फाइल तस्बिर
सरकारले भन्यो–घर भित्रै बसिदिनुस्, म कोरोना महाव्याधीको नियन्त्रणमा लागें। सरकारको आग्रहलाई हामी सबैले मान्यौं। सरकारलाई मद्दत गर्न हामी महिनौंसम्म आफ्नो घरभित्रै बस्यौं। सरकारले भनेका सबै कुराहरु मान्यौं। सरकारलाई सहयोग पनि गर्यौं।
त्यसपछाडि पनि सरकारले प्रतिबन्धलाई केही खुकुलोमात्रै गर्यो। त्यसलाई पनि हामीले मान्यौं। संसद बोलाइयो। संसदमा पुगेर पनि कुरा राख्यौं। सरकारविरुद्ध कांग्रेस सडकमा आउनुपर्ने थियो। तर, आएन। नजानेर कांग्रेस सडकमा नआएको होइन। आउन नसकेर होइन। सरकारलाई मद्दत गर्न र आफ्नो जिम्मेवारी बुझेर नआएको हो।
सडकमा आउँदै गर्दा धेरै खुसी लागेको छैन। कोरोना महामारी नियन्त्रणमा आइसकेको छैन। अगाडीका दिनहरु कस्तो हुन्छन्? हामी कसैले पनि भन्न सक्दैनौं। तर पनि सडकमा आउन बाध्य भएका छौं। सरकार संसदबाट भाग्यो। बालुवाटारको दुलोभित्र लुकेको सरकार र बढारिएको सरकारलाई ललकार्नका लागि कांग्रेस सडकमा आएको छ। सडकमा आएको कांग्रेस अब घर फर्केर जाँदैन।
जबसम्म सरकार ठेगानमा आउँदैन तबसम्म कांग्रेस सडकमै रहन्छ। सडकमा आउन सरकारले बाध्य पार्यो। सडकमा आउँदा सबै सतर्कता अपनाउँछौं,त्यसका बाबजुद कुनै क्षति भए त्यसको क्षतिपुर्ति सरकारले व्यहोनुपर्छ।
संसदमा नेकपाको करिब दुई तिहाइ छ। सातमध्ये छ वटामा नेकपाको सरकार छ। चार सय बढी स्थानीय तहका नेकपाको सरकार छ। सरकार शक्तिशाली छ,तर जनतालाई शक्तिशाली बनाउनका निम्ति एउटा पनि काम गर्न सकेको छैन। नालायक सरकार मुर्दावाद। देश र जनताको आकांक्षा प्रति कत्तिपनि सरकारको संवेदना छैन। व्यक्ति पुजामा सरकार लागेको छ।
सरकार तत्कालै गर्नुपर्ने काम गर्दैन। कहिल्यै पुरा नहुने हावादारी कुरामा देश र जनतालाई यो सरकार झुक्याँउछ। हावादारी सरकार मुर्दावाद। सरकारले मुखले भ्रष्टाचार गर्दिन भन्छ। भ्रष्टचार सहन्न पनि भन्छ। तर, वाइडबडी खप्लक्कै खान्छ। बालुवाटारको जग्गा खर्लप्पै खान्छ। यति ग्रुपसँग साठगाँठ गर्छ। राजस्वको दर यसरी बढाउँदैछु भनी बजेट भाषणअघि भन्छ। व्यापारीलाई पोस्ने काम गर्छ। अख्तियारले दोषी फैसला गर्नुअघि निर्दोष हो भन्दै सरकारले घोषणा गर्दै हिँड्छ। भ्रष्टचारको संरक्षण गर्ने र भ्रष्टाचारीको प्रोत्साहन गर्ने सरकार- मुर्दावाद।
हामीलाई महिनौंसम्म घरभित्रै बस्न भन्यो। श्रमजिवी मजदुरहरु त्यत्रो लामो यात्रा हिँडेर आए। स्वदेश फर्कन चाहनेहरुको टिकटमा पनि यो सरकारले कमिसन खायो। मेडिकल सामग्री खरिदमा भ्रष्टाचार गरेर विश्वमा नेपालको शिर झुकायो। अर्कमण्य सरकार- मुर्दावाद।
भारतले नेपाली भूमि लिम्पियाधुरा खायो। संसदले आदेश दियो- नक्सा सार्वजनिक गर। बाध्य भएर नक्सा सार्वजनिक गर्यो। गैरजिम्मेवारपूर्वक प्रधानमन्त्रीले भारत मेरोविरुद्धमा नेकपाकै नेता उचालेको अभिव्यक्ति दिनुभयो। गैरजिम्मेवार सरकार- मुर्दावाद।
सत्य निरुपण तथा मेलामिलाप र बेपत्ता छानबिन आयोगका कामलाई सक्नुपर्ने बेलामा पार्टीभित्रको झगडामा द्वन्द्वमा खेल्न खोज्ने षड्यन्त्रकारी सरकार- मुर्दावाद।
जति मैले सुनाएँ। यो प्रचण्डकै प्रतिवेदनमा लेखिएका कुरा हुन्। लेख्ने को को? माधव नेपाल, झलनाथ खनाल कमरेड वामदेव गौतम। वाह! नेपाल कम्युनिस्ट पार्टी। आफ्नो प्रधानमन्त्रीलाई पूर्वप्रधानमन्त्रीहरुले भनेको कुरा पढेर सुनाए। हामीलाई उहाँहरुको नाटक हेरेर बस्नुपरेको छ। प्रतिवेदनमा लेखिएको हिसाब किताब अब हामीलाई चाहिन्छ। हामी हिसाबकिताब राख्छौं। कि,पूर्वप्रधानमन्त्रीहरुले बेसुरमा लेखिएको भन्नुस्। होइन भने लेखेको कुराको जिम्मा लिनुस्।
तपाईंहरुले भन्नुभएको प्रधानमन्त्री भ्रष्ट, राष्ट्रघाती, अयोग्य, अर्कमण्य‚ जसले प्रधानमन्त्री बनाउनुभयो, उसैले यस्तो भनेपछि हामीले प्रधानमन्त्रीलाई बोकेर हिँड्नुपर्ने?
