काठमाडौं- वाणिज्य, आपूर्ति तथा उपभोक्ता संरक्षण विभागले बजार अनुगमनमा खटाउन नेपाल प्रहरीको डेडिकेटेड टिम माग गर्दै गृह मन्त्रालयलाई पत्र पठाएको छ। बजार अनुगमन तथा अनुसन्धान र कारबाहीका सिलसिलामा विभागदेखि बजारसम्म पुग्दा सुरक्षा आवश्यक पर्ने भन्दै विभागले नेपाल प्रहरीको डेडिकेटेड टिम खटाई मद्दत गरिदिन गृह मन्त्रालयलाई पत्राचार गरको हो।
विभागका प्रवक्ता रवीन्द्र आचार्यका अनुसार गत साउन २२ गते बसेको केन्द्रीय बजार अनुगमन समितिको बैठकले गरेको निर्णयअनुसार गृह मन्त्रालयलाई प्रहरीको डेडिकेटेड टिम माग गर्दै पत्र पठाइएको हो। जिल्ला प्रशासन कार्यालयबाट खटिएको प्रहरीलाई महानगरीय प्रहरी परिसर टेकुले गत जेठमा फिर्ता बोलाएपछि अहिले विभागका लागि भनेर अहिले छुट्टै प्रहरी टिम परिचालित छैन। गृह मन्त्रालयलाई यस विषयमा पहिल्यै जानकारी गराइसकेको र बुधबार आधिकारिक पत्रमार्फत् प्रहरी पठाइदिन भनेको आचार्यले बताए।
यसअघि जिल्ला प्रशासन कार्यालयबाट प्रहरी खटिने गरेकोमा अहिले विभागले प्रहरी केन्द्रीय कार्यालयमार्फत् पठाउन भनेको छ। ‘प्रभावकारी बजार अनुगमनका लागि प्रहरीको पनि आवश्यकता पर्ने भएकाले सो प्रयोजनका लागि प्रहरी प्रधान कार्यालयमार्फत् प्रहरीको डेडिकेटेड टिम खटाइदिनहुन अनुरोध छ।’ विभागले गृहलाई पठाएको पत्रमा भनिएको छ।
विभागमा खटिएका प्रहरीलाई महानगरीय प्रहरी परिसरले फिर्ता बोलाएपछि पछिल्लो तीन महिनायता अनुगमन टोली बिनासुरक्षा नै बजारमा खटिने गरेको छ। तर अनुगमनका क्रममा व्यापारीबाट हुनसक्ने सम्भावित आक्रमणको मनौवैज्ञानिक त्रासबारे कर्मचारीले सधैं गुनासो गर्ने गरेका थिए। विभागको टोली अनुगमनका लागि जुन ठाउँमा खटिएको हो त्यही क्षेत्रको प्रहरी प्रशासनसँग समन्वय गरेर काम गर्न खाजेपनि स्थानीय प्रशासनबाट असहयोग भएपछि विभागले डेडिकेटेड टोली मागेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749277953.jpg)
-1764146706.png)
