सिओल- विद्यार्थी भिसामा दक्षिण कोरिया आएका एक नेपाली विद्यार्थीलाई कोरियाली अध्यागमनले प्रवेश अनुमति नदिँदा अक्टोबर ८ देखि ईञ्छन विमानस्थलमा अलपत्र परेका छन्।
मलेसिया ट्राञ्जिट भएर अक्टोबर ८ का दिन दक्षिण कोरिया आएका ईटहरी घर भएका ती विद्यार्थीलाई युनिभर्सिटीले कोरियाली शिक्षा मन्त्रालयलाई जानकारी नै नगराएको भन्दै अध्यागमनले रोकेर राखेको छ। उनी कोरियाको के.सी युनिभर्सिटीमा अध्ययनका लागि काठमाडौंस्थित पीडित विद्यार्थीका मामा कोरियास्थित नेपाली एजेन्ट विश्व खनालमार्फत् कोरिया आएको बताइएको छ।
उनीसहित सोही युनिभर्सिटीका लागि अर्को कन्सल्टेन्सीबाट १ जना आएको र उनी पहिले नै कलेजलाई जानकारी गराएर आएकाले साथीलाई लगेर आफूलाई कलेजले लैजान पहल नगरेको पिडितको गुनासो छ।
उनी कोरिया आउँदै गरेको जानकारी पाएपछि कलेजका प्रोफेसरले उनीसँगै आएका साथिलाई फोन गरी मलेसियाबाटै नेपाल फर्किन भनेपनि विश्व खनालले आफूले सबै मिलाइदिने आश्वासन दिँदै निश्चिन्त भएर कोरिया आउन भनेको पीडितले बताए।
तर खनालले भने ती विद्यार्थीले नेपालबाट आउँदा आफूलाई जानकारी नदिई आफैं टिकट काटेर आएको र पछि युनिभर्सिटीले प्रवेश नदिने जानकारी पाएपछि मात्र मलेशियाबाट आफूलाई सम्पर्क गरेको बताए। ‘मलेसिया आइसकेको विद्यार्थीलाई मानवताको नाताले पनि कम्तिमा कोरियासम्म ल्याउनुपर्छ, यहाँ प्रवेश गराउन सकिन्छ कि भन्ने हिसाबले आउन भनेको हुँ’ खनालले भने।
कोरोना महामारीयता कोरिया आउने विदेशीले कोरियामा अनिवार्य क्वारेन्टाइनको व्यवस्था गरेको हुनुपर्ने र कलेज प्रशासनले यहाँको शिक्षा मन्त्रालयमा विदेशी विद्यार्थी आउँदै गरेको सम्पुर्ण विवरण उपलब्ध गराउनुपर्ने प्रावधान छ।
आफूले कलेजमा नेपालबाटै तीन महिना सम्म अनलाइन कक्षा लिएर भाषा पास गरी उत्तिर्ण प्रमाणपत्र समेत प्राप्त गरिसकेको पीडित विद्यार्थीको भनाइ छ।
महिनौँदेखि शुल्क तिरेर अनलाइन कक्षा लिइरहेको र कन्सल्टेन्सीलाई पनि तिरेको गरी हालसम्म कन्सल्टेन्सीमार्फत् १० लाख रुपैयाँ बुझाइसकेको पीडितले बताएका छन्।
पीडितले आफ्नो आर्थिकदेखि समयको खर्च धेरै भएकाले कोरिया आइसकेपछि नफर्काउन आग्रह गरेका छन्।
यता युनिभर्सिटी प्रशासनले भने ती विद्यार्थी कोरिया आउँदै गरेको जानकारी एजेन्टले समयमा नगराएका कारण आफूहरुले यहाँको सरकारलाई विवरण उपलब्ध गराउन नपाएको बताएको युनिभर्सिटीलाई उद्धृत गर्दै गैरआवासीय नेपाली संघ दक्षिण कोरियाका अध्यक्ष यज्ञराज सुवेदीले बताए।
कलेजले विद्यार्थीका बारेमा क्वारेन्टाइनसहित सम्पुर्ण व्यवस्था यहाँको शिक्षा मन्त्रालयमा पेश गरिसकेको हुनुपर्नेमा एजेन्टले जानकारी नगराउँदा विद्यार्थी नेपालबाट उडेपछि मात्र कलेजले जानकारी पाएको बताएको सुवेदीको भनाइ छ।
घिमिरे यो समाचार तयार पार्दासम्म चार दिनदेखि ईञ्छन विमानस्थलमा छन्। उनलाई शुक्रबारको कोरियन एयरमा नेपाल फर्काउने प्रयास गरिएको भएपनि कोरोना परीक्षणको पिसिआर रिपोर्ट आवश्यक पर्ने तथा अध्यागमनले कलेज प्रशासनसँग छलफल गर्न समय मागेपछि रोकिएको खनालले बताए।
अध्यागमन र कलेज प्रशासनको छलफलपछि ती विद्यार्थीलाई नेपाल फर्काउने निर्णय भएको र अबको उडानमा पिसिआर परीक्षण गराएर स्वदेश फर्काइने उनले बताए।
पीडित विद्यार्थीका मामा स्वयंले नेपालमा कन्सल्टेन्सी सञ्चालन गर्ने र उनले प्रो कन्सल्टेन्सीमार्फत् भिसा प्रक्रिया पुरा गरी अन्तिममा प्रो कन्सल्टेन्सी तथा आफूलाई जानकारी नै नगराई सिधै टिकट काटेर कोरिया पठाएकाले यस्तो अवस्था सिर्जना भएको खनालको दाबी छ।
कोरोना महामारीको समयमा भिसामात्र भएर हुँदैन भन्ने जानकारी हुँदा हुँदै पनि विद्यार्थीलाई टिकट काटेर सिधै पठाएकाले विद्यार्थी कलेजका लागि नभई अवैधानिक बस्न आएको हुनसक्ने दाबी कलेज प्रशासनले गरेको खनालको भनाइ छ।
पीडित विद्यार्थीका विषयमा दूतावासलाई पहल गरिदिन आग्रह गरिएको भएपनि दूतावासको क्षेत्रभित्र नपर्ने जवाफ पाएको खनालले बताए। पिडित विद्यार्थीको कोरिया आउँदा-जाँदाको लाग्ने सबै शुल्क कन्सल्टेन्सीले व्यहोर्नेगरी पहल गरेको उनको भनाइ छ।
पीडितलाई कोरिया प्रवेशका लागि कलेजले तत्कालका लागि रिजेक्ट गरिदिएको भएपनि भिसा रद्ध नगरिदिएकाले नेपाल पुगिसकेपछि पुनः कोरिया ल्याउन आफूले प्रक्रिया सुरु गरेको खनालले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_Tr387xuecJ-1778130428.jpg)
-1764146706.png)
