काठमाडौं- नेकपा (एमाले)का वरिष्ठ नेता माधवकुमार नेपालको सचिवालयले गृहमन्त्री एवं राष्ट्रिय सभाका उम्मेद्वार रामबहादुर थापा ‘बादल’लाई मतदान गर्ने कुनै सहमति नभएको बताएको छ।
मंगलबार गृहमन्त्री थापा नेता नेपालनिवास कोटेश्वर पुगेर निर्वाचनमा सहयोग गर्न भनेको तर, उनलाई सहयोग गर्नेबारे कुनै सहमति नभएको नेपालको सचिवालयले जनाएको छ।
नेपालको सचिवालयको तर्फबाट स्वकीय सचिव मोहन गौतमले सामाजिक सञ्जाल फेसबकुमार्फत् वक्तव्य जारी गर्दै बादलसँगको भेटमा नेपालले आफ्नै पहलमा खिमलाल देवकोटालाई उम्मेद्वार बनाएकाले अहिले अन्यथा गर्न नसकिने स्पष्ट पारेको बताएका छन्।
‘पूर्वप्रधानमन्त्री एवं वरिष्ठ नेता माधवकुमार नेपालले उम्मेद्वारी दर्ताको परिस्थितिमा अन्य दलहरूसहितलाई सहमत गराएर डा. खिमलाल देवकोटालाई आफ्नै पहलमा उम्मेद्वार बनाएकोले अहिले अन्यथा गर्न नसक्ने कुरा स्पष्ट पार्नुभयो’, गौतमले लेखेका छन्, ‘त्यसपछि कमरेड थापाले नै त्यसो भए मतदाताहरूलाई स्वविवेक प्रयोग गर्न भनौं भन्ने प्रस्ताव गर्नुभएको हो। मतदाताले स्वविवेक प्रयोग गर्ने कुरामा सहमति छ। र, कतिपय स्थान एवं मिडियामा प्रचार गरिएजस्तो अन्य कुनै सहमति भएको छैन।’
बागमती प्रदेश अन्तर्गत रिक्त राष्ट्रिय सभा सदस्य पदका लागि बिहीबार निर्वाचन हुँदैन। एमालेको तर्फबाट बादल उम्मेद्वार छन् भने विपक्षी गठबन्धनबाट खिमलाल देवकोटा उम्मेद्वार छन्। देवकोटालाई नेपाली कांग्रेस, माओवादी केन्द्र, जसपा र एमालेको माधवकुमार नेपाल पक्षको समर्थन छ।
तर, एमालेमा विवाद समाधानका लागि कार्यदल बनाएर काम अघि बढेकाले नेपाल पक्षले मत दिने/नदिने अन्योलबीच नेपालको सचिवालयबाट यस्तो वक्तव्य आएको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1770267531.png)
-1764146706.png)
