एक वर्षमा ४४ प्रतिशतसम्म बढ्यो सवारीसाधनको मूल्य

अटो

शिव बोहरा शुक्रबार, चैत ६, २०७७ ०९:०५

काठमाडौं- नेपाली बजारमा आयात गरिएका सवारीसाधनको मूल्य आयातकर्ताहरूले अस्वाभाविक रूपमा बढाएका छन्। उनीहरूले भारतीय बजारमा मूल्यवृद्धिको कारण देखाउँदै कयौं गुणा मूल्य बढाएका हुन्।

व्यवसायीले एक वर्षको अवधिमा सवारीसाधनको मूल्य ४४ प्रतिशतसम्म बढाएको पाइएको छ। गत वर्ष फागुनमा नाडा अटोमोबाइल्स एसोसिएसन अफ नेपालले सार्वजनिक गरेको मूल्यसूची र यही चैतमा प्रकाशित मूल्यबीच ठूलो अन्तर देखिएको हो। एकै वर्षमा यति ठूलो अन्तरमा मूल्यवृद्धि हुनु स्वाभाविक मान्‍न नसकिने उपभाेक्ताहरु बताउँछन्।

दुई पाङ्‍ग्रे सवारीमा तीन लाख रूपैयाँसम्म मूल्यवृद्धि
नेपाली बजारमा बजाज, होन्डा, यामाहा, टिभिएस, हिरोलगायत दुई दर्जनभन्दा बढी ब्रान्डका दुई पाङ्‍ग्रे सवारीसाधनको बिक्री हुँदै आएको छ। एक वर्षको अवधिमा प्रायः सबै ब्रान्डका सवारीमा मूल्यवृद्धि भएका छन्। नाडाको तथ्यांकअनुसार उक्त अवधिमा कम्तीमा एक हजारदेखि तीन लाख रूपैयाँसम्म मूल्य बढेको छ।

गत वर्षको फागुनमा बजाज ‘पल्सर १५०’ मोटरसाइकलको बिक्री मूल्य दुई लाख ५७ हजार ९०० रूपैयाँ थियो। यही चैत ३ गते नाडाले प्रकाशित गरेको मूल्यसूचीअनुसार उक्त मोटरसाइकलको मूल्य ६ हजार रूपैयाँले बढेको छ। व्यवसायीले उक्त मोटरसाइकल अहिले दुई लाख ६३ हजार ९०० रूपैयाँमा बिक्री गरिरहेका छन्।

बजाजकै ‘प्लाटिना १०० इएस’ मोटरसाइकलको मूल्य पनि १४ हजार रूपैयाँले बढेको छ। गत वर्ष फागुनमा एक लाख ६७ हजार ९०० रूपैयाँ रहेको उक्त मोटरसाइकलको बिक्री मूल्य यही चैत महिनामा एक लाख ८१ हजार ९०० रूपैयाँ पुगेको छ।

त्यसैगरी यामाहाको सलुटो मोटरसाइकलमा पनि एक वर्षमा आठ हजार रूपैयाँ मूल्य बढेको छ। गत वर्षको फागुनमा दुई लाख पाँच हजार ९०० रूपैयाँमा खरिद गर्न सकिने सलुटो यो वर्षको चैतमा दुई लाख १३ हजार ९०० रूपैयाँ पुगेको छ।

होन्डा एभिएटरको मूल्य गत वर्ष दुई लाख ११ हजार ९०० रूपैयाँ रहेकोमा यो वर्ष दुई लाख १५ हजार ९०० रूपैयाँ पुगेको छ। होन्डाको शक्तिशाली मोटरसाइकल सिबिआर ६०० को मूल्य एक वर्षमा तीन लाख रूपैयाँले बढेको छ। गत वर्ष ३१ लाख ५० हजार रूपैयाँ रहेको उक्त मोटरसाइकलको बिक्री मूल्य यो वर्ष बढेर ३४ लाख ५० हजार रूपैयाँ पुगेको हो।

टिभिएस एनटर्क १२५ डिसको मूल्य अघिल्लो फागुनमा दुई लाख ३४ हजार ९०० रूपैयाँ रहेकोमा यो वर्ष बढेर दुई लाख ४० हजार ९०० रूपैयाँ पुगेको छ।

