काठमाडौं- प्रधानमन्त्री केपी शर्मा ओलीले मंगलबार संवैधानिक परिषद्को बैठक बोलाएका छन्। मंगलबार बिहान ९ बजेका लागि प्रधानमन्त्री ओलीले संवैधानिक परिषद्को बैठक बोलाएको प्रधानमन्त्री निवास बालुवाटार स्रोतले जानकारी दिएको छ।
यसअघि आइतबार बिहान ९ बजेका लागि बोलाइएको संवैधानिक परिषद्को बैठक स्थगित भएको थियो। प्रमुख प्रतिपक्षी दल नेपाली कांग्रेसका नेता शेरबहादुर देउवाले बैठकमा उपस्थित हुन नसक्ने जानकारी दिएपछि बैठक स्थगित भएको थियो। नेपाली कांग्रेसले मंसिर २९ मा देशभर सरकारविरुद्ध प्रदर्शन गर्ने तयारी गरेको र सोही काममा आफू व्यस्त हुने भन्दै नेता देउवाले बैठकमा उपस्थित हुन नसक्ने जानकारी गराएका थिए।
देउवा अनुपस्थित हुने भएपछि बैठकको गणपूरक संख्या नै नपुग्ने भएपछि संवैधानिक परिषद्को बैठक स्थगित भएको थियो। लामो समयसम्म बैठक नबस्दा संवैधानिक निकायका पदाधिकारी नियुक्तिमा असर परेको छ।
यसैबीच संवैधानिक निकायका पदाधिकारी नियुक्तिमा पनि प्रधानमन्त्री तथा नेकपा अध्यक्ष केपी ओलीले आफूसँग परामर्श नगरेपछि पुष्पकमल दाहाल ‘प्रचण्ड’ असन्तुष्ट बनेका छन्। उनी निकट एक नेताका अनुसार ओलीले कांग्रेस सभापति शेरबहादुर देउवासँग सहमति जुटाएको तर प्रचण्डसँग परामर्श पनि गर्न आवश्यक नठानेकाले उनी असन्तुष्ट भएका हुन्।
विभिन्न आयोगहरुका करिब ४ दर्जन पद रिक्त रहेको अवस्थामा मंगलबार संवैधानिक परिषद्को बैठक बस्दैछ। यसअघि गत आइतबारका लागि बोलाइएको बैठक कोरम नपुगेपछि स्थगित गरिएको थियो। मंगलबारको बैठकले रिक्त रहेका अधिकांश पदहरुमा नियुक्तिको सिफारिस गर्ने तयारी छ। ओलीले बहुमत पद देउवालाई दिएर भए पनि रिक्तता टुग्याउन चाहेकाले मंगलबारको बैठकबाटै धेरैजसो निकायमा पदाधिकारी नियुक्ति गरिने सूचना प्रचण्डसम्म पुगेको छ।
'प्रधानमन्त्रीले देउवाजीसँग सहमति गर्नुभाएको छ', प्रचण्ड निकट ती नेताले भने, 'तर पार्टीकै अर्का अध्यक्षसँग सामान्य परामर्श पनि गर्न आवश्यक ठान्नुभएको छैन। यसले अध्यक्ष प्रचण्डलाई असन्तुष्ट बनाएको छ।'
राजनीतिक नियुक्तिहरुमा अध्यक्षद्वयबीच सहमति कायम गर्ने गत स्थायी कमिटीको बैठकको निर्णय भए पनि अध्यक्ष ओलीले उल्लंघन गरेको उनको आरोप छ।
राजनीतिक नियुक्तिहरुमा ओलीले एकलौटी गरेको भन्दै नेकपामा पछिल्लो विवाद सुरु भएको थियो। गत असारदेखि भदौसम्म चलेको स्थायी कमिटीको बैठकले पार्टीमा छलफल र परामर्श गर्ने भने पनि ओलीले राजदूत तथा मन्त्रीहरुमा एकलौटी गरेको भन्दै प्रचण्डले असन्तुष्टि जनाएका थिए। पछिल्लो पटक तीन जना मन्त्री बनाउँदा पनि ओली, प्रचण्ड र माधव नेपाल पक्षका एकएक जनालाई बनाइने
सहमतिविपरीत ओलीले एकलौटी गरेको प्रचण्ड-नेपाल पक्षको आरोप छ।
नेकपामा अध्यक्षद्वय ओली र प्रचण्डले फरकफरका प्रस्ताव ल्याएर एकअर्काप्रति कैयौं आरोप लगाएपछि उनीहरुबीचत सम्बन्ध चिसिएकै छ, पार्टी पनि विभाजित मानसिकतामा देखिएको छ। ओलीको पछिल्लो तयारीले पार्टीभित्रको विवाद झनै बढ्ने आकलन गरिएको छ।
संविधानको धारा २८४ मा संवैधानिक परिषद्सम्बन्धी व्यवस्था गरिएको छ। त्यहाँ प्रधानमन्त्री, प्रधानन्यायाधीश, प्रतिनिधि सभाको सभामुख, राष्ट्रिय सभाको अध्यक्ष, प्रतिनिधिसभाको विपक्षी दलको नेता, प्रतिनिधि सभाको उपसभामुख रहन्छन्। प्रधानमन्त्री भने अध्यक्ष हुन्छन्। अहिले उपसभामुख पद भने रिक्त छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749200817.png)
