काठमाडौं- युइएफए नेसन्स लिग फुटबल अन्तर्गत मंगलबार राति भएको खेलमा स्पेन युक्रेनसँग १-० ले पराजित भयो। युक्रेनसँग पहिलो पटक हार भोगेको स्पेनले खेलभर बलमा नियन्त्रण बनाइरहे पनि गोलमा बढ्न सकेन।
लगातार ४२ खेलमा गोल गर्दै आइरहेको स्पेन पछिल्लो दुई खेलमा गोलविहीन छ। यसअघि पोर्चुगलसँगको मैत्रीपूर्ण खेलमा गोलविहीन भएको स्पेन नेसन्स लिगमा युक्रेनविरुद्ध पनि गोलविहीन भयो। ४२ खेलमा १२१ गोलका साथ बढिरहेको स्पेनका लागि पछिल्ला दुई खेलको अवस्थाले चिन्ता थपेको छ।
युक्रेनविरुद्ध स्पेनले ७२ प्रतिशत समय बल आफ्नो नियन्त्रणमा राख्नुका साथै २१ सट प्रहार गरेको थियो। तर युक्रेनका गोलकिपर जेओर्जी बुशचानले राम्रा बचाउहरु गरे। जहाँ ७६औँ मिनेटमा काउन्टर अट्याकमा बढाएको बलमा स्पेनका गोलकिपर डेभिड डे गा गलत पोजिसनमा हुँदा युक्रेनका भिक्टर टेगानकोभले गोल गरे।
स्पेनले २०१२ को युरो कप जितेको युक्रेनको स्टेडियममा गोलका लागि आवश्यक शैली बनाएको देखिए पनि गोलमा बढ्न नसक्दा हार भोग्यो। कोरोना महामारीकै बीच पनि १५ हजार समर्थक रंगशालामा थिए। युक्रेनको एकै सट जितका लागि पर्याप्त भयो। २०१८ को नोभेम्बरमा नेसन्स लिग अन्तर्गत नै क्रोयसियासँग ३-२ ले हारेपछि यो नै स्पेनको पहिलो हार हो।
खेल हेर्दा पनि स्पेनको शैली हारका लागि योग्य थिएन। तर गोलमा बनाएका अवसरहरु सदुपयोग नहुने हो भने र गोलकिपरको एउटा गल्ती नै हारका लागि पर्याप्त हुन्छ। स्पेनमा अहिले युवा खेलाडीहरुले तीब्रता र एकजुट भएरै खेलिरहेका छन्। गोलको अभावमा पनि त्यो राम्रो पक्ष नै हो।
स्पेनको खेल राम्रो देखिए पनि गोलमा बनेका अवसर उपयोग नहुनु मुख्य समस्या हो। रंोड्रिगो मोरेनो, मिकेल ओयारजाबल र जेरार्ड मोरेनो त अग्रपंक्तिमा उपयुक्त छन्? भन्ने प्रश्न उठेको छ। यसअघिका खेलमा जस्तो वान भर्सेस वानमा बल कटाएर बढ्ने अन्सु फातीको शैली पनि कमजोर देखियो। खेलभर अग्रपंक्तिमा अवसर बनाउने काम आदामा ट्राओरेले मात्र गरे।
ट्राओरे स्पेनिस टिमबाट युक्रेनविरुद्ध सबैभन्दा प्रभावकारी देखिएका हुन्। उनको राम्रा क्रस बलहरु गोलमा परिणत हुन भने सकेन। खेलको अन्तिम सयमतिर कप्तान सर्जियो रामोस नै नम्बर ९ पोजिसनमा पुगेर गोल खोजिरहेका थिए। केही क्रस बलमा हेडिङको मुस्किल अवसर आए पनि उनी गोलमा देखिएनन्।
स्पेनको सुरुवाती ११ खेलाडी फरक ११ क्लबबाट थिए। म्यानचेस्टर युनाइटेड, सेभिया, रियल मड्रिड, भिलारियल, टोटनह्याम, रियल बेटिस, म्यानचेस्टर सिटी, रियल सोसिडाड, वुल्भ्स, लिड्स युनाइटेड र बार्सिलोना फरक-फरक क्लबबाट सेटमा परेका खेलाडीहरुले एकअर्कालाई बुझ्न मुस्किल परेको विश्लेषण पनि भइरहेका छन्।
स्पेनको हारमा गोलकिपर डेभिड डे गाको आलोचना भइरहँदा प्रशिक्षक लुइस इनरिकले भने डे गालाई दोष दिनु राम्रो नभएको बताएका छन्। ‘यस्तो खेलमा पनि गोलकिपरलाई दोष दिने हो भने फुटबल नहेरे हुन्छ। हरेक गोल गर्दा या गोल खाँदा पूरै टिमको जस अपजस हुने हो। हामीले राम्रो अवसरहरु बनाएका पनि थियौँ, खेल हाम्रै नियन्त्रणमा थियो। खेलाडीहरुले जस्तो मेहनत गरे त्यो मलाई राम्रो लागेको छ’ उनले भनेका छन्।
‘एक दुई खेलमा गोल नहुँदा धेरै आत्तिनु पर्ने छैन। हामीले राम्रा अवसरहरु बनाएकै हौँ। मैले मेरो समयमा यस्ता धेरै खेलहरु गुमाएको छु। खेलभर आफूले नियन्त्रण बनाउँदा पनि काउन्टरमा एक गोलले ठूलो असर पारिदिन्छ। विपक्षीले पाएको मौका उपयोग गरे’ उनले भनेका छन्।
युक्रेनसँगको हारपछि पनि स्पेन आफ्नो समूहमा शीर्ष स्थानमा नै छ। चार खेलमा स्पेनको सात अंक छ। दोस्रोमा रहेको जर्मनी र तेस्रोमा रहेको युक्रेनको समान छ अंक छ। अन्तिममा स्वीट्जरल्याण्डको दुई अंक छ। स्पेनले अब नोभेम्बर १५ मा स्वीट्जरल्याडसँग खेल्नेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1770562345.jpg)
