काठमाडौं- सर्वोच्च अदालतको फागुन २३ गतेको फैसलाले तत्कालीन नेपाल कम्युनिस्ट पार्टी (नेकपा)लाई वैधानिकता नदिएर नेकपाका पूर्वघटकहरु एमाले र माओवादी केन्द्रलाई ब्युँताइदियो। त्यसपछि माओवादी केन्द्र बेग्लै पार्टीका रुपमा चलायमान बन्यो। तर, एमालेमा भने कुनै पनि कमिटीको पूर्ण बैठक नबस्दै विभाजनलाई बल पुग्ने गतिविधिले तीव्रता पाएका छन्।
एमाले ब्युँतिएपछि आफूलाई शक्तिशाली ठानेका प्रधानमन्त्री एवं एमाले अध्यक्ष केपी शर्मा ओलीले फागुन २८ गते आफू पक्षका केन्द्रीय सदस्यहरुलाई सुटुक्क बालुवाटार बोलाएर महत्त्वपूर्ण निर्णयहरु गरे। त्यसलाई उनले केन्द्रीय कमिटी बैठकको नाम दिएका थिए। ओलीले विभिन्न जिम्मेवारीमा रहेका माधवकुमार नेपाल पक्षका नेताहरुको जिम्मेवारी खोसे र आफू पक्षका नेताहरुलाई त्यो जिम्मेवारी सुम्पे। अर्कोतिर, आफूलाई सहयोग पुर्याउने सुनिश्चितता भएका माओवादी केन्द्रका नेताहरुलाई एमालेमा भित्र्याए।
ब्युँतिएको एमालेको बैठक बस्ला, नेकपाकालको समीक्षा होला र नयाँ बाटो तय गरिएला भन्ने अपेक्षा गरिरहेको माधवकुमार नेपाल र झलनाथ खनाल पक्ष सुरुमै निराश भए। नेकपामा रहँदा ओलीसँग तिक्त सम्बन्धमा रहेको यो पक्षमाथि ओलीले प्रतिशोध लिने काम गरे। नेकपामा रहँदा आफूलाई दुःख दिएको सम्झिरहेका ओलीले एमाले ब्युँतिएपछि त्यसकै हिसाबकिताब गर्न थालेको देखिन्छ।
नेकपामा रहँदा आफूलाई दुःख दिएको सम्झिरहेका ओलीले एमाले ब्युँतिएपछि त्यसकै हिसाबकिताब गर्न थालेको देखिन्छ।
प्रतिवादमा नेपाल-खनाल पक्षले गत चैत ४ र ५ गते काठमाडौंमा राष्ट्रिय कार्यकर्ता भेला गरेको थियो। भेलामा नेता नेपालले एक अवधारणापत्र पेस गरेका थिए। भेलामा १७ प्रस्ताव पनि पारित गरिएको छ। त्यति मात्रै होइन, नेपाल-खनाल पक्षले आफू पक्षका केन्द्रीय कमिटी, स्थायी कमिटीको भेला र बैठक पनि गर्दै आएको छ। बारम्बार वक्तव्यहरु जारी भएका छन्। ओलीका निर्णयका विरुद्ध निर्वाचन आयोगलाई पत्र पठाइएको छ। पछिल्ला दिनमा नेपाल पक्षले विभिन्न प्रदेश, जिल्ला र भ्रातृ संगठनमा समानान्तर कमिटीहरु घोषणा गरेको छ। पछिल्ला केही दिनयता दैनिकजसो विभिन्न कमिटी घोषणा भइरहेका छन्।
नेपाल-खनाल पक्षले तीन महिने अभियान चलाइरहेको छ। अभियानका क्रममा आफूहरुले सबै तहमा २०७५ जेठ २ गतेका कमिटीहरु ब्युँताउने बताउँछन् एमाले उपमहासचिव घनश्याम भुसाल। 'ती कमिटीहरुले नवौं महाधिवेशन, त्यसका दस्तावेजहरु अनुसार प्रशिक्षण चलाउँछौं। जनतामा जान्छौं। नेकपा एमालेको इतिहास बताउँछौं। आजको संकट र यसका कारण बताउँछौं। प्रशिक्षण गर्छौं। भेला गर्छौं। अरु प्रचार प्रसारका कामहरु गर्छौं,' भुसाल भन्छन्।
