काठमाडौं- नेकपा (एमाले)का अध्यक्ष केपी शर्मा ओली र वरिष्ठ नेता माधवकुमार नेपाल पक्षको एकता कार्यदलले एकले अर्को पक्षमाथिको प्रहार रोक्ने निर्णय गरेको छ।
कार्यदल गठनपछि मंगलबार बसेको बैठकले एकता प्रक्रियालाई निष्कर्षमा पुर्याउन आरोप-प्रत्यारोपको शृंखला रोक्न नेता-कार्यकर्तालाई आग्रह गर्ने निर्णय गरेको हो।
वरिष्ठ नेता नेपाल पक्षको कार्यदलका संयोजक भीम रावलका अनुसार एकतामा थप चिरा पर्न नदिन यस्तो निर्णय गरिएको हो। उनले भने, 'एकता प्रक्रिया चलिरहेकाले अविश्वास, असहयोग र असमझदारी बढाउने क्रियाकलाप रोक्न आव्हान गर्ने निर्णय भएको छ। पार्टीमा देखिएका समस्यालाई यथोचित रुपमा समाधान गर्दै पार्टीपंक्तिलाई एकताबद्ध रुपमा अघि बढाउन कार्यदलले सबैसँग सद्भावका लागि आग्रह गरेको छ।'
एमाले प्रवक्ता तथा परराष्ट्रमन्त्री ज्ञवालीले पार्टीको समस्या समाधान गर्ने काम शुरु गरिसकेकाले पार्टीका सबै तह, तप्काको सकारात्मक सहयोगको अपेक्षा गरिएको बताए। उनले भने, 'सबै नेता कार्यकर्ताले सकारात्मक सहयोग गर्नुपर्छ। यसका लागि आपसमा असमझदारी बढ्ने र असहयोग गतिविधि रोक्ने निर्णय हामीले गरेका हौं।' यसले एकता प्रक्रियालाई टुंगोमा पुग्न सघाउने उनको भनाइ छ।
बैठकले कार्यदलको कार्यक्षेत्र, कार्यविधि र आचारसंहिता तुरुन्त तय गरी लागू गर्ने निर्णय गरेको पनि गरेको छ। एमालेभित्र अहिले देखिएका कुन तहसम्मका समस्यालाई कार्यदलले कसरी समाधान गर्ने भन्ने विषयमा स्पष्ट पार्ने, कसरी त्यसको समाधान गर्ने र त्यसक्रममा गर्न हुने र नहुने गतिविधि समेत स्पष्ट रुपमा तोकिनेछ। कार्यदलमा हुने असमझदारी र फरक मत बाहिर ल्याउन नपाइनेगरी आचारसंहिता निर्माण गर्ने तयारी भएको हो।
बुधबार फेरि बस्ने बैठक मुख्य अजेन्डामा प्रवेश भएको छैन। कार्यक्षेत्र र विधि निर्माण गरेपछि अजेन्डामा प्रवेश गर्ने तयारी कार्यदलले गरेको छ। कार्यदललाई तीन दिन भित्र प्रतिवेदन दिन निर्देशन दिएपनि दुई दिन सकिँदासम्म अजेन्डामै प्रवेश गरेको छैन। समायावधि लम्बिने संकेत देखिएको छ।
अध्यक्ष ओली र वरिष्ठ नेता नेपालबीच तीन चरणको वार्तापछि १० सदस्ययीय कार्यदल गठन भएको हो। कार्यदलमा दुवै पक्षबाट पाँच-पाँच जना सदस्य छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1753263770.jpg)
-1764146706.png)
