काठमाडौं– राष्ट्रपति विद्यादेवी भण्डारीले भेरी अस्पतालका डाक्टर र नर्समाथि भएको दुर्व्यवहारप्रति खेदप्रकट गरेकी छिन्।
शुक्रबार समाजिक सञ्जाल ट्वीटरमार्फत राष्ट्रपति भण्डारीले आफ्नो र परिवारको जीवन जोखिममा राखेर कोभिड–१९ का बिरामीको उपचारमा संलग्न भेरी अस्पतालका चिकित्सक तथा नर्सप्रति दुव्र्यवहार हुनु खेदजनक रहेको बताएकी हुन्।
दुःख परेका बेला भावनात्मक उत्तेजना हुन सक्ने भन्दै राष्ट्रपति भण्डारीले विषम परिस्थितिमा संयम र धर्यता अपनाउँदै महामारीलाई परास्त गर्नु सबैको साझा दायित्व भएको उल्लेख गरेकी छिन्।
राष्ट्रपति भण्डारीको सामाजिक सञ्जालमा लेखिएको छ, ‘आफ्नो र परिवारको जीवन जोखिममा राखेर कोभिड–१९ का बिरामीको उपचारमा संलग्न भेरी अस्पतालका चिकित्सक तथा नर्सप्रति दुर्व्यवहार हुनु खेदजनक छ। दुःख परेका बेला भावनात्मक उत्तेजना हुन सक्छ। यस विषम परिस्थितिमा संयम र धैर्य अपनाउँदै यो महामारीलाई परास्त गर्नु हामी सबैको साझा दायित्व हो।’
बिहीबार राति बिरामीको मृत्यु भएपछि अस्पतालको कोभिड वार्डमा खटिएका चिकित्सक तथा नर्सहरुमाथि कुटपिट भएको थियो। कोरोना संक्रमितहरुको उपचार हुने कोभिड आईसीयूमा उपचाररत दाङका ५४ वर्षीय संक्रमितको मृत्यु भएपछि उनका आफन्तले आईसीयू कक्षमै पसेर नर्सको घाँटी थिचेका थिए। त्यसपछि अन्य चिकित्सक र नर्समाथि समेत हातपात गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
