काठमाडौं-करिब ४ करोड रुपैयाँ बराबरका अखाद्य वस्तुमा नयाँ उपभोग्य मिति राखी बजार पठाउने गिरोहलाई वाणिज्य, आपूर्ति तथा उपभोक्ता संरक्षण विभागले उधारो धरौटीमा छोडेको खुलेको छ।
विशाल ग्रुपले बिक्री वितरण गर्दै आएका म्याद गुज्रिएका सामग्रीमा रिलेबलिङ गर्ने समूहलाई विभागले आईतबार धरौटी बुझाउने गरी शुक्रबार नै रिहा गरेको खुलेको हो।
विभागका महानिर्देशक नेत्रप्रसाद सुवेदीले भने कानुनी प्रकृया पुरा गरेरै रिहाई गरिएको दाबी गरे। ‘शुक्रबार हामीले धरौटीमा अन्तरिम खालको प्रबन्ध गर्याैं। उनीहरुले जग्गा जमिनको कागजात पेश गरे। आज बैंक ग्यारेन्टी पेश हुन्छ। मान्छे आईसकेका छन्,’ महानिर्देशक सुवेदीले भने, ‘कारबाहीका क्रममा कुनै धरौटीमा छुट्छन्, कुनै हाजिरीमा छुट्छन्। कुनै थुनामा पर्छन्। यो सामान्य प्रकृया हो।’ विभागले १ करोड रुपैयाँ धरौटी मागेको छ।
करोडौं मूल्यका सामानमा रिलेबलिङ गरी उपभोक्ताको जनस्वास्थ्यमा गम्भीर खेलबाड गरेको भेटिए पनि यो मुद्दामा कमजोर कानुनकाे हवाला दिँदै आरोपीलाई छुटाउन लागिएको छ। नेपाल प्रहरीको केन्द्रीय अनुसन्धान ब्युरो (सिआईबी) र महानगरीय प्रहरी अपराध महाशाखाले अनुसन्धान गरेको यो विषयलाई वाणिज्य विभागको जिम्मा लगाएर कमजोर पार्न खोजिएको एक उपभोक्ताकर्मीले बताए।
‘प्रहरी आफै वा जिल्ला प्रशासन कार्यालयले सरकारी वकिलको कार्यालयमार्फत् कालोबजार तथा अन्य केही सामाजिक अपराध तथा सजाय ऐन २०३२ को प्रावधान अनुसार कारबाही गर्न सक्थ्यो। तर मुद्दा कमजोर बनाउन उपभोक्ता संरक्षण ऐन २०७५ को हवाला दिईयो,’ ती उपभोक्ता अधिकारकर्मीको भनाई छ।
विभागका महानिर्देशक सुवेदी मौजुदा कानुनी व्यवस्थामा भएको र यो मुद्दामा आकर्षित हुने कडा सजायलाई नै हेरिने बताउँछन्। तर कारबाही भने उपभोक्ता संरक्षण ऐनअनुसार नै हुन लागेको उनको भनाइ छ।
‘यो मुद्दामा उपभोक्ता संरक्षण ऐन नै आकर्षित हुने देखियो। कम गुणस्तर भएको वस्तलाई बढी गुणस्तर देखाउने वा नयाँ उपभोग्य मिति राख्ने, रिट्यागिङ गर्ने, रिलेबलिङ गर्ने कसुर अन्तर्गतको कारबाही गर्ने बुँदा समातेका छौं हामीले। त्यही अनुसार हामीले थुनासम्मको सजाय गर्ने गरी अगाडि बढेका हाैं,’ महानिर्देशक सुवेदीले भने, ‘अरु आकर्षित हुने कानुन पनि हेर्छौं। निरीक्षण अधिकृतले बयान लगायतको काम सक्नै बाँकी छ। उपभोक्ता संरक्षण ऐनको एउटा बुँदा मात्रै लगाउने हो भन्ने मिल्दैन हामीले। अरु बुदाँहरु पनि आकर्षित हुन सक्छन्। बलिया कानुन सबै समात्छौं।’
अनुसन्धानका क्रममा यो मुद्दासँग विशाल ग्रुपका दुई होलसेल कम्पनी आयान डिस्ट्रिब्युटर्स र अमेजन डिस्ट्रिब्युटर्सबाहेक अरु कम्पनीहरु पनि जोडिएको देखिएको छ। प्रहरीले आयानका संचालकहरु पक्राउ गरी धरौटीमा रिहा गरे पनि अमेजनका संचालकहरु भने अझै पक्राउ परेका छैनन्।
सम्बन्धित समाचार
म्याद गुज्रिएका वस्तु ‘रिलेबलिङ’ गर्न विशाल ग्रुपले भारतीयसँग लिखित सहमति गरेको खुलासा
म्याद गुज्रिएका खाद्यवस्तु ‘रिलेबलिङ’मा विशाल ग्रुपको संलग्नता, ८ जना प्रहरीको नियन्त्रणमा
कलंकीको एक घरभर म्याद गुज्रिएका सामान, नयाँ स्टिकर लगाएर बजार पठाउने गरेको खुलासा
म्याद सकिएका खाद्यवस्तुमा ‘रिलेबलिङ’ गर्ने कम्पनीका मालिक भारतीय नागरिक
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1750327258.png)
-1749826086.png)
