फाइल तस्बिर
भक्तपुर–जिल्ला प्रशासन कार्यालय भक्तपुरले जिल्लामा हुने कुनै पनि किसिमको मेला, जात्रा, सांस्कृतिक कार्य सञ्चालन गर्न रोक लगाएको छ।
कोभिड–१९संक्रमणको तेस्रो लहरको जोखिम बढेकाले सबै खाले मेला, जात्रा, सांस्कृतिक कार्यमा रोक लगाएको प्रमुख जिल्ला अधिकारी प्रेमप्रसाद भट्टराईल बताए।
गृह मन्त्रालय र स्वास्थ्य मन्त्रालयको निर्देशनानुसार सबै प्रकारका जमघटमा प्रतिबन्ध लगाइएको उनले बताए। कोरोना भाइरस संक्रमण रोकथाम तथा नियन्त्रण गर्न भिडभाड हुने कुनै किसिमको कार्य नगर्न नगराउन अनुरोध गर्दै स्वीकृतविना यस्ता काम गरेको पाइए कारवाही गरिनेसमेत उनको भनाइ छ।
भक्तपुरमा नयाँ वर्षमा मनाइने प्रसिद्ध बिस्केट जात्रा सञ्चालनमा भने वैकल्पिक उपाय खोजिने उनले बताए। बिस्केट जात्रा रोक्नेबारे अहिले नै कुनै निर्णय नलिएको बताउँदै प्रजिअ भट्टराईले धेरै भिडभाड हुने भएकाले रथ तान्न र लिङ्गो उठाउनेबारेमा भने वैकल्पिक उपाय खोजिने जनाए।
गृह मन्त्रालयको निर्देशनअनुसार कोभिड–१९ संक्रमणको सम्भावनालाई मध्यनजर गरी पहिले सञ्चालनमा ल्याइएका क्वारेन्टाइन, आइसोलेशन केन्द्रलाई पुनःतयारी अवस्था राख्न सम्बन्धित कार्यालयलाई निर्देशन दिएको पनि उनले बताए।
कोरोना भाइरसबाट बच्न स्वास्थ्य सुरक्षालगायतका मापदण्ड पालना गर्न जिल्लावासीलाई आग्रह गर्दै उनले मापदण्ड उल्लंघन गर्नेलाई संक्रामक रोग –२०२० बमोजिम कारवाही गरिने बताए। प्रशासनले नजिकिँदै गरेको होली पर्वसमेत भिडभाड नहुने गरी आफ्नै घरमा बसेर मनाउनसमेत आग्रह गरेको छ ।
त्यसैगरी भीडभाड हुने सरकारी कार्यालयमा भोलिदेखि नै स्वास्थ्य मापदण्ड र सुरक्षाका उपाय अपनाएर मात्रै सेवा दिन निर्देशन दिएको प्रजिअ भट्टराईले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
