हे पागल डाक्टर !
कति देखाउछौ अझै पागलपन
कति गर्छौ आफ्नो देहमाथि अन्याय
कति गलाउछौ त्यो ज्यानलाई
अनि कति सुकाउछौ आफ्ना नशाहरू।
देशको सिंगो विधानलाई हाँक दिएर
किन बन्दै छौ देशद्रोही
किन खनिएका छौ भ्रष्टाचारीहरू माथि
किन उठाउदैछौ आवाज विभेदविरुद्ध
किन रच्न खोज्दैछौ युद्द
सेवालाई व्यपार बनाउने यी माफियाहरूसँग
अनि किन बन्दैछौ आँखाको कसिंगर
सत्ताका लागि तछाडमछाड गरिरहेका यी पातकीहरूसँग।
बुझन अब त
बलात्कृत भएर मारिएका ती अबोध
नाबालिकाहरूको न्यायको बिगुल नसुन्ने
यो बधिर सरकारले
तिमीजस्तो डुब्न लागेको घामको आवाज के सुन्ला
ती कोमल कोपिलाको अस्मिता
जोगाउन नसक्ने यो नपुंसक सरकारले
तिमीजस्तो मक्किएर झर्नै लागेको हागालाई के जोगाउला।
सुन्छु अब त तिम्रो नाडीको गति
मलिन हुन थालेको छ रे
श्वास फेर्न कठिन हुन थालेको छ रे
पिठ्युँकाे घाउले सुत्नै सक्दैनाै रे
सुख्खा भएर तिम्रो छाला
सर्पको काँचुली झै हुँदैछन् रे
अब त एक्लै कोल्टे फेर्ने सामर्थ्यसम्म छैन रे
बोली पनि काँप्न थाल्दैछन् रे
तिम्रो शरीर नै शिथिल र जीर्ण भएको छ रे।
नहोस् पनि कसरी १९औं अनशन
अनि सत्याग्रहको २७ औं दिन हो आज
धन्न पो टिकेका छौ तिमी
हामीलाई एकदिन भोकै बस्दा
चट्टान फोरेसरह हुन्छ
हिमाल चढेसरह हुन्छ
आश्चर्य लाग्छ तिमी कसरी निराहार यतिका दिन बाचेका छौ
अब त अत्ति भयो भरिदेउ अन्नका गेडाहरू त्यो पेटमा
पिलाई देउ जल त्यो सुकेको घाटीमा
अनि फुलाइदेउ ति नशाहरू।
उठिदेउ अब त नओइलाउ यसरी
तिमी त आशाको किरण हौ
आफू जलेर ज्ञानको प्रकाश छर्ने
आशामयी दियोको बत्ति हौ
त्यसैले निभ्न नखोज यसरी।
तिमी निभ्यौ भने
ती दुष्कर्मीहरूको साहस बढ्ने छ
गरिबीकै व्यापार गरी गर्ने छन् मनपरि
अनि तिमीसँगै निभ्ने छ गरिबको उज्यालो भविष्य
तिमीसँगै ओइलाउने छन् विपन्नहरूको डाक्टर बन्ने सपना
तिमीलाई त ज्यानको माया छैन सायद
तर तिमीलाई केही भयो भने
देशको चिकित्सा जगत नै टुहुरो हुने छ
त्यसैले म चाहन्छु तिमी धेरै वर्ष बाँच्नु पर्छ
बरू मेरो आयु पनि तिमीलाई लागोस्
अनि तिमीले आफु जस्तै कयौं गोविन्द केसी जन्माउनु पर्छ।
आफ्ना सारा रहरहरू मारेर
सम्पूर्ण भौतिक सुविधाहरू त्यागेर
स्वार्थ र लोभलाई फ्यालेर
आफ्ना लागि हैन हामी र हाम्रा सन्ततिका लागि
जनस्वास्थ्यका सुधारका निम्ति
तिमी लडिरहेका छौ अहिलेसम्म
युद्दभूमिमा एक्लो सिपाही बनि।
तर अब त तिमी उठ्नै पर्छ
हाम्रो पराक्रम बन्न
डगमगाएका हाम्रा पाइलालाई मार्गदर्शन गर्न
हामी पनि उठ्ने छौ तिमीसँगै
तिम्रै आवाजको बिगुल फुक्दै
तिम्रो युद्दका सहयोद्दा बनी
अनि तर्साउने छौ यी दुराचारी शासकहरूलाई
तिमीजस्तै पागल डाक्टर गोविन्द केसी बनि।।
(बिना शिवा, चिकित्सा विज्ञान राष्ट्रिय प्रतिष्ठान, न्याम्स, वीर अस्पतालमा व्याचलर इन मिडवाइफी साइन्स अध्ययनरत छिन|
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।