काठमाडौं– नेपालगञ्जको भेरी अस्पतालले बिहीबार राति चिकित्सक र नर्समाथि भएको घटनाबारे विस्तृतमा जानकारी गराएको छ।
अस्पतालका अनुसार जेठ ४ गते दाङका ५२ वर्षीय पुरुषलाई भेरी अस्पतालको कोभिड वार्डमा भर्ना गरिएको थियो। भर्ना गरिएपछि उनलाई विभिन्न तरिकाले उपचार गरिएको भएपनि त्यसमा उल्लेखनीय सुधार आउन नसकेपछि उनको मृत्यु भएको अस्पतालले जनाएको छ। स्वास्थ्यमा सुधार आउन नसकेको र हरसम्भव प्रयास गरिरहेको परिवारका सदस्यहरुलाई पनि जानकारी गराइएको अस्पतालले जनाएको छ।
तर, बिरामीका आफन्तले स्वास्थ्यकर्मीलाई उपचार जारी रहँदाको समयदेखि नै धम्की दिने गरेको अस्पतालले जनाएको छ। ‘‘बिरामी पक्षले बेलाबेलामा ‘मेरो बिरामीलाई केही भएमा सबलाई चड्कन लाउँछु, अस्पतालका एक–एकलाई गिँड्छु’ भन्दै स्वास्थ्यकर्मीहरूलाई त्रस्त पारेको’’ अस्पतालले जनाएको छ।
जेठ ४ गते दाङबाट ल्याइएका बिरामीलाई सुरुका केही दिन 'फेस मास्क' लगाइएको भएपनि सहज नभएपछि रिजर्भर व्यागसहित अक्सिजन मास्क लगाएर बेन सर्किटमा राखि कोभिड वार्डको बी ब्लकमा उपचार थालिएको अस्पतालले जनाएको छ।
बेन सर्किटमा राख्दा पनि स्वासप्रस्वासमा समस्या रहेपछि उनको सुक्ष्म निगरानीमा राखि उपचार थालिएको र जेठ ११ गते कोभिड आइसीयू ब्लक ए को बेड नम्बर १३ मा सिफ्ट गरिएको अस्पतालले जनाएको छ।
आइसीयूमा सीपीएपीमा रहँदा पनि साँझ ७ बजेतिर अक्सिजनको मात्रा घटेपछि ड्युटीमा रहेका नर्सले सीपीएपीलाई भेन्टिलेटरमा जोडेर बिरामी बचाउन हरसम्भव प्रयास गरेको अस्पतालले जनाएको छ।
बिरामीको श्वास फेर्ने शक्ति क्षीण भएकोमा मेसिनले श्वास पम्प गर्दा ‘सेचुरेसन’ बढ्ला कि भन्ने असल मनसाय र प्रमाणित उपाय अनुसार नै यस्तो निर्णय गरिएको अस्पतालले जनाएको छ।
घटनाको गाम्भिर्य महसुस गरि ड्युटीमा खटिएका नर्सहरुले बाहिर रहेका सुरक्षाकर्मीलाई समेत सचेत गराएका थिए। तर, प्रयासका बाबजुद बिरामीको अवस्थामा सुधार नहुँदा राति ८ बजेर ३८ मिनेटमा बिरामीको मृत्यु भएको अस्पतालले जनाएको छ।
बिरामीको मृत्यु भएपश्चात उनका भाइ, छोरा लगायत उत्तेजित भिडले उपचारमा संलग्न डाक्टर तथा नर्समाथि आक्रमण प्रयास गरेको अस्पतालले जनाएको छ।
त्यसक्रममा नर्सको घाँटी थिचेको र टाउँकोमा प्रहार गर्न खोजेको तर नजिकै बेडका बिरामीका कुरुवाले रोकेको अस्पतालले जनाएको छ।
स्वास्थ्यकर्मीहरू भिडबाट बच्न नजिकैको कोठामा लुक्दा थप व्यक्तिहरूसमेत आइ ढोका, कुर्सी तोडफोड गरेको अस्पतालले जनाएको छ। त्यसपछि ज्यान जोगाउनका लागि चिकित्सक तथा नर्स सोहि कोठाको झ्यालबाट हाम फाल्नु परेको अस्पतालले जनाएको छ।
आइसीयूमा बाहिरबाट अराजक मानिसहरु घुसपैठ गरि अन्य बिरामीको उपचारमा समेत बाधा पर्दा उपचाररत दुई जनाको मृत्यु भएको अस्पतालको भनाइ छ।
'बेड नम्बर ए७ र बी४९ मा स्वास्थ्यकर्मीकै अभिभावकको उपचार भइरहेको थियो उहाँहरुको क्रमश ९ बजेर १५ मिनेट र १२ बजे मृत्यु भयो', अस्पतालले भनेको छ।
चिकित्सक र नर्समाथि आक्रमण भएको केहि समयमा अस्पतालका थप स्वास्थ्यकर्मी र सुरक्षाकर्मी आएपछि अवस्था नियन्त्रणमा आएको अस्पतालले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
