काठमाडौं- नेपाली कांग्रेसका शीर्ष नेताहरूको बैठक अघि वरिष्ठ नेता रामचन्द्र पौडेल पक्षले छुट्टै भेला गरेको छ। कांग्रेस सभापति शेरबहादुर देउवाले शुक्रबार दिउँसो ३ बजे आफ्नै निवास बूढानीलकण्ठमा शीर्ष नेताहरूको बैठक बोलाएका छन्।
त्यसअघि शुक्रबार बिहान पौडेल पक्षको छुट्टै भेला बसेको हो। काठमाडौंमा उपलब्ध पौडेल पक्षीय शीर्ष नेताले महामन्त्री डा शशांक कोइरालाको निवास महाराजगञ्जमा छलफल गरेका हुन्।
छलफलमा प्रकाशमान सिंह, रामशरण महत, मिनेन्द्र रिजाल, सितादेवी यादव सहभागी थिए। छलफलमा वर्तमान राजनीतिक अवस्थाबारे छलफल भएपनि कुनै निर्णय नभएको महामन्त्री कोइरालाका स्वकीय सचिव भरत तिवारीले बताए।
यसैबीच, नेपाली कांग्रेस सभापति देउवाले आफ्नो दलका शीर्ष नेताको बैठक बोलाएका छन्। देउवा निवास बूढानीलकण्ठमा दिउँसो ३ बजे बैठक बोलाइएको हो।
‘समसामयिक विषयमा छलफल गर्न’ सिनियर नेताहरुको बैठक बोलाइएको मुख्य सचिव कृष्णप्रसाद पौडेलले जानकारी दिए। प्रतिनिधि सभा पुनःस्थापना भएपछि प्रधानमन्त्री केपी शर्मा ओलीको विकल्प खोज्न सबैले कांग्रेसको भूमिका खोजिरहेका बेला कांग्रेस भने अनिर्णित देखिएको छ। बैठक त्यसै सन्दर्भमा केन्द्रित हुने बताइएको छ।
बैठकमा राजनीतिको पछिल्लो घटनाक्रमका बारेमा छलफल हुने भएको छ। माओवादी केन्द्र कांग्रेस र जसपासहितको गठबन्धन बनाएर सरकार निर्माण गर्नेप क्षमा छ।
माओवादी केन्द्रले कांग्रेस र जसपाबीच कुराकानी गरेपनि कांग्रेसले भने जसपासँग संवाद गरेको छैन। कांग्रेसको नेतृत्वमा सरकार बनाउन माओवादी केन्द्र तयार देखिएको छ। शीर्ष तहका नेताको बैठकले केन्द्रीय कार्यसमितिको बैठक बोलाउने विषयमा समेत छलफल गर्ने बताइएको छ। शीर्ष नेतासँगको छलफलपछि देउवाले जसपाका नेताहरूसँग आजै छलफल गर्नेछन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1768821025.png)
-1768820888.png)
-1764146706.png)
