममा पाइएको छ,' आयोगका प्रवक्तासमेत रहेका सहसचिव डा टीकाराम पोखरेलले जारी गरेको विज्ञप्तीमा उल्लेख छ।
स्वास्थ्यकर्मी सुरक्षाको पूर्ण प्रत्याभूति नहुँदासम्म काममा नफर्कने भन्दै घटनाको विरोध गरिरहेको पाइएको आयोगले जनाएको छ।
'कोभिड–१९ को महामारीमा अग्रपंक्तिमा रही अहोरात्र खटिएका स्वास्थ्यकर्मीमाथि भएका यस प्रकारका कुटपिट तथा अस्पताल तोडफोडका घटनाले अहिलेको संकटको अवस्थामा उच्च मनोबलका साथ कार्य गर्नुपर्ने स्वास्थ्यकर्मीको मनोबल र प्रतिष्ठामा नकरात्मक असर पर्ने आयोगको ठहर छ,' विज्ञप्तिमा भनिएकाे छ।
घटनाको शीघ्र र प्रभावकारी अनुसन्धान गरी दोषीलाई कानूनी दायरामा ल्याउन, यस प्रकारको कार्यको पुनरावृत्ति हुन नदिने कुराको सुनिश्चितता गर्न सरकारको ध्यानाकर्षण गराएको छ।
महामारीको यस संकटपूर्ण अवस्थामा स्वास्थ्य जस्तो अत्यावश्यकीय सेवालाई कुनै पनि तवरले अवरोध हुने अवस्था सिर्जना हुन नदिन आयोगले सरकारलाई ध्यानाकर्षण गराएको छ।
स्वास्थ्य जस्तो अति संवेदनशील सेवालाई अवरुद्ध नगरी वार्ता र संवादको माध्यमबाटै समस्याको समाधान गर्न पनि आयोगले सबै पक्षलाई आग्रह गरेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