अन्य दुईपाङ्‍ग्रे मोटरसाइकलको मूल्यसमेत बढेको तथ्यांक छ। यसरी मूल्य बढ्नुमा भारतमा भएको मूल्यवृद्धिलाई नै मुख्य कारक मानिएको छ।

चार पाङ्‍ग्रेको मूल्य २८ लाखसम्म बढ्यो
यता चार पाङ्‍ग्रे सवारीको मूल्य पनि उल्लेख्य बढेको छ। चार पाङ्‍ग्रेतर्फ न्यूनतम १० हजारदेखि २८ लाख रूपैयाँसम्म मूल्य बढेको पाइएको छ।

महँगो मूल्यको गाडी ‘टोयोटा फर्चुनर एटी’को मूल्य एक वर्षको अवधिमा २८ लाख रूपैयाँले बढेको छ। नाडाले गत वर्ष फागुनमा मूल्यसूची प्रकाशित गर्दा यो गाडीको मूल्य एक करोड ७८ लाख रूपैयाँ थियो। यही चैत ३ गते प्रकाशित नयाँ मूल्यसूचीअनुसार उक्त सवारीको बिक्री मूल्य दुई करोड ६ लाख रूपैयाँ पुगेको छ।

गत वर्ष २१ लख ९९ हजार रूपैयाँमा पाइने ड्याटसन रेडिगोको मूल्य यो वर्ष दुई लाख रूपैयाँले बढेर २३ लाख ९९ हजार पुगेको छ। मारूती सुजुकीको बलेनो अल्फा गत वर्ष ४० लाख ९९ हजार रूपैयाँमा पाइन्थ्यो भने यो वर्ष बढेर ४२ लाख ७९ हजार रूपैयाँ पुगेको छ।

यसैगरी हुन्डाई ब्रान्डको ‘कोना इभी १५० केडब्लु’ को मूल्य एक वर्षमा ४३.९७ प्रतिशतले बढेको छ। गत वर्ष उक्त कारको बिक्री मूल्य ६५ लाख ९६ हजार रूपैयाँ रहेकोमा यस वर्ष २९ लाख रूपैयाँले बढेर ९४ लाख ९६ हजार रूपैयाँ पुगेको छ।

मूल्य बढ्नुको कारण
नाडाको तथ्यांकअनुसार एक वर्षमै महँगा सवारीको मूल्य उल्लेख्य रूपमा बढेका छन्। उत्पादक कम्पनीले नै मूल्य बढाएका कारण आयातकर्ताले बढाउनुपरेको नाडा अटोमोबाइल्स एसोसिएसन अफ नेपालका उपाध्यक्ष आकाश गोल्छाले बताए।

‘सवारीसाधनको मूल्यवृद्धि हामीसँगभन्दा बढी उत्पादकसँग सम्बन्धित हुन्छ,’ उनले नेपाललाइभसँग भने, ‘उत्पादकले मूल्य बढाएर पठाएपछि हामीले बढाउने हो। उत्पादकले मूल्य होल्ड गर्दासम्म बढ्दैन, तर त्यो बिक्रेताकोमा ट्रान्सफर भए पनि स्वाभाविक रूपमा बढ्छ।’

कोरोना भाइरसको संक्रमणपछि खुलेको बजारमा विभिन्‍न कच्चा पदार्थको मूल्य बढेकाले सवारीसाधनको मूल्य अझै बढ्ने अनुमान सवारी बिक्रेताहरूको छ। नेपालमा बिक्री हुने सबैजसो सवारी आयात हुने भएकाले मूल्य उत्पादकले तोकेअनुसार नै कायम हुन्छ।

कानुनअनुसार सवारी आयातकर्ताले हरेक चार महिनामा सवारीसाधनको अधिकतम् खुद्रा मूल्य (एमआरपी) सार्वजनिक गर्नुपर्छ। त्यहीअनुसार नाडाले आफ्ना सदस्यहरूबाट यस्तो मूल्यसूची संकलन गरेर एकमुष्टमा प्रकाशित गर्दै आएको छ। नाडाको प्रकाशनमा नछाप्ने कम्पनीहरूले अलग्गै मूल्यसूची प्रकाशित गर्दै आएका छन्।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।