काठमाडौं- गत शनिबार माइतीघर मण्डलामा बलात्कारविरुद्धको आन्दोलनमा फरक प्रर्दशन देखियो। कालो कपडा लगाएका, कालो कपडाले मुख छोपेका महिलाहरुले धिमा बाजामा ‘बलात्कारी होस् तँ’ भन्दै गीत गाएर विरोध गरेका थिएँ।
करिब २५ को संख्यामा उपस्थित भएका उनीहरु 'पोलिटिकल लिटरेसी फोर वुमन’ नामक संस्थाको अगुवाइमा प्रर्दशनमा सहभागी भएका थिए। 'अझै कति सहने’, ‘नो मिन्स नो', 'इट वाज नट हर ड्रेस, इट वाज योर इभिल माइन्ड’लगायतका नारासहित प्लेकार्ड बोकी महिलाहरुले बाजामा राज्यप्रति इंगित गर्दै ‘बलात्कारी होस् तँ’ गीतमा नृत्यको शैलीमा प्रदर्शन गरेका थिए।
अघिपछि भन्दा नौलो प्रर्दशन थियो। चिलीबाट सुरु भएको यो गीतको भावमा गरिने नृत्यात्मक प्रदर्शन सामाजिक सञ्जालमा प्रशंसित पनि बनेको थियो।
महिला अधिकार र बलात्कार विरुद्ध भएको सो प्रदर्शनको तीन दिन पनि नबित्दै फेसबुकमा त्यसको विरुद्धमा अर्को ग्रुप खुलेको छ। ‘रेपर एसोसिएसन’ अर्थात् बलात्कारी संगठन नामक फेसबुक ग्रुप पब्लिक छ। बलात्कार विरुद्धको आन्दोलन र अभियानतर्फ संकेत गर्दै त्यसको बलात्कारको प्रत्युत्तर जस्तो लाग्ने गरी सार्वजनिक रूपमा पोसट हुन थालेपछि सामाजिक सञ्जालमा महिला अधिकारवादी पुनः एकपटक जुर्मुराएका छन्।
खुलेआम बलात्कारको प्रोत्साहनले कता जाँदैछ समाज?
सो ग्रुपका पोस्टविरुद्ध सामाजिक सञ्जालमा चर्काे विरोध सुरु भएको छ। लेखक सावित्री गौतमले नेपाल प्रहरीलाई मेन्सन गर्दै प्रहरीलाई असली बहादुरी देखाउन आग्रह गरेकी छन्।
‘होटलमा आपसी सहमतिमा समय बिताउन गएका दुई व्यक्तिको निजत्वमाथि आक्रमण चाहि कुनै बहादुरी हैन है। त्यो राज्यको तर्फबाट गरिएको आपत्तिजनक र गैरकानुनी काम हो। असली बहादुरी देखाउन ठाउँ यता छ खुल्लामखुल्ला पेजै खोलेर ‘म बलात्कारी हुँ’ भनिरहेकाहरू यता छन्,’ उनले लेखेकी छन्।
त्यस्तै 'पोलिटिकल लिट्रेसी फर वुमन’को फेसबुक पेजमा पनि विरोध गरिएको छ। ‘बलत्कारी होस् तँ' गानासहित महिला दिदिबहिनीहरुले बलात्कार र बलत्कारजस्ता अन्य अपराधहरुको विरुद्ध आवाज उठाइरहेको बेला सोविरुद्ध पनि प्रतिवाद गर्दै ‘बलात्कारी संगठन’जस्ता फेसबुक ग्रुप बन्नुले हाम्रो समाजमा रहेको पितृसत्ताको जडलाई पर्दाफास गरेको छ। १४ वर्षको बालकले पनि 'म बलत्कार गर्छु, मलाई समात्ने कोही छैन' भन्नुले हाम्रो समाजको चेतनाको स्तर खुला रुपमा उदाङ्गो पारेको छ।
बलात्कार जस्तो जघन्य अपराधको विषयलाई हसिमजाक बनाएर बलात्कारी मानसिकतालाई प्रोत्साहन गर्ने यस्तो ग्रुपलाइ कानुनको दायारामा ल्याइ कडा कारबाही गर्न नेपाल प्रहरीलाई सो पोस्टमा आग्रह गरिएको छ। यसरी ग्रुप बन्नु संवेदनाहीनताको पराकाष्ठा भएकाले प्रतिकार गर्न जरुरी रहेको सो पोस्टमा भनिएको छ।
एलिसा एकलासले यस्ता ग्रुप बनेकोप्रति लेखेकी छन्, ‘बलात्कारी मै हुँ', 'रेपर एसोसियसन' बन्नुले समाज कता जाँदैछ? ट्विटरमा बबिता राईलेले लेखेकी छन्, ‘यो सामान्य विषय हैन छिटो भन्दा छिटो ध्यान जाओस्। नेपाल प्रहरीलाई मेन्सन गरिएको छ। त्यस्तै अर्की ट्विटर प्रयोगकर्ता हिमाले कारबाहीको माग गरेकी छन्।
के हो 'बलात्कारी होस् तँ' अभियान?
चिलीबाट सुरु भएको यो अभियान विश्वभरि चलेको छ। लेखक गौतमका अनुसार प्रतीकात्मक रुपमा बलात्कार र यौन हिंसाविरुद्ध अमुक व्यक्तिलाई नभई सिंगो राज्य प्रणालीलाई यो अभियानले प्रश्न उठाएको हो।
महिला आन्दोलनमा प्रयोग भएको यो गीत 'द रेपिस्ट इज यु’ अहिले विश्वभर बलात्कारविरुद्ध आवाज उठाउनेहरूको 'एन्थम' भइरहेको छ। समग्र राज्यलाई प्रश्न उठाएको सन्दर्भमा केही पुरुषले व्यक्तिगत रुपमा लिएको भन्दै गौतमले आक्रोश व्यक्त गरिन्।
‘यो आपत्तिजनक कुरा हो। व्यक्ति विशेषलाई नभएर यो गितले राज्य र सिस्टमप्रति प्रतिकात्मक रुपमा भनेको हो,’ उनले भनिन्, ‘तर यसको विरुद्धमा यस्ता ग्रुप बन्नुले केही पुरुषमा महिलालाई हेर्ने नजर कस्तो छ भन्ने मानसिकताको चित्रण गरेको छ। यो देशमा बलात्कारको विरोध गर्ने अधिकार पनि छैन?’
कार्वाही गर्छाैँ : नेपाल प्रहरी
नेपाल प्रहरीको प्रवत्ता कुवेर कडायत सामाजिक सञ्जालमा गैरकानुनी अभियान चलाउनेलाई कारबाही गरिने बताए। ‘यो अभियानबारे भर्खरै नेपाल प्रहरीलाई जानकारी भएको छ,’ कडायतले भने, ‘कसले के लेखेको हो हाम्रो फेसबुक पेजमा म्यासेज गरिदिनुहोला। अनुसन्धान गरेर दोषीलाई साइबर क्राइम अन्तर्गगत कारबाही गर्छाैँ।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