आफू पक्षीय कमिटीहरुको घोषणाले यो पक्षलाई आफ्नो शक्ति आकलन र पुनर्ताजगी गर्ने मौका दिनेछ। जसले भोलि आवश्यक परेको समयमा बेग्लै पार्टी घोषणालाई सजिलो बनाउने छ। जसलाई सो पक्षका नेताहरु अस्वीकार गर्दैनन्।
अर्कोतिर, ओली भने आफूसँग भएका अन्तिम हतियार प्रयोग गर्ने बाटोमा लागिरहेका छन्। उनले नेपाल पक्षका नेताहरुलाई जिम्मेवारीमुक्त गर्नेदेखि निलम्बनको सूत्र प्रयोग गरिरहेका छन्। केन्द्रीय कमिटीमा माओवादी केन्द्रका नेताहरुलाई थपेर उनले आफूलाई बलियो बनाउने प्रयास गरे। केही दिनअघि मात्रै उनले नेपाल पक्षका शीर्ष चार नेताहरु माधवकुमार नेपाल, भीम रावल, घनश्याम भुसाल र सुरेन्द्र पाण्डेलाई ६ महिनाका लागि पार्टीका सबै जिम्मेवारी र साधारण सदस्यबाटसमेत निलम्बन गरिदिएका छन्।
ओली पक्षले नेपाल-खनाल पक्षले घोषणा गरिरहेको समानान्तर कमिटीहरुप्रति पनि दृष्टि राखिरहेको छ। त्यसको घोषणा गर्ने र त्यस्ता कमिटीमा सहभागी हुनेहरुलाई पनि कारबाही गरिने चेतावनी दिएको छ। 'जसरी हिजोको दिनमा केही नेतृत्वका व्यक्तिहरुलाई कारबाहीको प्रक्रिया अघि बढेको छ। अब यही तरिकाले जाने हो भने समानान्तर कमिटी गठन गर्न उद्धत हुने र त्यो कमिटीमा बस्नेहरु समेतलाई कारबाहीको दिशामा पार्टी अगाडि बढ्छ,' २३ गतेको प्रतिनिधिसभा बैठकपछि पत्रकारहरुसँग एमालेका मुख्य सचेतक विशाल भट्टराईले भनेका थिए।
भट्टराईले लोकतान्त्रिक विधिबाट, परम्पराबाट, विधानबाट चल्नुपर्ने पार्टी यदि गैरकानुनी तरिकाले, गैरसंवैधानिक तरिकाले र अवैधानिक तरिकाले चल्यो भने त्यो पार्टीको कारबाहीको विषय बन्ने बताए। उनले समानान्तर कमिटी गठन गर्ने कुरा कुनै पनि हालतमा पार्टीका लागि स्वीकार्य विषय हुन नसक्ने बताए।
तिक्तता र समूह केन्द्रित गतिविधि बढ्दै जाँदा एमालेमा शीर्ष नेताबीच संवादमार्फत् आफ्ना धारणा राखेर मन माझ्ने वातावरण भने बन्न सकेको छैन। गत चैत २ गते दुई पक्षका नेताहरु संवादमा जुटेका थिए। पार्टी कार्यालय धुम्बाराहीमा भएको छलफलले विवादलाई साँघुर्याउन सकेको थिएन। बरु, त्यसपछि झनै तिक्तता बढ्यो। त्यसपछि ओलीले 'व्यक्तिसँग कुरा गर्ने तर गुटसँग नगर्ने' बताउने गरेका छन्। त्यसैले दुई पक्षबीच सहज संवाद हुन सकेको छैन। आफ्ना 'गल्ती'हरुप्रति आत्मालोचना झन् टाढाको विषय बनेको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
