काठमाडौं- उपभोग्य मिति सकिएर नष्ट गर्नुपर्ने वस्तुलाई रिलेबलिङ गरेर बजार पठाउने काममा मुख्यगरी दुई कम्पनीको संलग्नता देखिएपनि प्रहरी प्रशासन र वाणिज्य विभागले भने एउटा कम्पनीलाई मात्रै कारबाहीको दायरामा ल्याएको छ।
स्निकर चकलेट, विभिन्न प्रकारका बिस्कुट, हर्लिक्स, वनबिटा, प्रिन्जल, ट्याङ जुसलगायत वस्तुमा नयाँ मिति टास्ने कार्यमा आयान डिस्टिब्युटर्स प्रालि र अमेजन डिस्टिब्युटर्सको मुख्य संलग्नता देखिएको थियो। तर यो प्रकरणमा अमेजन डिस्ट्रिब्युटर्सलाई छायाँमा पारी आयान डिस्टिब्युटरका संचालक र कर्मचारीलाई मात्रै थप अनुसन्धानका लागि भन्दै नियन्त्रणमा लिइएको छ। आयान डिस्टिब्युटर्सको हकमा पनि संचालक भारतीय नागरिक देखाएर नेपाली व्यापारी पुष्पादेवी अग्रवाललाई उन्मुक्ति दिनेगरी चलखेल शुरु भएको छ।
नेपाल प्रहरीको केन्द्रीय अनुसन्धान ब्युरो (सिआइबी), महानगरीय प्रहरी अपराध महाशाखा र वाणिज्य, आपूर्ति तथा उपभोक्ता संरक्षण विभागले गरेको स्टिङ अपरेसनमा आयान डिस्ट्रिब्युटर्सका माध्यामबाट नै अमेजन बारे जानकारी बाहिरिएको थियो। आयानभन्दा अमेजन विशाल ग्रुपको ठूलो वितरक कम्पनी हो।
ललितपुरको धोबिघाटमा मुख्य कार्यालय रहेको यो कम्पनीको उपत्यकाका विभिन्न स्थानमा शाखाहरुसमेत रहेका छन्। तर यो स्टिङ अपरेसनका क्रममा अमेजन डिस्टिब्युटरका कोही पनि पक्राउ परेनन्। छापा हानेको ४ दिन बितिसक्दा पनि यो कम्पनीबारे प्रहरी र वाणिज्य विभागले कुनै विवरण सार्वजनिक गरेको छैन।
विभागका महानिर्देशक नेत्र प्रसाद सुवेदी अमेजन कम्पनीका संचालकहरु अझै पक्राउ पर्न नसकेको स्वीकार्छन्। ‘यो प्रकरणमा आयान र अमेजनबाहेक अरु कम्पनीहरुको पनि संलग्नता देखिन्छ। पुतलीसडकमा कार्यालय भएको एक औषधी कम्पनीलाई पनि यही प्रकरणसँग जोडेर अनुसन्धान भईरहेको छ‚’ महानिर्देशक सुवेदीले भने‚ ‘अमेजनलगायत अरु कम्पनीका संचालन अझै पक्राउ परिसकेका छैनन्।’
यो विषय बाहिरिएको ४ दिन बितिसक्दा प्रहरी र विभागले उक्त कम्पनीका कसैलाई पनि पक्राउ नगर्नु शंकास्पद देखिएको छ।
त्यस्तै, विशाल ग्रुपले आफूले बिक्री वितरण गर्दै आएका खाद्यलगायत दैनिक उपभोग्य वस्तुमा रिलेबलिङ हुने गरेको विषयबारे मुख खोलेको छ। विशाल ग्रपबाट आइतबार जारी भएको विज्ञप्तीमा ‘आयान डिष्टिब्युटर प्रत्यक्ष वा अप्रत्यक्ष कुनै पनि रुपमा विशाल ग्रुपको ग्राहक नरहेको’ उल्लेख गरेको छ। तर अमेजन डिस्टिब्युटर्सबारे भने विज्ञप्तीमा कुनै विवरण खुलाइएको छैन।
वाणिज्य विभाग श्रोतका अनुसार आयान डिस्ट्रिब्युटर र अमेजन डिस्ट्रिब्युटर्स दुवै विशाल ग्रुपका सामान बेच्ने वितरक कम्पनी हुन्।
आयानको भन्दा अमेजनको अझ ठूलो संजाल छ। ‘अमेजनका अरु शाखामा पनि विभाग र प्रहरीले तत्काल छापा हान्नुपर्थ्यो। तर उनीहरुलाई आफ्नो कर्तुत लुकाउन त सजिलो भएको छ। त्यो कम्पनीका कसैलाई पनि पक्राउ नगर्नु थप शंकास्पद विषय हो‚’ ती कर्मचारीको भनाइ छ।
सम्बन्धित समाचार
म्याद गुज्रिएका वस्तुको 'रिलेबलिङ' गर्ने व्यक्ति उधारो धरौटीमा रिहा
म्याद गुज्रिएका वस्तु ‘रिलेबलिङ’ गर्न विशाल ग्रुपले भारतीयसँग लिखित सहमति गरेको खुलासा
म्याद गुज्रिएका खाद्यवस्तु ‘रिलेबलिङ’मा विशाल ग्रुपको संलग्नता, ८ जना प्रहरीको नियन्त्रणमा
कलंकीको एक घरभर म्याद गुज्रिएका सामान, नयाँ स्टिकर लगाएर बजार पठाउने गरेको खुलासा
म्याद सकिएका खाद्यवस्तुमा ‘रिलेबलिङ’ गर्ने कम्पनीका मालिक भारतीय नागरिक
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1750327258.png)
-1749826086.png)
