काठमाडौं- राष्ट्रिय ध्वजावाहक नेपाल वायुसेवा निगम (नेपाल एयरलाइन्स)ले जिएसए (जनरल सेल्स एजेन्ट) नियुक्तिको नयाँ मापदण्ड निर्धारण गरेको छ। निगमले जिएसए सम्बन्धी कार्यविधि पारित गर्दै जिएसए नियुक्तिको नयाँ मापदण्ड जारी गरेको हो। निगम सञ्चालक बोर्डको मंसिर ९ गते बसेको बैठकले जिएसएसम्बन्धी नयाँ मापदण्ड पारित गरेको हो।
जिएसए नियुक्तिसम्बन्धी नयाँ मापदण्डसहितको कार्यविधिमाथि छलफलका क्रममा बोर्ड सदस्यहरू भने दुई ध्रुवमा बाँडिएको एक जना बोर्ड सदस्यले नेपाल लाइभसँग बताए।
यती समूहको एजेन्टका रूपमा बोर्ड सदस्य रहेका फुरगेल्जे शेर्पाले निगम व्यवस्थापनबाट पेस भएको जिएसए नियुक्तिको मापदण्डमा विरोध गरेका थिए। स्रोतकाअनुसार उनलाई यती ग्रुपकै अर्का एजेन्ट ईश्वरी पौडेल र अच्युतराज पहाडीले समेत मौन बसेर सर्मथन गरेका थिए।
निगम व्यवस्थापनले जिएसए नियुक्तिमा न्यूनतम ५ वर्षको अनुभव भएको संस्था/संगठित संस्था हुनुपर्ने विषय मापदण्डमा राखेको थियो। तर, शेर्पाले नयाँलाई पनि जिएसए आवेदन दिन पाउने गरी मापदण्ड बनाउनुपर्ने भन्दै बैठकमा विरोध गरेका थिए। तर, निगम व्यवस्थापनको अडान पछि नयाँलाई भन्दा अनुभवीलाई नै जिएसए नियुक्त गर्नुपर्ने विषयमा अन्य सञ्चालकसमेत सहमत भएका थिए।
यतीका एजेन्टाबाहेक बाँकी सबै बोर्ड सदस्य सहमत हुँदा पनि शेर्पाले भने जिएसए नियुक्तिको नयाँ मापदण्डमा फरक मत राखेको स्रोतको भनाइ छ।
निगमले जिएसए नियुक्तिमा ७ वटा मापदण्ड तय गरेको छ। यतीका एजेन्टको फरक मत रहेपनि सो मापदण्ड बहुमत सदस्यबाट पारित भएको छ। अब निगमले बोर्डबाट पारित भएको जिएसए नियुक्तिको नयाँ मापदण्ड नै कार्यान्वयनमा ल्याउने छ।
यस्तो छन् मापदण्डका नयाँ व्यवस्था
१. सम्बन्धित देशको उड्डयन व्यवसायसम्बन्धी काम गर्न कानुन बमोजिम दर्ता भएको ट्राभल/एजेन्ट/कार्गो व्यवसायी।
२. उड्डयन व्यवसायसम्बन्धी न्यूनतम पाँच वर्ष काम गरेको अनुभव भएको।
३. माथि १ र २ बमोजिम एजेन्ट वा कम्पनीको अधिकृत पुँजी न्यूनतम ५ लाख अमेरिकी डलर भएको वा पछिल्ला तीन वर्षमा प्रतिवर्ष न्यूनतम ५० लाख अमेरिकी डलरको कारोबार भएको।
४. सम्बन्धित देशको कानुन बमोजिम कर दाखिला गरी अद्यावधिक गरेको।
५. कम्तीमा एउटा वायुसेवा प्रदायकको जिएसएको रूपमा सम्बन्धित देशमा काम गरेको अनुभव भएको।
६. सम्बन्धित देशमा कम्तीमा ३ वटा बिक्री काउन्टर भएको।
७. जिएसएका लागि दरखास्त दिएको कम्पनीको नाममा नै सो व्यवसाय दर्ता भएको।
८.अनलाइन जिएसएको अन्य मापदण्ड अनुसूचीमा उल्लेख भए बमोजिम हुनेछ।
जिएसए हुन अयोग्य हुने आधार
१. कालोसूचीमा परेको।
२. निगमसँग वा अन्य व्यवसायिक कारोबारमा संग्लन भएको।
३. निगमसँग बक्यौता बाँकी रहको।
४. निगमसँग विगतदेखि मुद्दामामिलामा संलग्न भएको।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
