समाचार

सर्वसाधारण भन्छन्- होली त वर्षेनी आउँछ, यसपालि कोरोना छ भन्ने बुझौं

कविता चापागाई आइतबार, चैत १५, २०७७ ०६:००

प्रत्येक वर्षको फागुन पूर्णिमामा पर्ने होली नेपाली तथा भारतीयको प्रमुख चाड हो। फागुनमा शुक्ल पूर्णिमामा मनाइने भएकाले यसलाई 'फगुवा' पनि भनिन्छ।

घरपरिवार, साथीभाइ आपसमा रङ लगाएर उल्लासपूर्वक मनाइने होलीलाई पहाडदेखि तराई र गाँउदेखि सहरसम्म रङ्गिन पर्वको रुपमा लिइन्छ।

तर, यो वर्ष विश्वमा फैलिरहेको कोरोना भाइरसका कारण प्रभावित हुने देखिएको छ। यस्तो अवस्थामा होलि खेल्नु ठिक हो वा होइन?

केदार भण्डारी, सिभिल इन्जिनियर
पहिले कलेजका साथिभाई जम्मा भएर वा लामो समय भेट नभएका साथीहरुसँग पनि भेटघाट गरी होली मनाउदै आएका थियौ, तर अहिले कोरोनाको समयमा सरकारले पनि धेरै भिडभाड नगर्न भनेको छ। यो समयमा पहिलेदेखि चलिआएको भन्दा केही फरक ढङ्गले मनाउनु पर्छ जस्तो लाग्छ। यस वर्ष आफ्नै घरपरिवारमा मात्र मनाउनुपर्छ।

रामशरण चौलागाई, व्यापारी, जडिबुटी (काठमाडौं)
होली नेपाली चाड हो, यो रङको चाड भएको हुनाले साथी भाइहरूबीच मिलेर एकआपसमा रङग लगाउँदै रमाईलो गर्दै खेल्ने गरेका छौं। तर अहिलेको समय पहिलेको जस्तै गरी मनाउने अवस्था छैन। यो महामारीमा आफ्नो घरपरिवार मात्र रहेर घरबाट बाहिर ननिस्की आफ्नै घरमा खेल्न र रमाइलो गर्न सक्छौं।

राधिका खत्री, बुटिक डिजाइनर, नयाँ ठिमी
अहिलेसम्म होली रमाइलोसँग खेल्दै आयौं, विभिन्न नाचगान र रमाइलो पनि गर्यौं। यो वर्ष भने होली नखेल्ने सोच बनाएकी छु। खेले पनि केही सतर्कता अपनाएर आफ्नै घरपरिवारसँग मात्र खेल्ने हो। अरुसँग घुलमिल नै नगर्ने हो।

वर्षेनी होलीको समयमा धेरै दुर्घटना हुने हुँदा धेरै सावधानी अपनाएर आफ्नै घरमा रमाउनु राम्रो हुन्छ। यसपालि झन् कोरोनाको कहर छ। सरकारको तर्फबाट नागरिकलाई यसपालि होली नखेल्न अनुरोध मात्र गर्ने होइन, प्रतिबन्ध नै लगाउनुपर्छ।

सोनु खनाल, विद्यार्थी
अहिलेसम्म मैले घरबाट बाहिर गएर होली खेलेको छैन। घरमै सबैले टीका लगाइदिनुहुन्छ, प्रायः दिदीहरुसँगै रमाइलो गर्छु। होली पर्व एकले अर्कोलाई रङ लगाउने पर्व हो, तर मानिसहरुले यसलाई विकृत बनाएका छन्। फोहोर पानी छ्याप्ने, लोला हान्ने ,खेल्न मन नहुँदा पनि जबर्जस्ती गर्ने, झगडा गर्ने र रमाइलोका नाममा ड्रग्स सेवन गर्ने क्रियाकलाप भइरहेका छन्। अब हामीले यसमा सीमारेखा कोर्नुपर्छ।

अहिले त कोरोना महामारी छ। सरकारले नै प्रतिवन्ध लगाइदेओस् जस्तो त लाग्दैन, किनभने सरकारले रोकिदिए रोकिने होइन। हामी आफै सचेत हुनु पर्दछ। आफुले बुझेर नै भिडभाड नगर्ने, सुरक्षाको मापदण्ड अपनाउने, घरमै बसेर पनि खुसी हुन र बाँड्न सकिन्छ।

विजय खड्गी, व्यापारी
सानो हुँदा रङ लगाउने, पानी छ्याप्ने गरिन्थ्यो। अलि ठूलो भएर बुझ्ने भएपछि फरक तरिकाले मनाउन थालियो। अहिले कोरोना महामारीका बेला कोही पनि घरबाहिर ननिस्केर घरमै होली मनाउँदा ठिक होला। म पनि यसपालि घरपरिवारमा मात्र होली मनाउँछु। सबै जनताले सरकारले भनेको सुरक्षाका मापदण्ड अपनाएर घरमै होली मनाउन मेरो आग्रह छ।

समीक्षा थापा, विद्यार्थी
हामी हरेक वर्ष साथीहरूसँग निश्चित ठाउँमा भेला भएर होली मनाउँथ्यौं। अहिले कोरोना महामारीले गर्दा नमनाउने सोचमा छौं। मनाइयो भने पनि आफ्नै घरमा बसी रमाइलो गर्नै सोच छ।

सबै कुरामा सरकार मात्र जिम्मेवार हुँदैन, समुदाय र व्यक्ति आफु पनि जिम्मेवार बन्नु पर्छ। होली वर्षेनी आउने चाड हो, अहिलेको यो कोरोना महामारीमा सबै जना घरमै बसेर मनाउने वा सरकारले पनि यो वर्ष सबै जनतालाई बाहिर निस्केर होलि मनाउन निषेध गर्नु पर्दछ।

पुष्पराज ढुङगाना, बानेश्वर
होली रङको पर्व हो। मेरो पुरानो घर तराईमा भएकाले यस पर्वलार्ई हामी विशेष महत्व दिन्छौं। तर, अहिले यसलाई विकृत बनाइएको छ।

यो वर्ष त्यस्तो नहोस् किनभने अहिले विश्व नै कोरोनाले आक्रान्त भएको छ। यसले गर्दा आफ्नो बालबच्चा, परिवार र छरछिमेकलाई सचेत गराई यो पर्वलाई रमाईलोसँग घरभित्रै मनाउने प्रयास गरौं। सबै भन्दा पहिले सरकारले सबैलाई सचेत बनाउनुपर्छ। विशेष ठाउँ तोकेर मानिसहरूलाई बाहिर निस्कन नदिने पनि गर्नुपर्छ।