अर्थ समाचार

म्याद गुज्रिएका वस्तु ‘रिलेबलिङ’ गर्न विशाल ग्रुपले भारतीयसँग लिखित सहमति गरेको खुलासाबरामद सामानको मूल्य ४ करोड

हेमन्त जोशी शुक्रबार, असोज १६, २०७७ २०:०८

काठमाडौं- म्याद गुज्रिएका अखाद्य वस्तुमा ‘रिलेबलिङ’ गरेर बजार पठाउने अवैधानिक धन्दा चलाउन विशाल ग्रुपका प्रतिनिधिले भारतीय नागरिक रोनक बोथ्रासँग लिखित सहमति गरेको भेटिएको छ।

वाणिज्य, आपूर्ति तथा उपभोक्ता संरक्षण विभाग, नेपाल प्रहरीको केन्द्रीय अनुसन्धान ब्युरो (सिआईबी) र महानगरीय प्रहरी अपराध महाशाखाले गरेको स्ट्रिङ अपरेसनका क्रममा काठमाडौंको कलंकी र वाफलका ३ घरमा बिहीबार छापा मारी ८ जनालाई पक्राउ गरिएको थियो।

पक्राउ परेका भारतीय नागरिक रोनक बोथ्राले विशाल ग्रुपका प्रतिनिधि पुष्पादेवी अग्रवालले संचालन गरेको आयान डिस्ट्रिब्युटर प्रालिसँग लिखित सम्झौता गरी म्याद सकिएका सामानमा नयाँ म्यादसहितको स्टिकर प्रिन्ट गर्ने गरेको वाणिज्य विभाग उच्च श्रोतले जनाएको छ।

यो पनि पढ्नुहोस्

म्याद गुज्रिएका खाद्यवस्तु ‘रिलेबलिङ’मा विशाल ग्रुपको संलग्नता, ८ जना प्रहरीको नियन्त्रणमा शुक्रबार, असोज १६, २०७७

‘आयान डिस्ट्रिब्युटरका संचालकले भारतीय नागरिकसँग यो कामका लागि लिखित सम्झौता गरेको देखियो। कुनै कानूनी समस्या परेपनि आफूले व्यहोर्ने र सबै अवैधानिक कामको जिम्मा रोनक बोथ्राले लिनेगरी सम्झौता भएको भनेर बयान दिएका छन्‚’ विभाग श्रोतले नेपाल लाइभसँग भन्यो‚ ‘पक्राउ परेका केही व्यक्ति गाडी चालक र कामदार छन्। उनीहरुले लामो समयदेखि तलबसमेत नपाएको र आफूहरुलाई यो अवैधानिक कामबारे जानकारीसमेत नभएको भनेर बयान दिएका छन्।’

स्ट्रिङ अपरेसनका क्रममा दूईवटा कम्पनी आयान डिस्ट्रिब्युटर र अमेजन डिस्ट्रिब्युटरले यस्तो गैरकानूनी धन्दा संचालन गरेको भेटिएपनि पक्राउ परेका व्यक्तिहरुभने आयान डिस्ट्रिब्युटरसँग मात्रै आवद्ध रहेको देखिएको विभाग श्रोतको भनाइ छ।

‘यी दुई कम्पनी एकआपसमा जोडिएका छन्। किनकी आयानबाट पक्राउ परेका व्यक्तिले नै अमेजनबारे जानकारी दिएको हो। तर अमेजन डिस्ट्रिब्युटरका संचालक र त्योसँग जोडिएका व्यक्तिहरु अझै पक्राउ परेका छैनन्। उनीहरुको खोजी चलिरहेको छ‚’ श्रोतले भन्यो।

यो पनि पढ्नुहोस्

कलंकीको एक घरभर म्याद गुज्रिएका सामान, नयाँ स्टिकर लगाएर बजार पठाउने गरेको खुलासाबिहीबार, असोज १५, २०७७

यो धन्दामा संलग्न सबै व्यक्तिहरु पक्राउ पर्न बाँकी र पक्राउ परेकाहरुको पनि विस्तृत बयान हुन बाँकी छ। यद्यपि यी दुवै कम्पनीको सिधा सम्बन्ध विशाल ग्रुपसँग भएकोबारे अनुसन्धान टोली लगभग निस्कर्षमा पुगिसकेको श्रोत बताउँछ।

‘लामो समयको रेकीपछि यो अपरेसन चलाइएको हो। यही समूहका अरु कम्पनी र व्यक्तिहरुमाथि पनि हाम्रो निगरानी छ। अरु केही ठूला कम्पनीहरुमा पनि हामीले सूक्ष्म निगरानी गरिरहेका छौं,’ स्रोतले नेपाल लाइभसँग भनेको छ।

पक्राउ परेका व्यक्तिहरुको बयान शुक्रबार नसकिएकाले उनीहरुलाई महानगरीय प्रहरी परीसर टेकुको जिम्मा लगाइएको छ।

बदामद सामानको मूल्य करिब ४ करोड
ती दुई कम्पनीले बजारबाट उठाएका स्निकर चकलेट, ओरियो बिस्कुट, आलुचिप्स, टेंगो जुस, हर्लिक्सलगायत म्याद गुज्रिएका वस्तुको मूल्य करिब ४ करोड रुपैयाँ बराबर रहेको विभागले प्रारम्भिक आँकलन गरेको छ। बजारमा पुगिसकेका यस्ता वस्तुहरु फिर्ता गर्नका लागि पनि विभागले काम सुरु गरिसकेको जनाएको छ।

‘केही डिपार्टमेन्टल स्टोर र पसलहरुले विशाल ग्रुपअन्तर्गतका यी सामानहरू बेचबिखन नगर्ने र फिर्ता पठाउने भनिसकेका छन्। हामीले नियन्त्रणमा लिएका व्यक्तिहरुले कहाँ–कहाँ सामान पठाउने गरेका थिए त्यसको पहिचान गरी त्यहाँबाट पनि फिर्ता गर्ने तयारी गरेका छौं,’ श्रोतले भन्यो।