आइकोनिक ब्रान्ड हार्ले डेभिडसन नेपालबाट बाहिरियो

अटो

शिव बोहरा मंगलबार, माघ २७, २०७७ १३:५४

काठमाडौं- आइकोनिक अमेरिकी दुईपांग्रे सवारी ब्रान्ड हार्ले डेभिडसन नेपालबाट बाहिरिएको छ। हार्ले डेभिडसनका सवारी नेपालमा आयात गर्दै आएको आइएमई अटोमोटिभ्सले आयात रोकेसँगै हार्ले डेभिडसन नेपालबाट बाहिरिएको हो।

आइएमई अटोमोटिभ्सले साढे दुई वर्षअघि हार्ले ब्रान्ड नेपाल भित्र्याएको थियो। कम्पनीले कोरोना भाइरसको महामारीका कारण खर्च मात्र बढेको भन्दै हार्लेका सवारी भित्र्याउन बन्द गर्ने निर्णय गरेको हो।

१ सय १५ वर्षको इतिहास बोकेको अमेरिकी मोटरसाइकल कम्पनी हार्ले डेभिडसन वि‍‍. सं.‌ २०७५ मा भएको अटो शोबाट नेपाली बजारमा औपचारिक रुपमा भित्रिएको थियो। विभिन्न व्यवसायमा संलग्न आइएमई ग्रुपले विश्वविख्यात अमेरिकी मोटरसाइकल हार्ले डेभिडसन भित्र्याएको थियो।

मोटरसाइकल बिक्री कम भएको र कोरोना भाइरसको महामारीले उपभोक्ताको चासो समेत कम भएको भन्दै हार्ले ब्रान्डका सवारी आयात नै बन्द गर्ने निष्कर्षमा आइएमई पुगेको हो।

आइएमई अटोमोटिभ्सका नायब प्रमुख कार्यकारी अधिकृत सुरज भट्टराईले तत्कालाई हार्लेका सवारीको डिलरसिप बन्द गरिएको बताए। ‘कारोना भाइरस महामारीका कारण असामान्य अवस्था आएकाले तत्काललाई बन्द गरिएको हो,’ भट्टराईले नेपाल लाइभसँग भने।

आइएमई अटोमोटिभ्सले हार्लेका सवारी साधनको आयात बन्द गर्नुअघि अर्को अमेरिकी दुई पांग्रे ब्रान्ड युएमको डिलरसिप समेत औपचारिक रुपमा बन्द गरेको घोषणा गरेको थियो।

आइएमई अटोमोटिभ्सले हार्ले डेभिडसनको आइरन ८८३ मोडल नेपालमा भित्र्याएको थियो। आइरन ८८३ को नेपाली बजारमा ४५ लाख ८५ हजार मूल्य तोकिएको थियो। योसँगै आइएमई अटोमोटिभ्सले हार्लेको बहुचर्चित मोडल फ्याटबोइ समेत भित्र्याएर बिक्री गरेको थियो। नेपाल भित्रिएको एउटा फ्याटबोइ मोटरसाइकल आइएमईले करिब ८२ लाख रुपैयाँमा बिक्री गरेको थियो।

हार्लेले सीमित संख्यामा बिक्री हुने भएपनि दुईपांग्रे सवारीको बजार बढ्दै गएको अवस्थामा आइएमईले युएम ब्रान्ड समेत बन्द गरेकाले आश्चर्य पैदा गरेको सवारी आयातकर्ताहरूबीच चर्चा भएको छ।

कारोना भाइरस महामारीको असर मत्थर हुँदै गएपछि दुईपांग्रे सवारीको बजार करिब १२ प्रतिशतले विस्तार भएको तथ्यांक छ। कोरोना महामारीयता समेत नेपाली बजारमा करिब १ दर्जन दुईपांग्रे सवारीका नयाँ ब्रान्ड भित्रिएका छन्। यसरी दुईपांग्रे सवारी बजार विस्तार भइरहँदा आइएमईले भने युएम र हार्ले दुवै ब्रान्ड बन्द गर्ने निर्णय गरेकोले आश्चर्य पैदा गरेको एक सवारी आयातकर्ताले बताए।

कम्पनीले दुबै ब्रान्ड बन्द गर्नुको मुख्य कारण खर्च बढी भएको तर्क आइएमईको छ। ‘कम्पनीले प्रोडक्ट बिक्रीलाई मार्केटिङ गर्ने, स्किम ल्याउनेभन्दा बढी सञ्चालन खर्च कटौती गर्ने नीति लिएको देखियो,’ आइएमई अटोमोटिभ्सका एक कर्मचारीले भने, ‘ब्रान्डेड प्रोडक्ट बिक्री गरेर आम्दानी गर्ने भन्दा ब्रान्ड नै बन्द गरेर खर्च कटौती गर्नु व्यवस्थापनले उपयुक्त ठानेको देखिन्छ।’

उनका अनुसार नेपालमा युएम ब्रान्ड लोकप्रिय हुँदै गएको थियो। २/३ वर्ष अघिसम्म वार्षिक ३ सयभन्दा बढी युएमका मोटरसाइकल बिक्री हुँदै आएको थियो। तर कम्पनीले यो ब्रान्डमा पनि खर्च कटौतीकै नीति लिँदा ब्रान्डिङ हुन नसकेर केही महिना अघिदेखि आयात बन्द गर्ने निर्णय गरेको थियो।

हार्ले डेभिडसन बन्द गर्ने निर्णय गरेसँगै आइएमई अटोमोटिभ्सका दुईपांग्रे तर्फको बजारमा पूर्णविराम लागेको छ। कम्पनीले करिब २ करोड रुपैयाँ खर्चिएर बनाएको काठमाडौंको गैह्रीधारामा रहेको हार्लेको सोरुम बन्द गरेर स्कटकका मोटरसाइकल बालाजुस्थित् अशोक लेल्यान्डको वर्कसपमा लगेर राखेको छ। हार्लेका आधा दर्जनभन्दा कम मोटरसाइकल भित्र्याएको आइएमईले बाँकी स्टक भारी छुटमा क्लियर गर्ने तयारी गरेको छ।

आइएमई अटोमोटिभ्सले हार्ले र युएम बन्द गरेपनि कम्पनीसँग अशोक लेल्यान्ड, हेभी इक्युपमेन्ट ब्रान्ड एसकर्टसको डिलरसिप यथावत् छ। अटोमोबाइल बजारमा आक्रमक रुपमा उदाएको आइएमई अटोमोटिभ्स अब भने यो क्षेत्रबाटै बाहिरिने संकेत देखिएको छ।

केही समयअघि हार्ले डेभिडसन भारतबाट समेत बाहिरिएको थियो। विभिन्न विषयमा विवाद आएपछि भारतको बिक्री सञ्जाल र सर्भिसको जिम्मा हिरो मोटोकर्पलाई सुम्पिएर हार्ले बाहिरिएको थियो।

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।