वैशाख १७ मा कांग्रेस बैठकले यस्तो महाव्याधीको समयमा भ्रष्टचार गर्ने सरकार अपराधी हो भन्यो। सामान्य नागरिकले कल्पना पनि गर्न नसक्ने बेलामा सरकारले भ्रष्टाचार गर्यो। सरकारले शासन गर्ने वैधानिकता र नैतिकता गुमाएको छ। हामीले वैशाखमै भनेका थियौं।
२०६० सालमा पूर्वप्रधानमन्त्री गिरीजाप्रसाद कैलाली आएको बेला माओवादीले कांग्रेसले हत्या गरेको थियो। उहाँले कार्यकर्तालाई झण्डा ओढाउन जान्छु भन्नुभयो। प्रशासनले जान दिएन। हिंसाको आहालबाट मुलुकलाई बाहिर निकाल्ने अठोट गर्नुभयो। हामी कस्तो त्रासमा बाँचेका थियौं। डर त्रासमा रहेको मुलुकलाई हिंसाबाट मुक्त गर्ने संकल्प गिरीजाप्रसाद कोइरालाले गर्नुभयो। त्यहि संकल्पको जगमा २०६२/०६३ को जनआन्दोलन भयो।
सभापति शेरबहादुर देउवाको नेतृत्वमा निर्वाचन भयो। कांग्रेस हार्न तयार भयो। तर, देशलाई हार्न दिएन। यो पार्टी सधैं चुनाव जित्नेछ र सिंहदरबार र बालुवाटारमा बस्नेछ भनि बनाएको पार्टी होइन। एउटा चुनाव हार्यौं केही फरक पर्दैन। अर्को चुनाव जित्ने आशा राखेका छौं। हारेपनि केहि फरक पर्दैन। हामी हार्दा हार्दै पनि संविधान निर्माण गरेका छौं। चुनावमा भाग नलिने दललाई भाग लिने बनाएका छौं।
नेपालको इतिहासमा सबैभन्दा शक्तिशाली सरकार केपी ओलीको बन्यो। संसदमा उठेर धन्यवाद मैले दिएँ। पाँच वर्ष कांग्रेसले सरकारलाई साथ दिने संसदमा भने। जनता परिवर्तनका पक्षमा छन्,अब सहन जनताले सक्दैनन्। त्यो तपाईंले दिनुपर्छ मैले प्रधानमन्त्रीलाई भनें।
सरकारको तीन वर्ष पुग्न लागेको छ। कोरोना अघिको समय सरकारले सबैभन्दा अनुकुलको समय पाएको थियो। संघीयता कार्यान्वयन गर्ने मौका सरकारले पायो। संघीयता जिन्दावाद भन्नुपर्ने अवस्था हुनुपर्ने हो। गणतन्त्र जिन्दावाद भनी तमाम युवा सडकमा आउनुपर्ने बेला हो। कोही आयो? आएका छैनन्। समावेशी अनुहार संसद देखि अन्य निकायमा देखिनुपर्ने अवस्था आउनुपर्ने हो । त्यस्तो भयो? भएको छैन।
केपी ओलीका पक्षमा सामाजिक सञ्जालमा लेख्न पाइन्छ। विरुद्धमा लेखियो भने सात वर्ष जेल बस्नुपर्ने विधेयक सरकारले ल्याएको छ। यो कानुन संसदमा प्रस्तावित छ। जिल्ला प्रशासनको आदेश लिएर फेसबुकमै लेखेको आधारमा प्रहरी नागरिकको घरमा आइपुग्नसक्छ। अब प्रचण्ड वा माधव नेपाल जिन्दावाद भन्नेको घरमा पनि यो अवस्था आउनसक्छ। भन्न सक्छन्– कि केपी ओली जिन्दावाद लेख्। होइन भने किन मुर्दावाद लेखिस्।
(सरकारका विरुद्धमा कांग्रेसले कैलालीमा गरेको विरोध सभामा नेता थापाले राखेको विचारमा आधारित)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749826086.png)
