न्यूयोर्क- कोरोना भाइरसबाट सङ्क्रमित भएका अमेरिकी राष्ट्रपति राष्ट्रपति डोनाल्ड ट्रम्पलाई उनका प्रतिस्पर्धी जो बाइडेनले शीघ्र स्वास्थ्य लाभको कामना गरेका छन्।
उनले ट्रम्प पत्नी मेलानिया ट्रम्पसमेत सङ्क्रमित भएकोमा दुवै जनाको शीघ्र स्वास्थ्य लाभको कामना गरेका हुन्।
अहिले ७४ वर्ष पुगेका राष्ट्रपति ट्रम्प र ५० वर्षीया उनकी पत्नी मेलानिया शुक्रबार कोरोना संक्रमित भएका हुन्। उनले सामाजिक सञ्जालमा लेखेका छन्, ‘ट्रम्प दम्पत्तिको शीघ्र स्वास्थ्य लाभका लागि हामीले निरन्तर प्रार्थना गरिरनेछौं।’
त्यसैगरी पूर्व राष्ट्रपति बाराक ओबामाले पनि ट्रम्प दम्पत्तिको स्वास्थ्य लाभको कामना गरेका छन्। उनले ट्रम्प दम्पत्तिसँगै कोरोना भाइरसबाट सङ्क्रमित सबैको स्वास्थ्य लाभको कामना गरेका छन्।
अमेरिकामा अहिले ७३ लाख ३२ हजार १९ जना सङ्क्रमित भएका छन् भने दुई लाख आठ हजार ६९३ जनाको मृत्यु भएको छ। यो दुवै तथ्यांक देशअनुसार हेर्दा विश्वभरीकै सबैभन्दा धेरै हो।
त्यसैगरी पूर्व राष्ट्रपति विल क्लिन्टन, ट्रम्पसँगै राष्ट्रपतिमा यसअघिकी प्रतिस्पर्धी हिलारी क्लिन्टन, अहिले डेमोक्र्याटको तर्फबाट उपराष्ट्रपतिको उम्मेदवार रहेकी कमला ह्यारिसलगायतले ट्रम्पको स्वास्थ्य लाभको कामना गरेका छन्।
स्वदेशी नेता बाहेक अन्य देशका पनि दर्जनौं नेताहरुले उनलाई शीघ्र स्वास्थ्य लाभको सन्देश पठाएका छन्। उनीहरुमध्ये उत्तर कोरियाका सर्वोच्च नेता किम जोङ अनले शनिबार पठाएको सन्देशलाई महत्वका साथ हेरिएको छ।
‘उहाँहरुलाई जतिसक्दो चाँडो स्वास्थ्य लाभ हुनेछ भन्ने मैले विश्वास लिएको छु,’ किमले सम्प्रेषण गरेको सन्देशमा उल्लेख गरिएको छ। लामो समयदेखि एक अर्कालाई मुख्य दुश्मन मान्दै आएका अमेरिका र उत्तर कोरियाका शीर्ष नेताद्वय ट्रम्प र किमबीच पटक पटक शिखर वार्ता भएका थिए। त्यसैले पनि उनीहरुले एक अर्काप्रति विशेष निकटता प्रदर्शन गरेका छन्। यसअघि किम अस्वस्थ भएको खबर सार्वजनिक भएको बेला पनि ट्रम्पले तत्कालै उनको शीघ्र स्वास्थ्य लाभको कामना गरेका थिए।
त्यस्तै चिनियाँ राष्ट्रपति सि चिन फिङले पनि ट्रम्प दम्पत्तिको स्वास्थ्य लाभको कामना गरेको सिजिटिएनले जनाएको छ।
राष्ट्रपति ट्रम्प दम्पत्तिलाई शुक्रबार कोरोना भाइरसको सङ्क्रमण पुष्टि भएपछि अस्पताल भर्ना गरिएको छ। उनलाई ज्वरो आउनेलगायतका कोरोनाका सामान्य लक्षणहरु देखिएपछि अस्पताल भर्ना गरिएको अधिकारीहरुले जानकारी दिएका छन्।
उनलाई शुक्रबार राती वाल्टर रिड नेसनल सैनिक अस्पताल लगिएको हो। उनी बिहीबार मध्याह्न एउटा चुनावी कार्यक्रममा सहभागी भएर फर्केपछि सङ्क्रमित भएको बताइएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
-1789631269.jpg)
