काठमाडौं- प्रधानमन्त्री तथा नेपाल कम्युनिस्ट पार्टी (नेकपा) का अध्यक्ष केपी शर्मा ओलीले आफूले पद नछाड्ने दोहोर्याएका छन्। शनिबार प्रधानमन्त्री निवास बालुवाटारमा बसेको पार्टीको सचिवालय बैठकमा उनले आफूले पद छाडेर त्याग गर्छ कि भन्ने नसोच्न सदस्यहरुलाई आग्रह गरे।
‘महाधिवेशनसम्म अध्यक्ष छोड्दिनँ, आगामी चुनावसम्म प्रधानमन्त्री पनि छोड्दिनँ’, सचिवालयमा बैठकमा ओलीको प्रष्टोक्ति उद्धृत गर्दै अर्का एक सचिवालय सदस्यले भने, ‘त्यस्तो आशा गर्नुभएको छ भने छाडिदिनुस्।’
ओलीले आफ्नो स्वीकृति बिना नै बोलाइने गरेको बैठकप्रति असहमति व्यक्त गरे। उनले आफूलाई हटाउने तयारी गरिएको प्रति संकेत गर्दै बल प्रयोग नगर्न पनि सचेत गराए।
उनले भोलिका लागि बोलाइएको स्थायी कमिटी बैठकप्रति पनि असहमति जनाएका थिए। उनको जोड सचिवालय बैठकमै छलफल गरेर सहमतिमा निर्णय गरेपछि मात्रै स्थायी कमिटी बैठक बोलाउनेमा थियो। ‘सचिवालयमै छलफल गरौं। निष्कर्ष निकालौं। त्यसपछि स्थायी कमिटी बसौंला’, उनको भनाइ थियो।
गाली गलौज मात्रै गर्नका लागि बोलाइएको स्थायी कमिटी बैठकको काम नभएको ओलीको भनाइ थियो। ‘कुनै तयारी छैन, प्रस्ताव छैन। के गर्ने भन्ने पनि तय गरिएको छैन। बैठक मात्रै राखेर के गर्नुहुन्छ? केका लागि बैठक चाहियो?’, उनको प्रश्न थियो।
तर अर्का अध्यक्ष पुष्पकमल दाहाल प्रचण्ड र माधव कुमार नेपाल पक्षधरको चाहना अनुसार आइतबारकै लागि बैठक बोलाइएको हो।
बैठकमा ओलीले प्रचण्डको प्रस्तावलाई लाञ्छनापत्र भन्दै त्यो फिर्ता लिनुपर्ने दोहोर्याएका थिए।
दुवै प्रस्ताव स्थायी कमिटीमा
सचिवालय बैठकले अध्यक्षद्वय केपी शर्मा ओली र पुष्पकमल दाहाल प्रचण्डको प्रस्ताव स्थायी कमिटीमा छलफल गर्ने निर्णय गरेको छ। 'पार्टीको संकट निवारणको निम्ति पार्टीमा अहिलेसम्म प्रस्तुत भएका प्रस्तावहरु स्थायी कमिटीमा पेश गरेर छलफल गरिन्छ', बैठकपछि प्रवक्ता नारायणकाजी श्रेष्ठले भने।
अध्यक्ष प्रचण्डले गत कात्तिक २८ गतेको सचिवालय बैठकमा १९ पृष्ठको प्रस्ताव पेश गरेका थिए। त्यसको जवाफस्वरुप अर्का अध्यक्ष ओलीले मंसिर १३ गतेको सचिवालय बैठकमा ३८ पृष्ठको प्रस्ताव पेश गरेका थिए। दुवै अध्यक्षका प्रस्ताव एक अर्काप्रतिको आरोप र गुनासोले भरिएका छन्।
शनिबार सचिवालय बैठक बस्नुअघि दुई अध्यक्षबीच केहीबेर एक्लाएक्लै छलफल भएको थियो। 'अध्यक्षहरुको बीचमा आज छलफल भयो। छलफल पार्टीको स्वाभाविक रुपमा समस्या र समाधानमा नै केन्द्रित थियो। तर आजकै छलफलले कुनै निष्कर्ष निकाल्न सम्भव पनि थिएन। र आज निष्कर्ष निस्किसकेको छैन। तर अध्यक्ष कमरेडहरुको बीचमा छलफलको प्रक्रिया पनि अगाडि बढ्ने छ। र आवश्यकता पर्यो भने स्थायी कमिटीको बीचमा पनि पार्टीका नेताहरुको बीचमा र सचिवालयको अनौपचारिक, औपचारिक छलफल बस्छ', प्रवक्ता श्रेष्ठले भने।
उनीहरुबीच गत कात्तिक २५ गतेपछि शनिबार मात्रै एक्लाएक्लै छलफल भएको हो। प्रस्तावहरुका विषयमा नयाँ सहमति जुट्न नसकेपछि अन्ततः ती प्रस्तावहरु स्थायी कमिटीमा पुग्न लागेका हुन्। नेकपाको केन्द्रीय कमिटीको बैठक मंसिर २५ गतेका लागि बोलाइएको छ। स्थायी कमिटीपछि केन्द्रीय कमिटीमा पनि प्रस्ताव पुग्ने आकलन गरिएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1784106715.png)
-1764146706.png)
